7
1 Ngal kulhtian cu cengin, kongkate bawl khawng ung; biakinn cingtute, lasatute le Levi mite cu nadeh sem tek ung hi.
2 Jerusalem khua uktu tukin ka sangngampa Hanani le kulhtian cingtu tukin ngalbawi Hananiah koih ing. Hananiah cu Pathian kihcatu le muantakzet, kua ma bat ngawlmi hi.
3 A pa nih haw in, Jerusalem kongkate cu nisuah sawng bek ten hong tukin le nitum nung kongka cingtute hei a pin haw laih ngawlin khakin, kalh khawng tuk hilh ing. Jerusalem a um sungin, khua cingtu lak pen mi khenkhat a kulnak zawnah ngalviltu koihin, mi khenkhat cu amu inntek cing tukin koih tuk hilh ing.
Saltannak Pen A Kikleh Cazin
(Ezr 2:1-70)
4 Jerusalem khuapi cu ngengzet naven a sung a um mihing cu tam haw ma; inn vang tampi sa haw ma laih hi.
5 Pathian in ka lungmu khanglotikin, mipi le a bawite, a hotute cu sam khawm ing a, a innkua ten i mipum cazin la ing. Saltannak pen masabel a kikleh tei cazin cu a nuailam bangin hi.
6 A nuailamte cu Judah peng a um, Kumpi Nebuchadnezzar in Babilon ah pui in, mahlai pen kiklehin, Jerusalem le Judah ngamsung amu khua tenah a pinleh mite haw hi.
7 A kihpihtu upate cu Zerubbabel, Joshua, Nehemiah, Azariah, Raamah, Nahamani, Mordekai, Bilshan, Mispereth, Bigvai, Nehum le Baanah haw hi.
8-25 Saltannak pen a kiklehmi Israel hinnamte le a hinnam tei a mipum umzah cu a nuailam bangin na hi.
Parosh hinnam pen thawng nih za le sawm salih le pa nih.
Shefatiah hinnam pen za thum sawm salih le pa nih.
Arah hinnam pen za luk sawm nga le pa nih.
Pahath Moab (Jeshua le Joab casuante) hinnam pen thawng nih za liat le sawm le liat.
Elam hinnam pen thawng khat za nih sawm nga le pa li.
Zattu hinnam pen za liat sawm li le pa nga.
Zakkai hinnam pen za salih le sawm luk.
Binnui hinnam pen za luk le sawm li le liat.
Bebai hinnam pen za luk le sawm nih le liat.
Azgad hinnam pen thawng nih za thum le sawm nih le pa nih.
Adonikam hinnam pen za luk sawm luk le salih.
Bigvai hinnam pen thawng nih sawm luk le salih.
Adin hinnam pen za luk sawm nga le pa nga.
Ater hinnam (Hezekiah) pen sawm kuah le liat.
Hashum hinnam pen za thum le sawm nih le liat.
Bezai hinnam pen za thum le sawm nih le pa li.
Harif hinnam pen za le sawm le pa nih.
Gibeon hinnam pen sawm kuah le pa nga.
26-38 A pu le pate a nuailam a khua ah a ummi tei casuan a kikleh mite cu hite haw hi.
Bethlehem le Netofah khua mi casuan cu za le sawm liat le liat.
Anathoth khua mi casuanah za le sawm nih le liat.
Beth Azmaveth khua mi casuanah sawm li le pa nih.
Kiriath Jearim, Khefir ah le Beeroth khua mi casuanah za salih le sawm li le pa thum.
Ramah le Geba khua mi casuanah za luk le sawm nih pa khat.
Mikmas khua mi casuanah za le sawm nih le pa nih.
Bethel le Ai khua mi casuan za le sawm nih le pa thum.
Adang Nebo khua mi casuanah sawm nga le pa nih.
Adang Elam khua mi casuanah thawng khat le za nih le sawm nga le pa li.
Harim khua mi casuanah za thum le sawm nih.
Jerikho khua mi casuanah za thum sawm li le pa nga.
Lod, Hadid le Ono khua mi casuanah za salih le sawm nih le pa khat.
Senaah khua mi casuanah thawng thum le za kuah le sawm thum.
