THUPAUCAP
Laibu
(Proverbs)
Thulamsial
Thupaucap laibu hi biaknak lam le nuncan ngamtatdan lam zilhdunnakte komin thuhilhnak le thu tehkipnak bangin ngatmi hi. A tambel cu nisial nunnak a man mite hi. Cihthiamnak nei thei tukin, “ Topa upatin,” tihmi tuah thu hanthawn panin, biaknak lamah nuncan ngamtat pha neih tuk bek hei hi ngawlin mahno theih cawm tukmi le um daan ziaza tianin hilh hi. A man mi thu tehkipnak comno hin tanglaih a Israel zilhtute cu thu pa kha khat a um ten itin um tuk, tih thu langtik hi. Hi thu khenkhatte cu innkua pehzomnak le a dang cu sum le pai thu lam hi, a khenkhatte cu mipi lak a um ten i ti bangin um tuk tih le i ti bangin um a hin mawi tuk him tih thute hi. A khenkhat cu mah le mah supnak a kul dan thute hi. Niamkhiatnak lungmu, thinsaunak, mi ca-ngah upatnak le mai ngualcam pha humah muantak a um a phat dante vang tampi hilh hi.
1
Thupaucap Manneih Dan
1 David capa Israel kumpi, Solomon i Thupaucapte:Ref 1:1 1Kum 4:32;
2 Cihnak, ngaihsutnak pha le thudik hilh mi theih theihnak na neih theihnak tukin mi bawm theitu thupaucap um hi.
3 Mah thupaucapin nundan thiamnak le diknak, cipzet le zazut zetin nun thiamnak hilh tuk hi.
4 Thu ngaihsutnak dawmte ciptikin, khangnote cu thutheihnak le ngaihsut thiamnak pia hi.
5 Hih Thupaucap hin micipte cihnak khangtikin mithiamte lamhuai tuk hi.
6 Mah hangin micip tei kaih suahmi Thupaucap hilh ciangnak thuthuk le thu haksate thei ciangtik tuk hi.
Khangnote Hanthotnak
7 Pathian kihcaknak cu cihnak a patnak hi. Misil ten cihnak le thuhilhnak cu imah simsial haw ma hi.Ref 1:7 Job 28:28; Saam 111:10; Thup 9:10;
8 Ka capa, na nu le na pai thu hilhmi cu phazetno in ngai in hi.
9 A hilh haw mi thu in, na ngamtat ziaza phatik tuk a na lu ah lupawng mawizet le, na ngawngah khi mawi zetin cang tuk hi.
10 Ka capa, misual ten a zol haw ten ngai kha pahsun.
11 Amuh ten, “Hungin hi, mi pa khat beek thah tuk zei nung, sualnak nei ngawlte pang kuh nung.
12 Mithi khua in mi a thon bangin a nung lelengin thon nung, sualnak a nei ngawl vangin lei khuk sung caak bangin um haw tahen.
13 Thil manphate laksakin, a inn uh hi na manpha tuah dimtik nung!
14 Keimu lakah tel bok inna, ka thil nguk uhmite sem bok tuk ung hi,” tin, a zop haw ten ngai kha pahsun.
15 Ka capa, mahtibang misual tei lakah hawh kha pahsun, A lampi haw pen pialin hi.
16 Thil pha ngawl bawl tuk cu zuanzangzet haw in, mi that tuk cu a mansa lelengin um haw hi.
17 Vano tei muh lelengin suukthang siah cu imah nemcuam tukma hi.
18 Mahnaven hiti bang misualte cu amuh le muh thangsiah cop na hi haw in mahmi thang sungah amuh awk cihleh haw tuk hi.
19 Naunehnak tuah mi thil a lonsaktute cu amuh le muh thihnak zei cop haw hi. Mi sesuakte cu mahtibang haw hi.
Cihnak i Au Aw
20 Ngai un! Zinpi le bazal pen cihnak i au mi aw cu;Ref 1:20-21 Thup 8:1-3;
21 Khuapi kongkapi le mi tawhdun khawmnak mun pen nging zetin au hi.
22 Misilte aw, ituk tian sil hih tuk uh cim? Ituk tian cihnak zawnsak hi nop tituk uh cim? Cihnak hi hua tuk uh cim?
23 Nun ka hilh laihin phano in ngai in, Ngaihsutnak pha pia tung a ka cihnak cu sem bok tung hi.
24 Ka lakah hung tukin sam naveng hung nuam ma uh ci. Ka khutin zap na vengin ngai ma uh ci.
25 Ngaihsutnak pha ka piak mite vang imah thupi sa ma uh ci, Na nuncan ngamtat uh lepsak tuk vang nuam ma uh ci.
26 Mah hangin haksatnak na tawh uhten nuihsan tung, Thinsuk launakin, a khuh ten nuihcip tung hi.
27 Nuncimnak cu huihsiapi theu bangin a hen ten le, a lauhuai siatnakin simpei bangin a nuai ten lungbing le lung-amin um tuk uh ci.
28 Mah hun ten keimah sam tuk ci, mahnaven kei in don nuam tuk mang hi. Muntihkimah keimah zei tuk nave uhcin tawk tukma uh ci.
29 Thutheihnak cu hua em uh ci, Topa kihcak tuk cu teng nuam ma uh ci.
30 Ngaihsutnak ka piak mite vang deih ngawlin ngamtat ziaza ka hilh ten ngai nuam ma uh ci
31 Mah hangin nangmu deh bangkekin ngahleh tuk uh ci, na nadeh uhmi in natnak pia tuk hi.
32 Thu ngaihsutnak nei ngawl ten cihnak a kik haw hangin thi haw hi. Misilte cu a zulzaunak haw in siatsuahleh tuk hi.
33 Mahnaven ka thu a ngaitute cu himdam haw tuk a, thinsuk launak imah nei haw tukma hi.