4
Levi Minam Kohath Hin Tei Dehvo
1 Topa in Moses cu,
2 Levi mi Kohath hin hi a unau pih haw le a innkua tekin mipumsial inna,
3 Thukham koihnak Puanbuk sung a, nadek thei tuk, kum sawm thum le kum sawm nga laklawh pano hempoh cazin sungah na khumin hi.
4 A nadeh haw tukmi cu a thiangthobel hi tuk hi, tin ti hi.
5 Topa in, a nuailam a, daan cu Moses lakah pia hi. Na ngiahnak na thawn tuk uhten Aaron le a capate cu puanbuk sungah tum haw tuk a, Thutiam Kuang mai a, ummi puanzak cu la in, mah puanin Thutiam Kuang cu khuh haw tuk hi.
6 Mah humah saphaw a phabelin khuh haw tuk a, puan mepian tuah khuhbet haw tuk hi. A zawnnak ngolhte cu holh haw tuk hi.
7 Topa i lak a, piakmi cangho koihnak cabuai cu puan mepian tuah khuhin, a hum pen pakan le namtui kuangte, biakpiaknak kuangte le sabit thawlte koih haw tuk hi. Cabuai humah catngawl cangho luih haw tuk hi.
8 Mahmi humah puansan khuh haw tuk a, saphaw phabel tuah khuh thuah haw tuk hi; mah nungten a zawnnak ngolhte holh haw tuk hi.
9 Mei vaknak khuam cu meivaknak le caiceh, meihalnak thik kuang le olif situi koihnak nate tuah puan mepianin khuh haw tuk hi.
10 sui biaklandawh cu puan mepian tuah khuh haw tuk a, meivaknak khuam cu saphaw phabelin khuh thuah haw tuk hi.
11 Mahceng ten sui biaklandawh cu puan mepian tuah khuh haw tuk a, saphaw phabelin khuh thuah haw tuk hi; mah nungten a zawnnak ngolh holh haw tuk hi.
12 Mun Thiangtho a, manmi kho kheng hempoh cu puan mepian tuah tuam haw tuk a, saphaw phabel tuah khuhin, a zawnnak ngolh humah koih haw tuk hi.
13 Sathau tuah tawhhelmi vut cu biaklandawh pen suakin, puansan dup tuah khuh haw tuk hi.
14 A humah biaklandawh a, manmi na hempoh meihalnak kuang, cik thuknak daal keu kak, vut suahnak kawpia le maihum koih haw tuk hi. Saphaw phabel tuah khuhin, a zawnnak ngolhte holh haw tuk hi.
15 Ngiahbuk thawnin, Aaron le a capa ten na thiangtho zen thiang ngawl hempoh cu a khuh khawng haw bek ten, Kohath hinte cu pua tukin hung haw tuk hi. Mahnaven a puak haw ten zen hihim haw pahsuh hen hi, a zen sual haw tale thi haw tuk hi.
Puanbuk thawn ten dehkul mite cu Kohath hin tei dehvo hi.
16 Thiampi Aaron i capa Eleazar in Puanbuk pongpi le meivak tuk situi, namtui, an tuah biakpiaknak, noih tuk sathau le Puanbuk sung a, ummi Topa i na hempoh cing tuk hi.
17 Topa in Moses le Aaron lakah,
18 “Kohath hin cu na thiangtho elnai ah hung haw pahsuh hen,
19 thihnak tawk kha sual haw tuk hi. Thihnak a tawh haw ngawlnak tukin Aaron le a capate tum haw in, a nadek semdun haw tuk hi.
20 Mahnaven Kohath mite Puanbuk sungah tumin, thiampi tei na thiangtho thawn tukin a tuangtim lih laih a zo haw tale thi tatak haw tuk,” ti hi.
Levi Minam Gershon Hin Tei Dehvo
21 Topa in Moses lakah,
22 Levi nam, Gershon hin cu a unaupihte le a innkua haw tekin mipumsial inna,
23 Topa i umnak Puanbuk sung a, nadek thei tuk kum sawm thum le kum sawm nga laklawh pano hempoh cazin la khawngin hi.
24 a puak haw tuk van cu,
25 Puanbuk, a sunglam khuh le a pualam khuh tuah a humkhuh saphaw phabel le a sung khuhnak kongka puanzak,
26 puanbuk le biaklandawh upnak a, manmi puanzak le khau, upnak kongka puanzak le a kulmi na noinang hi tuk hi. Hi na tei ca in, a kulmi hempoh cu bawl haw tuk hi.
27 Aaron le a capa ten puak tuk le dehvo a piakmi hempoh a deh tuang suak theihnak tukin Moses le Aaron, nangmuh hihimin komno in zo un hi.
28 A humlam bangin Puanbuk sung a, a dehvo haw cu Gershon hin ten la haw henna, thiampi Aaron i capa Ithamar makaihnak tuah dek haw tuk ti hi.
Levi Minam Merari Hin Tei Dehvo
29 Topa in Moses lakah, “Levi hinnam Merari hinte cu a unau pih le a innkua tekin mipumsial inna,
30 Topa i umnak Puanbuk sung a, nadek thei tuk kum sawm thum le kum sawm nga laklawh a, pano hempoh cu min cazin la khawngin hi.
31 Amuh cu Puanbuk cuum le pangzawl, khuam, khuam tawdam le,
32 Puanbuk upnak khuam, khuam tawdam le khau khihnak thingkhet, khau le hi na tei ca in, a kulmi na noinang hempoh puatu hi haw tuk hi. A min haw lo cikcekin, a puak haw tuk tek piak hi haw tuk hi.
33 Puanbuk sung a, Merari hin tei dehvo cu a hum a bangin hi. Thiampi Aaron capa Ithamar i makaihnak tuah dek haw tuk,” ti hi.
Levi Minamte Mipum Sialnak
34-48 Topa i thupiakmi zui in Moses, Aaron le Israel hinnam puitu ten Levi hinnam Kohath, Gershon le Merari hin cu a unau pih le a innkua tekin mipum sial haw hi. Puanbuk sung a, nadek thei tuk kum sawm thum le kum sawm nga laklawh pano hempoh cu min cazin la khawng haw hi. Min a lak haw mi mihing zah cu a nuailam bang hi.
\pn Kohath \pn*hin pen thawng nih le za salih le sawm nga haw hi.
\pn Gershon \pn* hinnam pen thawng nih le za luk le sawm thum hi.
\pn Merari \pn* hinnam pen thawng thum le za nih haw hi.
Moses le Aaron ten mipumsialin, Puanbuk sung a, nadek thei tuk kum sawm thum le kum sawm nga laklawh pano hempoh min cazin lakmi a venghawngin, thawng liat le za nga le sawm liat haw hi.
49 Topa in Moses lakah, a thupiak bangin a deh haw tuk le a puak haw tuk dehvo cu pa khat ten pia haw hi. Moses lak a, Topa i thupiaknak bangin pa khat nawno in, cazin sungah sialsiah haw hi.