9
Mipi Ten Sual Phuang Haw
1 Mah ha, ni sawm nih le ni li ni-in, Israel mite cu munkhatah tawkdun khawmin, a sualsihnak haw langtiknakin, ancang haw; thangkhau puan silhin, a lu hawah leivul theh haw hi.
2 Ngamdang mite tuah cokheldun ngawlin a dang vilvelno in, um haw hi. Ding haw in, amuh sualnak le a pu le pa tei sualnak cu phuang haw hi.
3 Nazi pa thum sung Topa a Pathian haw i Daan a sialmi haw cu ngai in, mah ceng nazi pa thum cu a sual haw phuangin, Topa Pathian cu bia haw hi.
4 Levi tei ca in taitan dawhin, mah humah Jeshua, Bani, Kadmiel, Shebaniah, Bunni, Sherebiah, Bani le Chenani ding haw a, nging zetin, Topa a Pathian min sam haw hi.
5 Levi mi Jeshua, Kadmiel, Bani, Hashabneiah, Sherebiah, Hodiah, Shebaniah le Pethahiah ten biaksamnakin, hi bangin ti haw hi.
“Ding unna, Topa,
na Pathian uh cu
thangphat un,
Kumkhua pen kumkhua tian
amah cu thangphat un,
A min sunglawi cu
mi hempohin thangphat un,
Mihing thangphatnak cu
cangkim ma hi,
mi hempohin thangphat un,”
ti haw hi.
Sualsihnak Thunget
6 Israel mipi ten hi bangin thungen haw hi:
Topa aw, nangmah bek
Topa hi ci,
Van le aksite nangma bawl hi.
Nangmah in lei le tuipi le
a sungum mi hempoh
bawl khawngin,
nunnak pia khawng ci.
Vanah a ummi hempoh ten
nangmah cu kunin bia haw hi.
7 Topa Pathian, nangmah in
Abram teng ci.
Babilon ngam Ur khua pen sam ci;
A min cu Abraham in thek ci,Ref 9.7 Pian 11:31; 12:1; 17:5;
8 Muantakin, na muh hangin,
Amah tuah thutepnak bawl ci.
Kanaan ngam pia tukin thutiam ci.
Hit mi, Amor mi,
Perez mite, Jebus mi le
Girgash mitei ngam cu
a casuan tei umnak ngam tuk
hi ti ci.
Na thutepmi bangin kimtik ci a,
muantakmi na hih hangin hi.Ref 9.8 Pian 15:18-21;
9 Izipt ngam a, ka pu le pa tei
a thuakdan haw mu ci,
Tuipi San pen bopnak
a nget haw za ci;Ref 9.9 Suah 3:7; 14:10-12;
10 Faro dodalin thasiahhuai
nalamdang bawl ci,
A khutnuai bawi le
a ngam mite dodalin,
Na mihingte a bawlsiat leita
haw hangin,
nangmah in neh ci, atu hei in,
na minthang hi.Ref 9.10 Suah 7:8-12:32;
11 Tuipi satcatin, na mihing tei
lampi bawlsak ci,
Leiko humah pui in, a hiltute cu
tui cawkpi sung a,
suangtum a nim bangin,
tuipi thuk sungah
caak haw hi.Ref 9.11 Suah 14:21-29; 15:4-5;
12 Sunlamin, meingo tuah
lamhuai ci,
Zanlamin, a lampi haw cu
mei alh vak tuah det ci,Ref 9:12 Suah 13:21-22;
13 Sinai Mual humah van pen
na tolhsuk ten,Ref 9:13-14 Suah 19:18-23:33; mahlai ah
na mihing tei nelah awn ci,
14 Sabbath ni thiangthotik
tukin zilh ci,
Na sila Moses lak pen
15 A ngilkial haw ten van pen
cangho khiasuk ci,
Adangdum haw ten
suangpi sung pen,
a in haw tuk tui tultik ci.
A hennak haw tuk ngam cu
luahtum tukin hilh ci,
A lak hawah pia tukin
na tepsa mi ngam cu.Ref 9:15 Suah 16:4-15; 17:1-7; Daan 1:21;
16 Mahnaven ka pu le pa uhte cu
tuangkhawngin,
a lungmu haw khohzet hi.
Na thupiakmi zui nuam
haw ma hi.Ref 9:16-17 Mipum 14:1-4; Daan 1:26-33;
17 Na thu zui nuam ngawlin
na bawlmi nate
phawkngil khawng haw,
Na lamdang na bawl mite cu
cingleh haw ma toh.
A uangthuannak haw tuah
hotu teng haw hi,
Izipt saltannakah
kihpihleh tukin hi.
Mahnaven nang cu
mi ngaidamtu,
thangaitu Pathian hi ci,
Hehpihnak le itnak nei ci,
thinsauzet ci.
Na hehpihnak cu ngeng ngangai hi,
nung hek tuk phal ma ci.Ref 9:17 Suah 34:6; Mipum 14:18;
18 Khuicang lim bangin
pathian milim bawl haw hi.
Izipt ngam pen ohte suahtu Pathian hi,
ti haw hi.
Topa iti zahin kaw
nang a zawnsak haw!Ref 9:18 Suah 32:1-4;
19 Mahnaven phillawnah lawl ma ci,
Na hehpihnak a ngeng hangin
Meingo le mei alh cu
laleh phal ma ci,Ref 9:19-21 Daan 8:2-4;
sun le zanin, a lampi
laktute haw hi.
