8
Ezra In Daan Laibu Sial
1 Ha salih ha in Israel mite cu a khua tek hawah um khawng haw hi. Mah ha, ni khat ni-in, thinkhat zetin Jerusalem khua, Tui Kongka mai ah tawkdun khawm haw hi. Daan Laibu la tukin Ezra cu cial haw a, Ezra cu thiampi hi in, Topa Israel tei lakah Moses khut sung pen a piakmi Daan thu lam a thei zetmi hi.
2 Ezra in Daan laibu cu la in, mipi a khopkhawmnak munah hawh hi. Mahlai ah numei, pano le thucing thei hempoh a venghawng haw in khawm khawng haw hi.
3 Kongka el muallawnah Ezra in Daan laibu cu zinglam pen sun tian nging zetin sialin, mipi ten phano in ngai haw hi.
4 Mah laibu sialnak tukin a dawh haw mi taitan humah Ezra cu ding hi. A taklamah Mattithiah, Shema, Anaiah, Uriah, Hilkiah le Maaseiah dingin, a veilamah Pedaiah, Mishael, Malkhijah, Hashum, Hashbaddanah, Zekhariah le Meshullam ding haw hi.
5 Mah taitan dawhmi humah Ezra a din ten a venghawng haw in mitphelep ngawlin zo haw hi. Daan laibu a keu bek ten a venghawngin ding haw hi.
6 Ezra in, “A thawmngeng Topa Pathian cu thangphat un!” ti hi.
Mipi ten vanlamah a khut haw zakin, “Amen, Amen,” tin don haw hi. Khukbilin, a mai haw lei tawngkha tian kunin, Pathian bia haw hi.
7 Mahten mipi cu thoto haw in, a umnak tek haw pen ding haw a, Levi mi Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan le Peliah ten Ezra i sialmi Daan cu hilhciang haw hi.
8 Mipi ten a theih zawhnak tukin mah Pathian Daan a sialmi cu let cawcopnote 8:8 Let cawcop Daan laibu cu Hebru awnin ngatmi hi, Judah mi Babilon sal a tan nung haw ten Aramik awn mangin Hebru awn thiamleh haw ma toh. Mah hangin Aramik awnin letleh a kulnak hi. haw hi.
9 Pathian Daan i deihnak ngangai a theih haw ten a thasia in, kap haw hi. Mah hangin ngamuktu bawi Nehemiah, thiampi, Daan theitu Ezra le mipi lakah Daan a hilhciangtu Levi miten, “ Topa na Pathian uh ca in tuni cu ni thiangtho hi. Thasia in kap pahsuh un.
10 Na inn uhah pin unna, an uk ei in, sabittui ukte in un. Na an uh le na sabit uhte cu a nei ngawl mite kawm bok un hi. Tuni cu Topa i ca in ni thiangtho hi, thasia in um pahsuh un hi. Topa i lungdamnak a piak mi cu na ngilnak uh hi,” tin ti haw hi.
11 Levi miten mipite cu mengden um tukin hehnem haw in, ni thiangtho a hih hangin lungsia in um tuk ngawlin hilh haw hi.
12 Mah hangin mipite cu innah pinin, lungdam zetin ei le in, a ngualcam pihte tuah kawmdunin, a lak hawah a lehsak haw mi Daan i sullam a theihciang haw hangin thatui zetin um haw hi.
Deubuk Puai
13 A zingten a hinnam tek haw hotute cu thiampite le Levi mite tuah Daan i sullam ngangai cung tukin Ezra lakah hawh haw hi.
14 Moses mangin Israel tei lakah Topa in, a piakmi Daan sungah hi Deubuk Puai sung cu demno sung deu khawh vutin mah deu sungah um tukin Israel tei lak thupiakmi um hi tih cu mu haw hi.Ref 8:14-15 Thiam 23:33-36, 39-43; Daan 16:13-15;
15 Mah hangin Jerusalem le khuadang hempoh ah hi bangin thupia haw; “Mualhumah hawh unna, Daan sung a, thupiakmi bangin, sawlbuk saknak tukin olif kang, caak kang, lemmui kang, tumcehte le ceh nei thing dadang vang la un,” ti haw hi.
16 Mipite cu hawhin, sawlbuk saknak tukin thingkangte la in, a inn hum a, inn khuh humah, a inntual le Biakinn tualah hihen, Tui Kongka le Efraim Kongka el a mipi tei umnak muallawnah hihen, sawlbuk cu sa ten haw hi.
17 Saltannak pen a kikmi hempoh ten sawlbuk cu sa in, a sungah um haw hi. Hi cu Nun i capa Joshua khan nungin, a bawl masabelmi haw hi in, a venghawng haw in lungdam thatui in um haw hi.
18 A puai bawl haw ni khat ni pepanin, a tawp ni tian nisialin Pathian i Daan cu sial haw hi. Ni salih sung puai bawlin, Daan piakmi sung a, ummi bangin ni liatnak ni-in puai cu ceng haw hi.