18
1 Midang tuah a phialdun thei ngawlmi cu, mai deihnak bek ngaisungtu hi. Midang ngaihsutnak pom thei awng tukma hi.
2 Misil ten thu a theih le theih ngawl thupi in ngaisung ma hi, Izahin cip ing him tih langtik tuk bek khi nuam hi.
3 Sualnak le zahcak mualphonak cu a hawh langkhat lelengmi hi, upatnak na paitik tale zotsaknak tawk tuk ci.
4 Mihing tei awnkam cu cihnak bulpi na hi thei hi, tuipi thuanthum bangin thuk a luang lelengmi luitui bangin thak leleng tuk hi.
5 Mipha ngawlte mitmaipha piak cu a man ngawlmi na hihi, midik mi phatnak cotik ngawl vang cu a man mi hi ma hi.
6 Misil muk pen hauhdunnak tul a, a awnkamin vahdunnak piangtik hi.
7 Misil awnkamin amah le mah siatsuah dun hi. A awnkamin amah le mah awkcop hi.
8 Mi iknak thu cu uk le hum zetin thon lawlop hung hi.
9 Mi thazawng cu mi siatsuahtu bangin sia hi.
10 Topa cu buknak inn sangpi na hi, midik miphate cu a lakah hawhin himdam haw hi.
11 Mihau ten a neihnak haw cu himnak hi tin ngaisung haw, sangin a khozet mi khuapi kulhtian hi tin ngaisung haw hi.
12 Akua hei hihen niamkhiatnak a neih laih ngawl sung zong cu maison upat piak hi tukma hi, mi uangkhote cu siatnak lampi ah um haw hi.
13 Thu na lulhleh laih ngawlin phano in ngai masa in, mahtin na ngai ma ahi tale misil na hih i humah thu na lulhmi pa a zawnsak hi tuk ci.
14 Mihing lungmu in natnak thuak thei naven lungmu a keh tale muansan tuk umma toh hi.
15 Micip ten cun nuamnak lungmu nei leleng haw a, cung bet tukin mansa leleng haw hi.
16 Mi thupimi upa tawk nuam cim? Khutcawi keng inna, baihno in tawk thei tuk ci.
17 Thukhennak zungah a masabel thu a sontu khi midik le thumanbel bang hi. Mahnaven amah a el tupa in thu a dotkan lih tian bek phaat hi.
18 Thu theizet veve pa nih thukhennak zungah thu a dondun haw ten kungkhainak bekin a thu haw khen thei hi.
19 Na unau bawm inna, a khomi khua kulhnak bangin nangmah hup tuk hi. Mahnaven na hauhpih tale na ca in kongka khak tuk hi.
20 Na awnkam pen a tulmi bangin na nunnak hi bok tuk hi.
21 Na awnkamin, na nunnak a hup theih bangin siatsuah thei hi. Mahnaven na awnkam hangin a hengmi hempoh na thuak theih kul hi.
22 Zi a muzote cu na pha mu na hi leng haw, mahmi in Topa i phatnak cu na humah langtik hi.
23 Mi ca-ngah a ot ten awn nem tuah ngenin ngen hi, mahnaven mihau pai a ot ten kam hang zetin donleh hi.
24 Ngualcam khenkhat cu can comno sung bek kho hi, mahnaven unau sangin a pha saw mi ngualcam vang na um hi.