39-42 Thiampi tei hinnam sung pen a kik mite cu hite haw hi:
Jedaiah (Jeshua casuan) hinnam pen za kuah sawm salih le pa thum.
Immer hinnam pen sawm nga le pa nih.
Pashhur hinnam pen thawng khat le za nih le sawm li le salih.
Harim hinnam pen thawng khat le sawm le salih.
43-45 Levi hinnam pen a kikmi cu hite haw hi.
Jeshua le Kadmiel hinnam (Hodaviah casuan) pen sawm salih le pa li.
Biakinn lasatu pen (Asaf casuan) za le sawm li le liat.
Biakinn cingtute (Shallum, Ater, Talmon, Akkub, Hatita, le Shobai casuan) pen za le sawm thum le liat.
46-56 Biakinn satute amu hinnam tek tuah a kik mite cu hite haw hi.
Ziha, Hasufa, Tabbaoth, Keros, Sia.
Padon, Lebana, Hagaba, Shalmai, Hanan.
Giddel, Gahar, Reaiah, Rezin, Nekoda.
Gazzam, Uzza, Paseah, Besai, Meunim.
Nefusesim, Bakbuk, Hakufa, Harhur, Bazlith.
Mehida, Harsha, Barkos, Sisera, Temah.
Neziah le Hatifa.
57-59 Solomon i umlawhte, a hinnam tek haw tuah a kik mite cu hite haw hi.
Sotai, Sofereth, Perida, Jaalah, Darkon, Giddel.
Shefatiah, Hattil, Pokhereth, Hazzebaim le Amon.
60 Biakinn satute le Solomon i umlawhte, a kikmi tei casuan cu a venghawng haw in za thum le sawm kua le pa nih haw hi.
61-62 Tel Melah khua, Tel Harsha khua, Cherub khua, Addon khua le Immer khua pen Delaiah hinnam, Tobiah hinnam le Nekoda hinnam, a venghawng mihing za luk le sawm li pa nih a kikmi um haw naven, Israel hinnam a hihnak haw hilhciang thei haw ma hi.
63-64 Thiampi Hobaiah hinnam, Hakkoz hinnam le Barzillai hinnam ten a pu le pa tei suahkehnak lai tuah sialsiahmi cazin mu haw ma hi. (Barzillai hinnam pen a pu haw in Gilead ngam Barzillai hin numei huai in, a pu i min a laak hangin Barzillai hin ti haw hi) A pu le pa a kuate him tih a theih haw ngawl hangin amuhte cu thiampi in, sang thei haw ma.
65 Judah ngamuktu bawi in, Urim le Thummim tihmi a mang thiamtu thiampi a um laihngawl sung haw cu Pathian lak a, piakmi an thiangtho ei tuk ngawlin Ngamuktu bawi pa in kham hi.Ref 7:65 Suah 28:30; Daan 33:8
66-69 Saltannak pen a kik mipum venghawng cu thawng sawm li le thawng nih, za thum le sawm luk haw hi.
Umlawh venghawng numei pano tih um ngawlin, thawng salih le za le thum sawm thum le salih haw hi.
Lasatu numei pano venghawng haw in
za nih le sawm li le pa nga haw hi.
Cipuh za salih le sawm thum le pa luk,
Laak za nih le sawm li le pa nga,
Kalauk za li le sawm thum le pa nga,
Laak neuno phun thawng luk le
za salih le sawm nih hi.
70-72 Mi tampi ten Biakinn saklehnakin tangka le na tampi cu a nuailam bangin na pia haw hi.
Ngam uktu bawi in;
Sui cuai li,
Biakpiaknak tuk kuang sawm nga,
Thiampi angkicual za nga le
sawm thum pia hi.
A hinnam haw hotu ten;
Sui cuai sawm liat le cuai nga,
Ngun cuai za liat le cuai nga pia haw hi.
Mipi ten;
Sui cuai za liat le cuai nga,
Ngun cuai za salih le cuai sawm thum,
Thiampi angkicual sawm luk le
salih pia haw hi.
73 Mahten thiampite, Levi mite, biakinn cingtute, lasatute, biakinn satute le Israel mi hempoh cu khuapi hihen, khuano hihen, khua tihkimah um pepel haw hi.Ref 7:73 1Khang 9:2; Neh 11:3;