12
1 Cihnak a deihtute in, a sual haw ten nun hilhnak deih haw hi. Nun hilhnak a huatu cu misil hi.
2 Topa in miphate cu pahcawi hi, mahnaven phatngawlnak tuah thu ngaisungtute cu kik hi.
3 Phatngawlnakin himdamnak pia ma hi. Mahnaven midikte cu khoh zetin ding haw hi.
4 Zi pha cu pasal i sui lukhu hi, mahnaven pasal hum a zahcaknak a piatu numei cu a nguh sung a khensa natnak vei tuah bangve hi.
5 Midikte cu thuman zetin miphial haw hi. Mipha ngawlte cu mizol tuk bek nuam haw hi.
6 Mipha ngawl tei awnkam cu mi thahnak thu hi, mahnaven midik tei awnkamin mi luan hi.
7 Mipha ngawlte cu thihnak tawkin cimit haw hi. Mahnaven midik tei innkua cu nung leng haw hi.
8 Micip na hi tale miten pahcawi haw tuk hi. Misil na hi tale miten zawnsak haw tuk hi.
9 Mai nunnak ca in, na a dek litu mi zalan cu, mi thupizet bangin umin ngilkial thuak sangin pha saw hi.
10 Mipha ten nganhing cingkhawi haw hi. Mahnaven mipha ngawl ten a nganhing haw hehpihnak nei haw ma hi.
11 Lobung milol pa in eih tuk an tampi nei hi, mahnaven nemcuamnak um ngawl mi na a humah huncan a botik litu cu misil hi.
12 Mipha ngawl tei nuammi cu thilpha ngawl deh tuk zei khi hi. Mahnaven miphate cu kho zetin dinglo haw hi.
13 Mipha ngawlte cu amu awnkamin amuh awkcop hi. Mahnaven miphate cu haksatnak pen amuhno suak thei haw hi.
14 Na hilhmi le nadehmi sung pen na laksawng um hi. Nangma dehnak bangin ngah tuk ci.
15 Misil ten kei dik ing hi tin ngaisung cop leleng haw hi. Micip ten ngaihsutnak piakmi ngai haw hi.
16 Misil ten a thinuknak manlangin langtik hi. Micip ten mitei zotsaknak hei thei ngawl bangin umsan haw hi.
17 Thudik na hilhnakin, dikcangnak langtik hi. Mahnaven zolthu in thu man ngawlnak lamah hawhpih hi.
18 Ngaihsutnak nei ngawl awnkam cu naam bangin thuk zetin maliamtik hi. Mahnaven micip tei awnkamin maliam damtik hi.
19 Zolthu i huncan cu comno hi, mahnaven thudik cu kumkhua in nung hi.
20 Phatngawlnak a ngaisungtu cu amah le mah a zolcop mi hi, mahnaven phatnak a bawltu cu lungdamnak co tuk hi.
21 Mipha tei lakah thilpha ngawl heng ma hi, mahnaven mipha ngawlte cu haksatnak bebek tawk haw hi.
22 Topa in zolthu sontu hua hi. Mahnaven midikte cu pahcawi hi.
23 Micip ten a thu theihmi haw selden haw hi. Mahnaven misilin, a silnak haw langtik haw hi.
24 Hantiam zetin nadehnakin uknak huham pia tuk hi. Thazawnnakin salin cangtik tuk hi.
25 Thinkhamnakin lungdamnak hawlvawk tuk hi, mahnaven itnak hehpihnak awnkamin, na lungnoptik hi.
26 Midik cu ngualcam tei lamhuaitu hi, mahnaven mipha ngawl pai lampi cu ngualcamte lampialtik hi.
27 Mi thazawng cu ituk mahten lungkim ni nei haw tukma hi. Mahnaven na hantiam tale thil manpha tampi ngah tuk ci.
28 Diknak cu nunnak lampi hi a, phatngawlnak cu thihnak lampi hi.