4
Khristian Nundan
1 Khrih cu a tisa in haksatnak a thuak hangin nangmuh vang ama lungmu bang nei in, na zaangtha uh khohtik un. Itahim titale tisa haksatnak a thuaktu cu sualnak sungah telleh ma zo hi.
2 Mah hangin tu pepan leihum nunnak huncan na neih sung uh hempoh mihing deihnak hi ngawlin, Pathian deihnakin uk hen.
3 Pathian umngawltu tei bawl tuk a nuam haw mi cu huncan tawkmoh sung bawlbok zo uh ci. Na nunnak uh cu zoh mawi ngawl nunnak, tisa deihnak le zukham silnak, nunnopin nupa sualnak, ei le in tuah puai bawl nopnak le ningdelhhuai milim biaknakah mang zo uh ci.
4 Atu cu Pathian thu umngawltu tei, supnak imah nei ngawlin a nunnak hawah na tualtelleh uh ngawl ten nangmu humah lamdangsa in zawnsak haw hi.
5 Mahnaven amuhte cu a nungmi hihen, a thi mi hihen thukhentu Pathian mai ah a nundan haw phuang copleh haw tuk hi.
6 Mah hangin mithi tei lakah Thuthangpha a phuannak cu! Amuhte vang midangte bangin a nun haw laihin thukhennak tawk zo haw hi. Mahten amuh tei lakah Thuthangpha phuan a hihnak cu Hawvang nunah Pathian bangin nung thei bok tukin hi.
Pathian Laksawng Kemtu Pha
7 Ihempoh ca in hun dawlbel ni heng awndiak toh a hih hangin phazetno in thu na nget theihnak tukin supnak nei in, lungmu cihnak tuah um un.
8 Ihdunnakin sualnak venghawng khuh khawng thei a hih ten lungmu tak tuah pa khat le pa khat ihdun tuk khi ngaisung sawta un.Ref 4:8 Thup 10:12;
9 Phuciak li ngawl saw in, na inn uhah pa khat le pa khat zintung duntik un.
10 Pathian laksawng dadang kemtu pha na hih uh bangin ama lak pen na ngah uhmi laksawng cu midang tei phatnak tukin mang bok un.
11 Ihempoh humah Pathian in Jesuh Khrih hangin thangphatnak a ngah theihnak tukin thusontu ten Pathian i thu son unna, nadektu ten Pathian piakmi thazaang tuah dek un hi. Sunloihnak le huham hempoh cu kumkhua in amata hi. Amen.
Khristian Tei Thuak Theihnak
12 Ka ihmi ngualcamte aw, a haksa zetmi thiatha zohnak na thuak uh hangin amthongin um pahsuh un, kuamah i tawh awng ngawlmi eimu humah heng hi, tin ngaisung pahsuh un.
13 Khrih i thuaknak a thuakmi na hih uh hangin lungdam saw un hi; mahtibang na bawl uh tale, a sunloihnak a lang ten nohte cu lungdamnak tuah dim tuk uh ci.
14 Khrih nungzuitu na hihnak uh hangin miten a zawnsak haw tale na lungdam un; Itahim titale Hawvang sunglawi, Pathian Hawvang cu nangmu humah um tihnak hi.
15 Nangmu lak pen pa kha khatin haksatnak a thuak tale, mithat le nguca a hih hangin, daan palcat a hih hangin le midang tei thu ah a tokpil hangin thuak hi ma hen.
16 Khristian na hihnak uh hangin na thuak uh tale zakca viang pahsuh un. Khrih i minpuatu na hih uh hangin, na thuaknak uh cu Pathian nelah lungdam saw un.
17 Thukhennak a pat hun heng zo hi. Pathian i mihing ten thukhennak tawk masa haw tuk hi. Mahti bangin eimu humah a heng masa tale Pathian Thuthangpha a umngawltu cu itin tawpleh haw tuk him?
18 Lai Thiangtho i hilhmi bangin,
“Mipha tei ca hei in nunpatnak
ngah tuk baih ma hi;
Mah ahi tale Pathian bia ngawl
misual cu i cangleh
haw tuk him?”Ref 4:18 Thup 11:31;
19 Mah hangin Pathian tuptahnak bangkekin haksatnak a thuaktu ten na pha a bawlnak haw hangin Pathian nelah ihempoh ap khawng haw tahen; Pathian cu amuh bawltu hi a, a thutep pelh awng ma hi.