FILEMON
Lakah Paul i Laikuat
(Paul’s Letter to Philemon)
Thulamsial
Filemon cu muantak zetmi Khristian pa khat hi. Kolose pawlpi sungtel le Onesimas tihmi sal neitu hei hi bok hi. Onesimas cu a neitu a pu Filemon lak pen tai in, thawnginn sung pen Paul tuah tawkdun haw hi. Paul hangin Onesimas cu Khristian suak hi. Hi laikuat hi Filemon lakah Paul i laikuat kik lehmi, a salpa tuah lemleh thei tuk ngenin, ngaihthiammi salpa dinmunah a santuk bek sial ngawlin, Khristian unau pa khat i dinmunah santheihnak tukin a ngetsaknak lai hi.
1
1 Khrih Jesuh hangin thawngta mi keimah Paul le a unau uh Timote ten a ngualcam uh le ka nadehpih uh Filemon le,
2 na inn a khawmmi, Khristian unau, a celnu uh Apfia le a ngalkap pih uh Arkhippas lakah laikuat ung hi.Ref 1:2 Kol 4:17;
3 Pa Pathian le Topa Jesuh Khrih in hehpihnak le lemdaihnak thupha pia tahen.
Filemon i Itnak le Upnak
4 Ka unau Filemon, thu ka nget sial ten phawkin, Pathian nelah lungdamnak thu hilh leleng ing.
5 Itahim titale, Pathian mihingte na itnak le Topa Jesuh na upnak thu za ing.
6 Ka thungetmi cu Khrih tuah a pehzomnak uh hangin a co uhmi muicu thupha cu, thu umtu hihnak hangin, a pawlkomnak uh pen a sullam thuk saw deuhin, na theihnak tuk uhin hi.
7 Itmi unau pa, itnak na neihmi in lungdamnak zaangtha tampi pia in, Pathian mihingte a venghawng haw in, a lung haw noptik khawng hi.
Onesimas Ca In Ngetnak
8 Pathian mihing tei humah itnak na neih hangin le Khrih sungah na unau ka hih hangin, na bawl tukmi hi tin ka ngaihsut mite ngalpha zetin ka hilh tukmi naven, hilh tuk mang.
9 Itahim titale itnak na humah ka neih hangin a kutlamin kuun saw ing. Khrih Jesuh i kamtai, tulaihtakin thawng a tami keimah Paul in,
10 Onesimasa 1:10 Onesimas: tihmi hi Grik min hi, ‘Man takmi’ tihnak hi. ai-awhin ngen ing. Amah cu Khrih sungah ka capa ngangai hi. Itahim titale thawnginn sung pen hawvang lamah a pa ah cang ing.Ref 1:10 Kol 4:9;
11 Ni dang laihin nangma ca in muantakin, man theihmi kha ma hi. Mahnaven atu-in nangmah le keima ca in muantakzet zo hi.
12 Atu-in amah cu ka itnak tuah na lakah kuat ing. Keima pumpi bang loli ngaisungin, hahkik ing hi.
13 Thuthangpha hangin thawnginn sungah ka um laihtakin, nangma ai-in keimah cingkhawi tukin amah cu ka lakah um hih tukin deih ing.
14 Mahnaven umtik tuk mang. Itahim titale na awi ngawlpi, bawmin tih tuk nuam mang hi. Na lungmu thatho zetin le nangma thinthawhin, na bawl tuk khi deih ing. Mah hangin na lungkim ngawlmi imah bawl tuk mang hi.
15 Onesimas tuah hun comno sung na khendun uhmi hi khendunleh ngawltohin, kumkhua na um kawm theihnak tuk uh hi ol hi.
16 Atu-in sila hi tih tuk hi lehma toh hi. Sila hi ngawltohin, Khrih sungah itmi unau hi zo hi. Ka ca in manpha zetmi hi. Nangmah vangin sila a hih bek hi ngawlin Topa sungah unau a hih zo hangin deih sesem tuk ci.
17 Mah hangin keimah hi na nadehpih hi tin na ngaisung tale keimah na vaimuah uh bang bokin amah vang vaimuak bok le ci tih deih ing.
18 Na bawl sualmi le leibat nei ahi tale keima lohleh tukin koihin hi.
19 “Keimah Paul in lohsak khawng tung hi,” tih thu keima khut loli tuah nganin kuat ing. Tu a, na nunnak hi keimah hangin hi, tih cu hilh kul tukma tin ngaisung ing.
20 Mah hangin ka naupa aw, Topa hangin hi ka ngetmi hi bawlsakin hi. Khrih sungah unau suak khat a hih uh bangin ka thinkimtik zalin hi.
21 Hi lai ka ngat laihin, ka ngetmi bawl tuk ci tin um ing. Ka ngetmi sangin tam saw bawl tuk ci tih thei ing.
22 Mah i humah inndat pa khat vang koihsak hamin hi. Itahim titale Pathian in, na venghawng uh i thungetnak cu sangin, nangmu lakah hengtik leng tuk hi tin muansannak nei ing.
Thukhupnak le Nuksatnak
23 Khrih Jesuh hangin keimah tuah thawng a tami Epafras in nuksat hi.Ref 1:23 Kol 1:7; 4:12;
24 Mahten ka nadehpih Marka le Aristarkas, Demas le Luka vangin nuksat bok haw hi.Ref 1:24 Nung 12:12, 25; 13:13; 15:37-39; Kol 4:10, 14; 2Tim 4:10, 11;
25 Topa Jesuh Khrih i hehpihnak thupha cu nangmu venghawng humah um tahen.