3
Zite le Pasalte
1 Mahti bang bokin zite aw na pasal tei thu ngai un. Pathian umngawltu ahi vangin nangmu ngamtat phatnakin thu umtu ah cangleh tuk hi. Kam khatno hei na ot uh kul tukma hi.Ref 3:1 Efe 5:22; Kol 3:18;
2 Itahim titale, na ngamtat phatnak uh le na lungmu uh a thiang dan amuh haw ten upat tak zetin mu haw tuk hi.
3 A pualam mawinak, sam na bawldan uh, sui le ngun, suang manpha tuah na thuamdun dan uhte le na nikcen puansilh dan uhte tuah mawinak zei pahsuh un.Ref 3:3 1Tim 2:9;
4 Pathian i mitmai pen a sunglawibel mi mawinak ngangai cu nangmuh tei lungmu sung a ummi a bo thei ngawl thinnemnak le lungdaihnak saw khi hi.
5 Ni dang laih a Pathian kihcatu numei ten Pathian nelah muansannak a neitu tei mawinak cu a pasal tei thu a ngaihnak haw khi hi.
6 Sarah cu mahtibang numei hi in, Abraham cu upatin, “Ka bawipa” tin sam hi; nangmuhte vang na pha bawlin, laumi imah nei ngawlin na um uh tale Sarah i canute hi tuk uh ci.Ref 3:6 Pian 18:12;
7 Mahtibang bok kekin pasalte aw na zi uhte cu nangmuhte sangin thanem saw mi haw tih khi theitum un. Nangmuhte bang bokin Pathian i nunnak laksawng co bok tukmi haw hi. Mah hangin upatnak tuah tuamlawm un hi. Mahti bangin na um uh tale na thungetnak uh cu imah in siatsuah zo tukma hi.Ref 3:7 Efe 5:25; Kol 3:19;
Dikcangnak Hangin Thuaknak
8 A dawlbelnakin ka sosuah nuammi cu ngaihsutnak munkhat le lungmu munkhatno in um un; unau bangin pa khat le pa khat itdun unna, pa khat le pa khat hehpih dunnak nei in, lungnem un.
9 Phat ngawlnak cu phat ngawlnak tuah lulleh pahsuh unna, tamsiatnak tuah lulleh ngawlin le thupha muicu tuah lulleh saw un hi. Itahim titale Pathian in, a sam ten thupha muicu piatu tukin a sammi hi.
10 Lai Thiangtho sungah,
“Nunnop zetin anung nuamtu le
nisuah pha
a mu nuamtu in awn sia in,
a ot tuk khi
sup henna, zolthu sonleh
toh pahsuh hen.Ref 3:10-12 Saam 34:12-15;
11 A pha ngawlmite zamsanin
phatnak bawl hen,
a lungmu venghawngin
lemdaihnak ca in dek hen,
12 Itahim titale Topa in
midikte cu phazetno zo in,
a thungetnak haw theihpih hi.
Mahnaven thilpha ngawl
a bawltu cu langpang,” ti hi.
13 Na pha bawl a nuammi na hi tale, akua in haksatnak pia li tuk him?
14 Thilpha na bawlnak hangin haksatnak na tawk ahi tale itizah takin mi lungdam hi tuk cim? Mah hangin i mamah lau pahsun na, na lungkham pahsun hi.Ref 3:14-15 Mt 5:10; Isa 8:12-13;
15 Na lungmu uhin Khrih cu kihca unna, Topa hi tin upat un, nangmu lungmu sung a na pom uh mite thu a dongtu pa kha khat a um haw tale, a dotmi donleh paih thei tukin ngallingsa in um leleng un.
16 A thudotmi haw na donleh uhten nemnak le upatnak tuah don un: lungmu thiangzetno in um un; mahtibang na um uh tale, Khrih zuitu na hih uh bang bokin, na ngamtat ziaza uh cu miten a sonsia haw hei in, na ngamtat dan uh pha hi tih khi amuh haw ten amuh lehlam zakca haw tuk hi.
17 Na pha ngawl bawlnak hangin haksatnak na thuak tuk sangin Pathian i lungkimmi ahi tale, na pha bawlnak hangin haksatnak thuak cu pha saw hi.
18 Itahim titale mihing tei sualnak hangin Khrih cu kumkhua phaat thihnak thuak hi; nangmuhte Pathian nelah hen tukin mipha pa cu misual tei ai-in thi hi. A tisa in thihnak thuak naven Hawvangin nunglehtik hi.
19 Hitih bangin Hawvang a nungleh a hih hangin, hawvang thawngta mitei lakah hawhin thu hilh hi.
20 Mahti bang a hilhmi hawvangte cu Noah tinbaw bawl laih khin Pathian in thinsau zetin ngak naven thu a ngai nuam ngawl mite haw hi. Tinbaw sungah a tumtute cu mi dawmno haw hi. A venghawngin mihing liat bek haw hi. A muhte cu tui sung pen nunpatmi haw hi.Ref 3:20 Pian 6:1-7:24;
21 Mahmi cu atu-in nangmuh nunpantu tuiphumnak i lim laktu hi. Hi tuiphumnak cu nangmu taksa pumpi a ninmi somnak tuk hi ngawlin, a sia le pha khenkhuainak lungmu thiang tuah Pathian nelah thutiam bawl na hi saw hi. Jesuh Khrih thawhlehnak hangin tuiphumnakin nangmuh nunpan hi.
22 Amah cu vancungah kai in, Pathian taklamah khung hi. Vancungmi hempoh le van a thuneihnak le huham hempoh humah thuneitu hi.