20 Na phatnak hangin
a bawl haw tuk hilh ci,
Manna tuah cawmin,
a in haw tuk tui pia ci.
21 Kum sawm li sung phillawnah,
A kulmi hempoh haw
pia khawng ci,
A puansilh haw sia awng ma hi,
A ke haw na in bum awng ma hi.
22 Ngam tampi le miphun tampi
nehtik ci.
A ngam elkim a, ngamte cu
Sihon i ukmi Heshbon ngam
neh haw,
Og kumpi a dehnak
Bashan ngam vang.Ref 9:22 Mipum 21:21-35;
23 Van aksi zahin canau pia ci,
A pu le pa tei lak a,
na tepsami, a luahtum haw tukmi
ngam cu nehtikin luahtumtik ci.Ref 9:23 Pian 15:5; 22:17; Josh 3:14-17;
24 Kanaan ngam cu la in,
neh khawng ci,
Na mitei lakah a deih haw mi
bawl theihnak huham pia ci.Ref 9:24 Josh 11:23;
Kanaan ngam kumpite le
a mihing tei humah.
25 Na mihing ten kulhtian
khuapi la haw,Ref 9:25 Daan 6:10-11;
Ngampha le tuikhuk cawh sate,
Sum le pai tuah a dimmi
inn vang, Olif kung,
thingngah kung le
sabit huan tuah.
A duhzah haw ei in thau haw,
Na piakmi thilpha humah
nunnopzet haw hi.
26 Mah bang hi napi in,
na mihingte cu ngaltho haw hi.Ref 9:26-28 Daan 2:11-16;
Na thu zui nuam haw ma,
na daan piakmi nunghek haw hi.
Na thuzilhtu profet that haw in,
Ngallinnak piatu le
na lakah kikleh tukin thu hilhtute
a zotsaknak dan haw
nase ngangai hi.
27 Mah hangin a ngal tei
khut sungah hengtik ci,
Amuh ten ukin, bawlsia haw hi.
A lung haw a bing ten
na bopnak deihin sam haw a,
van pen a aunak
aw haw cu za ci,
Na mi hehpihnak
a ngeng hangin,
A ngal tei khut sung haw pen
pan tukin hi.
A lak hawah hotute hah ci.
28 Lemdaihnak a neih haw ten,
sual lehleu haw hi,
A ngal tei khut sungah hengtikleh ci.
Mahnaven a sualnak haw sikkikin
nunnak a nget haw ten,
Na hehpihnak a ngeng hangin hi.
Van pen za in,
a vei sialceng ngawlin panleh ci.
29 Na thupiakmi zui tukin
ngallinnak pia ci,Ref 9:29 Thiam 18:5;
pualthau in, na daan cu lawl haw hi;
Na Daan zui cu nunnak lampi
hi leng naven?
Thinlian le lungmu
ngawngtawhin
zui nuam haw ma hi.
30 Kum khat nung kum khat
thincualin ngallinnak pia ci,Ref 9:30 2Kum 17:13-18; 2Khang 36:15-16;
Na profet ten hilh li haw naven,
Na mihingte cu bengbul haw hi.
Mah hangin na mihingte cu
miphun dang ten uk haw hi.
31 Mahnaven na hehpihnak
a ngeng hangin,
lawlthong ngawlin
le siatsuah khawng ma ci;
Nang cu hehpihnak neitu
Pathian hi ci!
32 “Maw Pathian aw,
Ihempoh tithei Pathian,Ref 9:32 2Kum 15:19, 29; 17:3-6; Ezr 4:2,10;
A lauhuaimi le
ihempoh bawl theitu Pathian;
Na thutepmi cu cangkim zetin
kimtik khawng ci.
Assiria kumpi tei
a bawlsiat pen pan,
Tuni tian ka thuak uhmi hi,
Thu neuno in ngaihsut sak
zal pahsun.
Ka kumpi uhte le ka hotu uhte,
Ka thiampi uhte le
ka profet uhte,
Ka pu le pa uhte le
ka mipi tei thuakmi,
Hi tizah ka thuak uhmi hi
hu theihsak zalin hi.
33 Keimuh na bawlsiat mekmi hi
dik hi, bawlsiat thuak taak ung.
Nang cu muantak hi ci,
keimuh sual ung hi.
34 Ka pu le pa uhte
ka kumpi uhte pepanin,
Ka hotu uhte le ka thiampi uhten,
na Daan cu zui haw ma hi.
Na thupiakmi le na ngallin piakmi cu,
Ngai nuam hihim haw ma.
35 Na muicu piakmi hangin,
kumpi in, na mite uk hi.
Na piakmi ngam zalzet le
ngampha sung a um haw laihin,
sualnak sung pen kikleh ngawlin
nangma nadek haw ma.
36 Atu-in, na piakmi ngamsung le
Ei le intuk a piatu
hi ngam pha sungah salin
suakta ung.
37 Ka ngamsung uh pen
a suakmi hempoh cu,
kumpi lakah hawh khawng hi;
Ka sual uh hangin
ka hum uh a,
na koihmi bawi lakah
keimah hihen, ka ngan uhte
hei hihen, a nuanuamin
bawl haw hi,
ka lung uh bing hi,”
tin ti haw hi.
Lungkimnak Lai Ngan Haw
38 Ka hum uhah a piang mite hangin Israel miten atu-in, lai nganin, lungkimnak laikhet bawl ung a, ka hotu uhte, ka Levi mi uhte le ka thiampi uhten a humah a min haw khen haw hi.