15
1 Awn nemin thinuknak paitik hi. Awn sia in thinuknak piangtik hi.
2 Micip tei lei in cihnak pungtikin misil tei kam pen a silnak haw suak tul hi.
3 Topa in mun tihkim a piangmi thil hempoh mu khawng hi. Phatnak a bawl uhmi vang, siatnak a bawl uhmi vang zo leleng hi.
4 Hehpihnak awnkamin lungmu nungtikleh hi, mahnaven hehpihnak tel ngawl awnkamin lungmu tamzantik hi.
5 Pai thuhilhnak a nialtu cu misil hi, thuhilhnak a sangtu cu micip hi.
6 Midik ten a sumpai haw khawlin, mipha ngawl ten haksatnak a hen ten a sumpai haw mang khawng haw hi.
7 Misilte hang hi ngawlin micipte hangin cihnak pungzai hi.
8 Mipha tei thunget ten Topa lungdam hi. Mahnaven mipha ngawl tei biakpiaknak cu ningdelh hi.
9 Mipha ngawl tei nadeh daan cu Topa in hua hi, mahnaven diknak a bawltute cu it hi.
10 Thil sual na bawl tale nase zetin dantatnak thuak tuk ci, thuhilhnak na deih ma tale thi tuk hi ci.
11 Mithi khua sung a ummite cu Topa in mu khawng hi. Itih bangin mihingin, a ngaihsutnak cu Pathian mai pen sel thei tuk him?
12 Mi uangkhote cu thuhilhnak deih haw ma hi, micip tei lak pen ngaihsutnak hei ngen awng haw ma hi.
13 Mihing cu a lungdam ten a mitmai pha hi. Mahnaven a thasia ten mitmai sia haw hi.
14 Micipte in thuhilhnak deih haw hi, mahnaven misil ten a silnak hawah khin lungkim haw hi.
15 Mizawngte cu lungkham lelengin um haw hi, mi lungdam cu nunnop leleng haw hi.
16 Topa upatnak tuah thil dawmno neih cu, hauzet leng na pi in, thinsu lelengin um sangin pha saw hi.
17 It mite tuah anceh sawlbawk eih cu huatdunnak mun a cik ukbel eih sangin uk saw hi.
18 Thincomnakin, hauhdunnak suaktik hi, mahnaven thinsaunakin lemnak hengtik hi.
19 Thazawngmi na hi tale mun hempoh ah haksatnak tawk tuk ci. Thuman na hi tale haksatnak nei tukma ci.
20 Capa cipin, a pa lungdamtik hi. Misil bekin a nu zawnsak hi.
21 Misilte cu a silnak hawah thinnop haw hi, mahnaven micipin diknak bawl tuk hi.
22 Ngaihsutnak tam deuh na la tale lawhting tuk ci, mahma tale tingsam leleng tuk ci.
23 A huncan tuah kaihin awnkam na ot ngah cu i zahta in pha him?
24 Micip cu thihnak lam hawh ngawlin nunnak lamah hawh hi.
25 Topa in uangkho tei inn cu siatsuah tuk hi, mahnaven meivong tei thil cu cingkhawi tuk hi.
26 Topa in ngaihsutnak pha ngawlte cu hua hi, mahnaven lemdunnak awnkam humah lungdam hi.
27 Lamcam ngawl zetin nemcuam na ngai tale na innkua buaitik tuk hi. Nawhthuh la pahsun na, na khan sau tuk hi.
28 Miphate in, a don haw laihngawlin ngaisung masa haw hi, mipha ngawlte in manlangin don haw in buainak suaktik hi.
29 Mipha thu a nget haw ten Topa in ngai hi, mahnaven mipha ngawl tei thungetnak cu ngai nuam ma hi.
30 Mitmaipha in mi lungdamtik hi, mahten thuthangpha in nguh sung tianin damnak pia hi.
31 Thuhilhnak phano in, na ngai tale micip hi ci.
32 Cung tuk na el tale nangmah le mah imah sialcop ngawl hi ci, thuhilhnak na sang tale cip dedeuh tuk ci.
33 Topa kihcaknak cu cih cunnak hi. Upatnak na co theihnak tukin niamkhiat masa in hi.