9
Kaltan Puai Vei Nihnak
1 Topa in Moses lakah, Izipt ngam pen Israel mite a tul nung haw, a kum nihnak ha masabelin, Sinai phillawnah hi bangin hilh hi.Ref 9:1-5 Suah 12:1-13;
2 “Israel miten kaltan puai cu a hun kim sial ten na bawl haw hen hi.
3 Hih ha, ni sawm le ni nih ni, ni tum bek ten bawl tuk tih le zui tuk tihmi daan hempoh bangin bawl haw hen,” ti hi.
4 Mah hangin Moses in Kaltan Puai bawl tuk cu hilhin,
5 a hilh bangin ha masabel ni sawm le ni linak taklamin Sinai phillawnah bawl haw hi. Topa in Moses lakah thu a piak bangin Israel miten na bawl khawng haw hi.
6 Mahnaven mi khenkhat cu miluang a zen haw hangin, mi thiangtho ngawl hi haw a, mah ni kaltan puai ah tel thei haw ma hi. Mah hangin Moses le Aaron lakah hawh haw in,
7 “Miluang ka zen uh hangin kohte cu mi thiangtho ngawl hi ung. Mahnaven Israel miten Topa i lakah biakpiaknak a bawl haw ten tel thei tuk ngawlin, i kaw a kham tu?” tin dong haw hi.
8 Moses in, “Noh tei ca in Topa i thupiakmi ka ngah laklawh cu ngak hih un,” ti hi.
9 Topa in Israel mite than tukin Moses lakah,
10 “Amuh hei hihen a casuante hei hihen, miluang a zen haw hangin mi thiangtho ngawl a hih haw ten hei hihen, khual a zin haw ten hihen, Kaltan Puai a mang nuam leleng haw ahi tale,
11 ha nihnak ni sawm le ni li ni, taklam khuathim bek ten mang thei bok haw tuk hi. Mah puai cu naman hel ngawl cangho le cangkha ceh tuah bawl haw tuk hi.
12 A ngawh haw mi tuu i nguh cu pa khat hei ektuah ngawlin an cu a zing tian kham bang nei haw tukma hi. Kaltan Puai cu zui tuk tihmi daan bangin cang haw tuk hi.Ref 9:12 Suah 12:46; Jn 19:36;
13 Mahnaven a thianglim mi pa kha khat khual hei zin ngawl na pi in, kaltan puai a bawlma tale, amah cu ka hinnam sungah sialcih hi tukma toh hi. Itahim titale a hun ten ka lakah biakpiaknak a bawl ngawl hangin hi. A sualman cu amah in thuak tuk hi.
14 “Amu lak a, um hindang ten kaltan puai bawl nuam bok haw ahi tale bawl tuk le zui tukmi daan cu bangten hi, Israel mi hihen, ngamdangmi hihen, a zui haw tukmi daan cu bangve hi,” tin ti hi.
Meingo Al
(Suah 40:34-38)
15-16 Topa i umnak Puanbuk a dintik ni haw in, meingo zamin, Puanbuk cu khuh khawng hi. Meingo cu zankhua mei alh bangin al hi.
17 Meingo a thawn bek ten Israel tei a ngiahnak mun cu thawn bok haw in, meingo zam a colh bek ten, a ngiahnak mun haw satleh haw hi.
18 Topa i thupiaknak bangin Israel mite cu a ngiahnak haw thawnin, a thupiakmi bangin, saleh haw hi. Puanbuk hum a, meingo a zam sung hempoh cu a ngiahbuk hawah cam haw hi.
19 Meingo cu hun ngeipi thawn ngawlin a um ten, Topa i deihnak zui in, thawn ngawl um bok haw hi.
20 Vei kha khat ten Puanbuk humah ni demno sung bek meingo a zam hei ten, Topa i thupiak bangin a ngiahnak munah hun demno sung bek umin, thawn bok haw a, Topa i thupiaknak bangin zui haw hi.
21 Vei kha khat cu khuathim pepan zinglam tian bek meingo zamin, mah meingo a thawn bek ten thawn bok haw hi. Sun le zan ti ngawlin meingo a thawn sial ten, a ngiahnak haw cu thawn bok haw hi.
22 Ni nih hihen, ha khat hihen, ahimata kum khat sung hei hihen puanbuk hum a meingo zam sung hempoh cu thawn haw ma hi, mahnaven meingo a thawn bek ten thawn bok haw hi.
23 Topa in Moses mangin, thu a piak mite cu a zui haw hangin ngiahnak sa pepel haw hi.