HEBRU
Khristian Tei Lakah Laikuat
(The Letter to the Hebrews)
Thulamsial
Hebru Khristian tei lakah laikuat hi dodalnak a tawklitu Khristian tei lakah a upnak haw tawpsanleh thong haw kawn tih lauthawngnak hangin a kuatmi hi. Hi laikuat ngantu pa in, a upnak haw thapia in, Jesuh Khrih cu thutak hi tih le dawlbel Pathian phuandunnak hi tih thu hilh hi. Mah a hilhnakah thutak langtiknak pa thum umin:
(1) Jesuh cu Pathian i Capa kumkhua nung hi a, haksat thuaknak tuah a Pa i thuzuitu hi. Pathian i Capa a hih bangin Jesuh cu thutiam lun sung a, profette, vancungmite le Moses sang hei in cuangcung saw hi.
(2) Jesuh cu thutiam lun sung a, thiampi hempoh tei humah kumkhua thiampi hi tukin Pathian in phuang zo hi.
(3) Jesuh hangin thu umtute cu thihnak, launak le sualnak pen nunpat hi zo haw toh hi. Jesuh cu Thiampi Sangbel a hih bangin Hebru tei biaknakte le nganhing tuah biakpiaknakin, a pianzia lim bek a langtik haw mi nunpatnak tatak a piatu hi.
A ngeng 11 sungah Israel tei tangthu sung a, mi minthang tei upnak thu ngan hi. Hi thu hilh thahin, hi laingantu in laisialtu ten amu dinmunah muantakzet ding tukin hehpih kun hi. A ngeng 12 ah ni dawlbel tian muantak hi leleng tukin so a, itih bang zah tian haksatnak le thuaknak a heng vangin Jesuh Khrih bek muang tukin hilh hi. A laikuat cu ngaihsutnak le ngallin piaknak tuah tawptik hi.
1
A Capa Tawnin Pathian Awnkam
1 Tanglaihin Pathian in, a pu le pa tei lakah profette mangin vei tampi in thuhilh hi.
2 Mahnaven hun dawllam ten ohtei lakah a Capa tawnin hilh hi. A Capa tawnin lei le van bawlin a dawlbel ten ihempoh nei khawngtu tukin teng hi.
3 Amah cu Pathian sunloihnak langtiktu hi a, Pathian bang cikcek hi. Huham a neihmi thu tuah lei le van pumpi cu umtikin, cingkhawi hi. Mihing tei sualnak ngaidam le sual a thiantik ceng ten vanhum a Cungnungbel Pathian taklamah khung hi.
Pathian Capa i Thawmngengnak
4 Pathian in, a capa lakah min a piakmi cu vancungmi tei min sangin a ngeng saw mi a hih bangin vancungmite sangin cungnung saw in bawl hi.
5 Itahim titale Pathian in itih bang vancungmi hihen,
“Nang cu ka Capa ci,
tuni in,
na Pa ah cang zo ing”
ti awng ma hi.
Mah humah i bang vancungmi hei hihen,
“Kei cu a Pa hi tung a,
amah cu
ka Capa hi tuk hi,”
tin ti awng ma hi.Ref 1:5 Saam 2:7; 2Sam 7:14; 1Khang 17:13;
6 Mahnaven Pathian in, a catawntil lei humah a tiik ten,
“Pathian i vancungmi hempoh ten,
amah cu bia haw tuk,”
ti hi.Ref 1:6 Daan 32:43;
7 Mahnaven vancungmi tei thu ah,
“Pathian in, a vancungmite cu
huihah bawlin, a nadektute cu
mei alhin bawl,” ti hi.Ref 1:7 Saam 104:4;
8 Mahten a Capa i thu ah Pathian in,
“Nangmah cu Pathian ci,
na kumpi khunnak cu
kumkhua in kho tuk hi!Ref 1:8-9 Saam 45:6-7;
9 A dikmi cu deihin,
a khialmi cu hua ci.
Mah hangin ven Pathian,
na Pathian in teng zo hi.
Na ngualcam tei lak a piakmi
sangin a ngeng saw cuangmi
upat lungdamnak pia hi,”
ti hi.
10 “Mahten Topa nangmah in,
a pattungin leipi bawlin,
na khut loli tuah van bawl ci.Ref 1:10-12 Saam 102:25-27;
11 Mahte cu lalthong khawng
haw tuk naven nang cu
a bangleng tuk ci.
Amuh cu puan bangin
sia haw tuk hi.
12 Puan bangin hep tuk ci a,
silh le cen bangin
thekdun khawng haw tuk hi.
Mahnaven nang cu
a banglengin, na nunnak cu
bo tih umma,” ti hi.
13 Pathian in, a vancungmi lakah,
“Na ngalte na ke nuai ah
ka koih laklawh
ka taklamah khungin hi,”
tin ti awng ma hi.Ref 1:13 Saam 110:1;
14 Mah ahi tale vancungmite cu akua hum? Amuhte cu Pa i nadektu hawvang hi haw in, nunpatnak a ngahnak tuk bawmtu tukin Pathian i nadektute haw hi.