13
1 Capa cip cu a pan nun a hilh ten ngai hi, mahnaven mipualin sual ing hi tin ti awng ma hi.
2 Mipha cu a awnkam haw i ngah cu ei haw tuk hi. Mahnaven mizol theite cu phatngawlnak bek deih haw hi.
3 Na awnkam ngalling inna, na nunnak hup tuk hi. Ngalling ngawl a awntu in amah le mah siatsuah duncop hi.
4 Thazawng ten a deihzet haw mite ituk mahten ngah thei haw tukma hi. Lolin hantiamnak a neite cu a tuptahmi hempoh kim tuk hi.
5 Midik ten thuman ngawl hua haw hi. Mahnaven mipha ngawl tei awnkam cu zahcakhuai le ningdelhhuai mi hi.
6 Diknakin sualnak nei ngawlte hup hi. Phat ngawlnak cu misual tei bahnak hi.
7 Mi khenkhatte cu mihau bangin um haw hi, mahnaven imah nei haw ma hi. Mi khenkhat cu mi ca-ngah bangin um haw, mahnaven thil tampi nei haw hi.
8 Mihau ten a nunnak haw tatnak tukin sum man tuk nei haw hi, mahnaven mi ca-ngahte cu kuamah in thuum haw ma hi.
9 Midik tei vaknak cu vak saw cuangin, mipha ngawl tei meikhuat cu mit lelem hi.
10 Pualthaunakin haksatnak bek suaktik hi, midangte thu kuppih cu a cih sawdeuhnak hi.
11 Baihno in, na ngahmi hauhnak cu a ngei ngawlin paileh tuk hi. Haksa zetin, na lawhmi thil cu ngeipi phaat tuk hi.
12 Muansanmi ngah vut ngawl ten lungmu na hi, mahnaven tuptahmi a kim ten nunnak cu lungdamnak tuah dim hi.
13 Thuhilhnak imah a kinmawh ngawltu ten amuh le muh siatsuah cop haw tuk hi, nunhilhnak thu a zui mite himdam haw tuk hi.
14 Micip tei thuzilhnak cu nunnak ciktui hi, mahmi in, na nunnak cu thinsu linglawngnak mun pen suakca tukin bawm tuk hi.
15 Cihnakin upatnak ngah hi, mahnaven muantak ngawl mite cu siatnak lampi ah hawh haw hi.
16 Micipte cu na a deh haw laih ngawlin thu ngaisung haw hi, mahnaven misilin, a silnak haw phuanglet haw hi.
17 Muantak ngawl thu puatu ten haksatnak suaktik haw hi, mahnaven muantak mi kamtai ten lemdaihnak suaktik haw hi.
18 Hilhhawlnak a ngai nuam ngawl cu zawnnak le mualphonak co tuk hi. Mahnaven nunhilhnak a ngaitu cu upat co tuk hi.
19 Tuptahmi ngah hi izahta in pha him? Misilte cu phat ngawlnak pen kihleh tuk nuam haw ma hi.
20 Micipte tuah phialdun unna, micip suak tuk ci, misil na phial tale haksatnak tawk tuk ci.
21 Misual tei comi haksatnakin mun hempoh ah zui hi, mahnaven midikte cu phatnak laksawng co haw tuk hi.
22 Mipha ten a tu le ca tianin hauhnak lo le lam siah haw tuk hi, mahnaven misual tei hauhnak cu midik tei khut sungah heng tuk hi.
23 Bun awng ngawlmi lo ngamin mi ca-ngah pa i ca an tampi suak tuk naven mipha ngawl ten bun phal haw ma hi.
24 Na capa na dantat ma tale, amah a it ngawl hi ci. Na it tale hilhhawl tuk ci.
25 Midik ten an khamtham nei haw hi, mahnaven mipha ngawlte cu kumkhua in ngilkial haw hi.