3
Aaron Capate
1 Topa in Sinai Mual pen Moses lakah thu a hilh ten, Aaron le Moses i casuante cu a nuailam bangin hi haw hi.
2 Aaron in capa pa li nei in: upabel cu Nadab, Abihu, Eleazar, le Ithamar hi.Ref 3:2 Mipum 26:60;
3 Amuh cu thiampi dek tukin sathau thihnak le khutsuan thungetnak ngahtu haw hi.
4 Mahnaven Nadab le Abihu cu Sinai ngun phillawn pen a thiang ngawlmi halkang biakpiaknak a bawl haw hangin a pa nihin thihnak thuak haw hi. Ca nei haw ma hi, mah hangin a pa haw Aaron a nunsung hempoh cu Eleazar le Ithamar in thiampi dek haw hi.Ref 3:4 Thiam 10:1-2; Mipum 26:61;
Levi Mite Thiampi Tei Nadektu Haw
5 Topa in Moses lakah,
6 “Levi mite cu thiampi Aaron lakah um tukin le a nadek tukin hunpihin hi.
7 Ka umnak Puanbuk ca in, a kulmite Israel mipi tei ca a kulmi le amu thiampi tei ca a kulmi nate dek haw hen hi.
8 Puanbuk sung a, ummi nate cingkhawi haw tuk a, Israel tei nadektu hi haw tuk hi.
9 Israel mi sung pen Levi mite cu Aaron le a capa tei nadektu tukin piak hi haw tuk hi.
10 Mahnaven thiampi nadektu tukin Aaron le a capate bek hi haw tuk hi. A kuakua hei hihen a capa tei nadeh a dek tumtu cu thah hi haw tuk,” ti hi.
11 Topa in Moses lakah,
12 “Tu pepan Israel tei capa upabel hempoh ai-in, Levi mite cu la tung a, keimata hi haw tuk toh hi.
13 Itahim titale Izipt ngamah Izipt mitei capa upabel ka thah khawng ten Israel tei capa upabel hempoh le a ngan tei ca cawi masabel hempoh cu thiangthotik khawng ing a, keimata tukin ham ing. Atu-in Israel tei capa tawntil ai-in, Levi mite la ing. Keimah cu Topa ing,” ti hi.Ref 3:13 Suah 13:2;
Levi Tei Mipum Sialnak
14 Sinai phillawn pen Topa in Moses lakah,
15 Levi mite cu amu hinnam tek le a innkua tek haw pen ha khat le a humlam pano hempoh mipum na sialin hi, tin thupia hi.
16 Topa i thupiakmi bangin Moses in bawl hi.
17-20 Levi in capa pa thum nei hi. Gershon, Kohath le Merari hi haw in, amuh cu amu hinnam ten pen cikhaihtu a hih haw hangin, a min haw cu a hinnam min haw in suakta hi. Gershon in capa pa nih nei in, Libni le Shimei hi. Kohath in capa pa li nei in, Amrom, Hebron le Uzziel hi. Merari in capa pa nih nei in, Mahli le Mushi hi. Amuh cu cikhaihtu hi haw in, a min haw cu a hinnam minin suak hawta hi.
21 Gershon cihah sung pen hinnam nam nih umin, Libni hin le Shimei hin hi.
22 Pano ha khat kim mi le a humlam hempoh mipum a sial haw ten a venghawng haw in, thawng sa lih le za nga haw hi.
23 Hi hinte cu nitumnak lam, Puanbuk i nunglamah ngiahbuk sa haw henna,
24 Lael i capa Eliasaf cu a bawi upa hi tuk hi.
25 Puanbuk cu cingkhawi haw tuk a, pualam khuh hihen a sunglam khuh hihen, puanbuk tumnak kongka puanzak,
26 puanbuk le biaklandawh kimkot a, ummi upnak puanzakte le upnak kongka puanzak cing haw tuk hi. Hi na tei ca in, a kulmi hempoh dek haw tuk hi.
27 Kohath cihah sungah hinnam pa li um hi. Amram hin, Izhar hin, Hebron hin le Uzziel hin hi.
28 Ha khat le a humlam pano hempoh mipumsialin, a venghawngin thawng liat le za luk haw hi.
29 Hi hin cu puanbuk hanglam mawkah ngiahbuk sa haw tuk a,
30 Uzziel i capa Elizafan cu a bawi upa hi tuk hi.
31 Amuh cu, Mun Thiangtho a, thiampi tei a manbel haw mi, kuang le Mun Thiangthobel a, kongka puanzak cingkhawi haw tuk a, hi na tei ca a kulmi hempoh dek haw tuk hi.
32 Levi mitei bawi upa cu thiampi Aaron i capa Eleazar hi. Amah cu Mun Thiangtho a, dehvo neitu hi.
33 Merari cihah sung pen hin nih um haw hi. Mahli hin le Mushi hinte hi.
34 Ha khat le a humlam pano hempoh mipumsialin, a venghawngin thawng luk le za nih kim haw hi.
35 A hinnam haw bawi upa cu Abihail i capa Zuriel hi. Hi hinte cu puanbuk saklamah ngiahbuk sa haw tuk hi.
36 Amuh cu Puanbuk saknak thing, pangzawlte, a khuamte, a tawdam le innkil a pehdun mite cingkhawi haw tuk a, hi na tei ca in, a kulmi hempoh dek haw tuk hi.
37 Mah hum pen a pualam upnak tuk khuamte, a tawdamte, khaukhihnak thingkhette le khau cingkhawi haw tuk hi.
38 Moses, Aaron le a capate cu Puanbuk i nisuahnak lamah ngiahbuk sa haw tuk hi. Israel tei ca in Mun Thiangtho a, deh tukmi nadeh hempoh cu amuh ten dek haw tuk hi. Mah nadeh cu midang pa kha khatin deh a tum ahi tale thah hi tuk hi.
39 Levi mite ha khat le a humlam pano hempoh cu Topa i thupiaknak bangin Moses in, a hinnam haw tekin mipum sialin, a venghawng haw in thawng sawm nih le thawng nih haw hi.
Levi Ten Capa Tawntil Ai-awh
40 Topa in Moses lakah, “Israel tei capa upabel ha khat le a humlam hempoh cu min cazin la khawngin hi.
41 Keimah cu Topa ing. Israel mi capa upabel hempoh tei ai-in, Levi mite cu keimata tukin ham khawng ing hi; mahten Israel tei ngan i hinmi catawntil hempoh ai-in, Levi mitei ngante ham ing hi” tin ti hi.
42 Moses in Topa i thupiakmi cu zui in,
43 ha khat le a humlam capa upabel hempoh mipum a sial ten a venghawng haw in, thawng sawm nih le thawng nih, za nih le sawm salih le pa thum kim haw hi.
44 Moses lakah Topa in,
45 “Israel tei ngan catawntil hempoh ai-in, Levi mitei ngan cu pia in hi. Levi mite cu kata hi haw tuk hi. Keimah cu Topa ing.
46 Israel tei capa upabel cu Levi mite sangin za nih le sawm salih le pa thumin tam saw, a hih hangin a valmi capate cu tanin hi.
47 Puitu upa tei a man lih mek bangin capa pa khat cu ngun tangka cang nga tuah tanin hi.
48 Mah tangka cu Aaron le a capa tei lakah pia in hi,” tin ti hi.
49 A tih bangin Moses in zui in,
50 ngun tangka thawng khat le za thum le sawm luk le cang nga suahin,
51 Aaron le a capa tei lakah pia hi.