14
1 Numei cip ten inn pha sa haw hi. Mahnaven a sil ten siatsuah haw hi.
2 Midik ten Topa cu kihca haw hi. Mahnaven mi awklawl ten imah simsial haw ma hi.
3 Misil uangkho mi in tampi awn hi. Micip pai awnkamin amah hup hi.
4 Nadektu tuk khuicangte a umma tale na beem cu tong thong tuk hi. Mahnaven khuicang tei thazaangin an tampi suaktik tuk hi.
5 Muantakmi thutheitu in thuman son hi, mahnaven muantak ngawlmi pa in zolthu ngeh hilh hi.
6 Mi pualthaute cu micip suak thei haw tukma hi, mahnaven micip ten baihno in thu cung haw hi.
7 Misil tei elkimah um pahsun, nangmah a zilh tuk imah nei haw ma hi.
8 I hangin micipte cip haw him? I him ka bawl tuk tihmi a theih haw hangin cip haw hi. I hangin misilte sil haw him? Kei thei ing hi tin, a ngaihsut cop haw hang hi.
9 Misil ten a sual haw ten imah kinmawh haw ma hi. Mahnaven mipha in ngaihthiam co tuk khi deih haw hi.
10 Na lungdamnak cu nangmata hi, na lungsiatnak vang nangmata hi, kuamah in kawm kha thei haw tukma hi.
11 Mipha ngawl pa i inn a siat ceng hei ten mipha pa i inn cu kho leng tuk hi.
12 Mi khenkhat tei lamdik tin, a ngaihsut haw mi cu a tawpnak ten thihnak hi.Ref 14:12 Thup 16:25;
13 Nuihnak aw in lungsiatnak aw cu khuh thei hi, mahnaven lungdamnak a bo ten thasiatnak cu tang leleng tuk hi.
14 Mipha ngawl ten a phat haw ngawlman ngah haw tuk a, mipha ten a phatman haw ngah haw tuk hi.
15 Misil ten a zak mi hempoh sang haw hi. Micipte in, a hawhnak haw kom zetin zo haw hi.
16 Micipte cu cingcaizet um haw in, phat ngawlnak khi pial haw hi, mahnaven misilin cingcai ngawlin manlang zetin bawl hi.
17 Mi thincomte cu silhah zetin thil bawl haw hi, mahnaven micip deuhte in thinsau deuhin um haw hi.
18 Misil ten silman silnak ngah haw tuk hi, micip ten cih man cihnak co haw tuk hi.
19 Mipha ngawlte cu mipha tei mai ah mitmaipha mu tukin kuunin hehpih ngen haw hi.
20 Mi ca-ngahte cu kuamah in, innnel tuk hei in nuam haw ma hi, mahnaven mihaupa cu ngualcam tampi nei hi.
21 Mi lungdammi na hi nuam tale mizawngte hehpihin hi. Midang imah simsial ngawl cu sualnak hi.
22 Phatnak tukin na nadek tale mi in muangin upat haw tuk hi. Mahnaven na pha ngawlnak nadek tale sualnak hi.
23 Nadeh ngengpi dek inna, cawm un thei tuk ci, khungthongin thuseh li cu zawnnak hi.
24 Micip ten neih le siah lamin hauhnak ngah thei haw hi. Misil ten silnak bek bawl thei haw hi.
25 Thudik son, thu theihpihtu in mi nunnak hup hi. Mahnaven zolthu sontu cu mi zuaktu hi.
26 Topa kihcaknak cu mai bulpak le innkua ah lungmuannak le himnak hi.
27 Thihnak pen suakca nuam cim? Topa kihcaknak cu nunnak ciktui hi.
28 Kumpipa i huham le thawm cu a ukmi mihing a tam le a dawm humah um hi. A ukmi mihing a umma tale phukthong hi.
29 Mengdenin, na um tale micip hi ci, mahnaven na thin a com tale na silnak langtik hi ci.
30 Lungdaihnakin pumpi damtik hi, mahnaven iksiknak cu khensa natnak bang hi.
31 Mizawngte na bawlsia tale mizawngte a bawltu Pathian nautat hi ci. Mahnaven mizawngte a hehpihtu cu Pathian biatu hi.
32 Mipha ngawlte cu amu bawlmi phat ngawlnakin siatnak henpih hi. Mahnaven miphate cu a diknak haw in, amuh hup hi.
33 Cihnak cu micip tei lungmu sungah umin, misil tei lungmu sungah umnak mun nei ma hi.
34 Diknakin miphun khaisangin, sualnakin miphun mualphotik hi.
35 Kumpipa in, ngi na zetin nadektu cu pahcawi a, mahnaven a ngi na ngawl nadektu cu dantat hi.