11
1 Cuai man ngawl a mangtute cu Topa in hua hi. Mahnaven cuai lung man humah a lungdam hi.
2 A tuangkhawng mite cu zotsaknak tawk haw tuk hi. Mah hangin niamkhiat a um pha saw hi.
3 Mipha pa cu diknakin lamhuai hi, muantak ngawlte cu amu dikngawlnakin amuh siatsuah cop hi.
4 Thihnak a hen ni ten hauhnak cu imah nemcuam ma hi, mahnaven diknakin, na nunnak luan thei hi.
5 Diknakin mipha pai nunnak noptik hi, mahnaven mipha ngawlte cu a phat ngawlnakin, a nunnak haw caksuktik hi.
6 Diknakin midikte luattik hi. Mahnaven muantak ngawlmi pa cu a hampumnakin amah awkcop hi.
7 Mipha ngawlpa a thih ten a muansanmi vang thi cih hi. Hauhnak a suangtu cu imah nemcuam ma hi.
8 Midikte cu haksatnak sung pen luatin, mipha ngawl tei lakah haksatnak heng hi.
9 Pathian a simsial ngawltu tei awnkamin mi siatsuah thei hi, mahnaven midik tei cihnakin mi luan thei hi.
10 Midik ten kamphatnak a tawh haw ten khuapihte lungdam haw hi. Mipha ngawl tei a thih haw ten lungdamin au haw hi.
11 Midik ten thupha a piak haw ten khua cu khangto hi. Mahnaven mipha ngawl tei awnkamin khuapi cu siatsuah hi.
12 Mi zotsaknak awnkam a mangtu cu misil hi. Micip na hi tale na awn suupin hi.
13 Kamtam ten thu kuh phuang thei haw hi. Mahnaven mi muantak ten sel thiam haw hi.
14 Lamhoihnak a umma tale ngam cu sia hi. Ngaihsutnak pha piatu a tamnakah humhimnak um hi.
15 Na theih awng ngawlmi pai leibat piak sak tukin thu na tiam tale siklehzet tuk ci. Na tel ma an nangma ca in pha saw hi.
16 Mi hehpih theitu numei cu upat tak hi. Mahnaven ngamtat pha ngawl numei cu zahcakhuai hi.
Mi thazawngpa cu sum nei awng tukma hi. Mahnaven mi ngeikheizette cu hau haw tuk hi.
17 Mi hehpih thiam na hi tale nangmah le mah mitmai pha pia cop ci. Mi hehpihnak na nei ma tale nangmah le mah siatsuah cop hi ci.
18 Mipha ngawl ten nemcuamnak ngangai tawk thei haw ma hi. Mahnaven thil man na bawl tale laksawng piak co tatak tuk ci.
19 Phatnak bawl tukin a ngaisungtu pawpoh cu nung tuk hi. Mahnaven phat ngawlnak a bawl lelengtu cu thi tuk hi.
20 Topa in lungmu pha ngawlte hua hi. Mahnaven thuman a bawltu cu it hi.
21 Mipha ngawlte bawlsiat tawk tuk cu thungai hi. Mahnaven midikte cu luat haw tuk hi.
22 A diang hialhual hei in thu ngaihsut thiamnak a nei ngawlmi numei cu vok naalah sui khaih tuah bangve hi.
23 Mipha tei deihnak cu phatnak suaktik hi. Mipha ngawl ten a deihmi haw a ngah haw ten mi hempoh thinuktik haw hi.
24 Mi khenkhat cu phal zetin, a sum mang haw naven hau dedeuh haw hi. A khenkhat cu cingcai zetin mang haw naven zawng dedeuh haw hi.
25 Phal zetin nungin hau tuk ci, midang bawm inna, bawmleh bok haw tuk hi.
26 Aman kai deuh ngakin an zuak a phal ngawlte cu mipi ten tam haw tuk hi. Mahnaven a zuak phaltu cu mipi in pahcawi haw tuk hi.
27 Na tuptahmi a pha tale upatnak co tuk ci. Mahnaven haksatnak na zei tale haksatnak ngah tuk ci.
28 Hauhnak a suangtute cu khuakhal hun a thingceh bangin zuk haw tuk hi. Mahnaven midikte cu ceh dawn bangin khang haw tuk hi.
29 A innkua ah haksatnak a hengtiktu cu a tawpnak ten imah nei tukma hi.
Misilte cu micip tei nadehsaktu hi leleng haw tuk hi.
30 Diknak i ngah cu nunnak hi. Mahnaven phatngawlnakin nunnak cu paitik thei hi.
31 Mipha ten leihumah a phatman a ngah haw tale, Mipha ngawl le misual ten bawlsiatnak thuak haw tuk tih cu ciangzet hi.Ref 11:31 1Pet 4:18;