8
Meivaknak Koih Haw
1 Topa in Moses lakah,Ref 8:1-4 Suah 25:31-40; 37:17-24;
2 “Aaron lakah hilh inna, meivaknak khuamah meivak salih a vak ten mailam al tukin vak hen,” ti hi.
3 A tih bangin Aaron in zui in meivaknak khuam i mailam al tukin mei cu vak hi.
4 Mah meivaknak khuam cu Topa in Moses lakah a lak zo bangin a lek pen a bul tian seekmi sui tuah bawlmi hi.
Levi Mite Thianthohtiknak
5 Topa in Moses lakah,
6 “Levi mite cu Israel mipi tei lak pen a dangno in koih inna, hi bangin thiangthotikin hi.
7 A thianthoh hawnak tukin tui theh inna, a pumpicing haw in mul a meh nungten, a van sawp henna, mahten thiangtho haw tuk hi.
8 Levi miten khuicangno pa khat le an tuah biakpiaknak tukin a kulmi olif situi tuan cawhhelmi cangho vam hunpih haw tuk hi; mahten nangin sualhah biakpiaknak tukin a dang khuicang pa khat hunpihin hi.
9 Israel mipi cu hulawmtik inna, Levi mite cu ka umnak Puanbuk maiah hung haw hen.
10 Israel mipi ten Levi mitei lu humah a khut haw nga haw tuk a,
11 ka nadehnak tukin Aaron in ka lakah ap tuk hi. Israel tei lak pen a dangno in, a cuampeng apmi hi haw tuk hi.
12 Levi miten khuicang pa nih tei lu humah khutsuan haw tuk hi. Levi mite thianthohnak tukin khuicang pa khat sualhah biakpiaknak tukin piak hi tuk a, adang pa khat cu halkang biakpiaknak tukin piak hi tuk hi.
13 “Levi mite cu a cuampengno in, dan inna, ka lakah pia inna, amuh puitu tukin Aaron le a capate na koihin hi.
14 Levi mite cu Israel mipi lak pen a dangno in koih inna, kei ma mihing hi haw tuk hi.
15 Levi mite mahtih bangin na thianthohtik nungten le na ap nungten Puanbuk sung a, nadek tukin tak haw tuk hi.
16 Israel hinnam tei capa tawntil hempoh ai-in ka hamsa mi hi haw a, keima bulta hi haw hi.
17 Izipt ngam a, Izipt catawntil hempoh ka thihtik ten, Israel tei catawntil hempoh le a ngan tei catawntil hempoh cu keimahta hi tukin, ka thianthohtikmi hi haw hi.Ref 8:17 Suah 13:2;
18 Israel mi catawntil hempoh ai-in, Levi mite cu ka lakmi hi haw hi.
19 Puanbuk a, nadek tukin le Mun Thiangtho ah Israel mite a hun haw ten, thihnak a tawh ngawlnak haw tukin cingkhawitu in amuh cu Aaron le a capa tei lakah pia ing. Mah hum pen amuh cu Israel tei lak pen a cuampengin ka lakah apmi hi tukin ka tenmi hi haw,” ti hi.
20 Mah hangin Topa in Moses lakah thu a piak bangin Moses le Aaron le Israel mi hempohin Levi mite cu Pathian nelah pia haw hi.
21 Levi mite cu thianthohnak bawlin, a vante sawp haw a, Aaron in, Topa i lakah laksawng cuampengin amuh cu pia hi. Amuh tei ca in thianthoh biakpiaknak vang bawlsak hi.
22 Levi mite cu Aaron le a capa tei umnak Puanbuk sung a, nadek tukin a tingmi in suak haw hi. Topa in Levi mitei humah bawl tukin thu a piak bangin, mipi ten bawl khawng haw hi.
23 Topa in Moses lakah,
24 “Levi mite cu ka umnak Puanbukah kum sawm nih le kum nga a kim haw ten, nadeh pan haw tuk a,
25 Kum sawm nga a kim haw ten cawl haw tuk hi.
26 Mahnung ten a nuam haw tale Puanbuk sung a, nadektu cu a ngualcam pihte bawm thei haw tuk hi. Amuhno in, nadek haw ma toh hi. Mahti bangin Levi mitei nadehnak cu vaisiam sakin hi,” ti hi.