10
Ngun Pengkulte
1 Topa in Moses lakah,
2 “Pummei tuah sukmi ngun pengkul pa nih bawl inna, Israel mite hulawm tuk samnakin le ngiahnak thawn tukin thuthannakin mangin hi.
3 Pengkul pa nih ngeizet a tum haw ten, mipi cu a venghawng haw in ka umnak puanbuk tumnak kongka ah khawmdun haw tuk hi.
4 Mahnaven pengkul pa khat bek a tum haw tale, a hin ten haw a, hotu bek na lakah hung haw tuk hi.
5 nasezet le comno in pengkul a tum haw ten, nisuahnak lam a, ngiakmi hin thawn haw tuk hi.
6 Mahti bang lelengin, a vei nihnak a tum haw tale, hanglam a ngiakmi hinte thawn haw tuk hi. Mah hangin ngiahnak thawn tukin nasezet le comno in pengkul tum haw hen na,
7 mipi khawm tukin ngeizet tum haw tuk hi.
8 Pengkul cu Aaron i capa thiampite bekin tum haw tuk hi.
“A nuailam a daan hi mailam a, na casuante tian, a zui haw tukmi hi.
9 Na ngamsung uh a, nangmuh zuanin, a simtu ngal na doleh uhten, hi pengkul hi ngaldo pengkul tumin hi. Topa na Pathian keimah in bawm tung a, na ngal tei khut pen nohte cu pan tung hi.
10 lungdam hun a, Ha Thak Puai le na biaknak uh puaite ah hihen, halkang biakpiaknak le lemnak biaknak na bawl uhten hihen, hi pengkul cu tum un hi. Nohte bawm tung hi. Keimah cu Topa na Pathian uh ing,” ti hi.
Israel Mite Ngiahbuk Thawn Haw
11 Israel mite Izipt ngam pen a tul nung haw, kum nihnak, a ha nihnak, ni sawm nih ni-in, Topa i umnak puanbuk hum a, meingo cu thawnin,
12 Israel mite cu Sinai phillawn pan tul haw hi. Paran phillawn a hen ten meingo cu cawl hi.
13 Moses lak a, Topa i thupiakmi bangin Israel mite cu thawn haw hi.
14 Ngiahnak a thawn sial haw ten Judah alan nuai a, um hempoh masabelin hawh haw hi; Judah hin hotu cu Amminadab capa Nahshon hi.
15 Issakhar hin tei hotu cu Zuar i capa Nethanel hi,
16 Zebulun hin tei hotu cu Helon i capa Eliab hi.
17 Puanbuk cu phelet haw a, Gershon le Merari hin ten pua haw a, midang bangin tul bok haw hi.
18 Mah nungten Reuben alan nuai a, ummi hawh haw hi. Reuben hin tei hotu cu Shedeur i capa Elizur hi.
19 Simeon hin hotu cu Zurishaddai i capa Shelumiel hi.
20 Gad hin hotu cu Deuel i capa Eliasaf hi.
21 Kohath hin, na thiangtho a puatu cu tul bok haw in, ngiahbuk suumnak a hen haw ten Puanbuk cu saksa in, na um zo hi,
22 Mahceng ten Efraim alan nuai a, um hawh haw hi. Efraim hin tei hotu cu Ammihud i capa Elishama hi,
23 Manasseh hin hotu cu Pedahzur i capa Gamaliel hi,
24 Benjamin hin hotu cu Gideon i capa Abidan hi.
25 Nungdawlbelin, Dan alan nuai a, ummi cu nunglam ngal cingtu in ahon, ahonin hawh haw hi. Dan hin tei hotu cu Ammishaddai i capa Ahiezer hi.
26 Asher hin hotu cu Okhran i capa Pagiel hi,
27 Naftali hin tei hotu cu Enan i capa Ahira hi.
28 Israel mite a ngiahnak haw thawnin, ahon ahonin hawh haw hi.
29 Moses in Midian mi a pu Reuel i capa, a zi i ningpa, Hobab lakah, “ Topa in pia tung hi tin, a tepmi ngamah hawh tuk hung. Topa in Israel mi cu nei nung zetin bawl tung hi, tin kam zo hi, mah hangin keimu lakah hung bok inna, ka hauhnak uh kawm bok tuk ung hi,” tin don hi.
30 Hobab in, “Hung tuk mang; ka ngam le ka miphun tei lakah kik saw tung hi,” tin don hi.
31 Moses in, “Kohte zamsan zal pahsun. Ngamkhing ka hen uhten ngiahnak mun pha nei saw tuk ci. Mah hangin keimah pui theitu hi tuk ci.
32 Ka lak uhah na hung tale Topa i piakmi muicu hempoh cu nangmah tuah kawmdun tuk hung,” ti hi.
Mipite Hawh Haw
33 Israel mipi cu mual thiangtho Sinai Mual pen tulin, ni thum hawhnakah khualzin haw hi. Topa i Thutiam Kuang cu a mai hawah hawhin, amu ca in ngiahnak mun tuk zei hi.
34 A ngiahnak mun haw pa khat nung pa khatah a thawn pepel haw ten, Topa i meingo cu thalengin, a hum hawah um leleng hi.
35 Thutiam Kuang cu ngiahbuk pen a thawn sialin Moses in, “Maw Topa tho inna, na ngal khenkhek khawngin, nangmah huatu cu na mai pen tai khawng haw tahen,” ti hi.Ref 10:35 Saam 68:1;
36 Mah kuang a colh sial ten, “ Topa aw, Israel mi innkua a thawng le a za tei lakah hu kikleh zalin,” ti hi.