6
Nehemiah Suam Haw
1 Sanballat, Tobiah, Geshem le ka ngal uh hempoh ten khuapi kulhtian tiang khawng ung a, kulhtian awng umleh ma toh tih cu za haw hi. (Kongka umnak tukin ka khawih uhmi munah kongka bawl ma laih ung)
2 Mah hangin Sanballat le Geshem ten thuthanin, Ono munlawn a, khuano pa khatah tawkdun tukin zawm haw hi. Hihi cu keimah itin maw liamsuah nuamin, a zolnak haw hi.
3 mi hahin, “Nadeh thupizet ka neih hangin hung thei tuk mang. Nangmah tawk tukin ka hung uh tale nadeh ka colh khawng uh kul tuk a hih hangin, iti hei in nadeh cu cawltik thei tuk mang hi,” ti ing.
4 Mahtibang lelengin vei li tian thucah hi. Kei vangin mahtibang lelengin thu kikleh bok ing.
5 Sanballat in, laikuat a vei nganak cu nganin, tuam ngawlin a umlawhpa khat na puatik hi.
6 A lai sungah,
“Nangmah le Judah mite cu ngal thawh a tum haw hangin khuapi kulhtiante lem li haw hi, tin, elkim um ten son li haw tin Geshem in hilh hi. Mah hum pen Nehemiah cu amah le mah kumpi in bawldun cawm tuk a,
7 Judah kumpi cu Nehemiah hi tin, Jerusalem khua ah phuangtu tukin Profet vang koih khawng zo, tin hilh bok haw hi. Hi thu cu kumpipa in zaleh leleng tuk hi, mah hangin nangmah le keimah tawkdunin, thu ngaisung kawm le hung tih deih ing hi,” tin ngan hi.
8 Lai lulleh ing a, “Na hilhmi hi pa khat hei thungai umma hi. Nangma bawlcawm ngeh ti ing.”
9 A venghawngin ka nadeh uhmi cawl tukin thum tawtok haw hi. “Mahnaven atu-in, Pathian in ka tha khohtik dedeuh zo hi.”
10 Mah hun khin Delaiah i capa le Mehetabel i tupa Shemaiah cu inn pen imah lai ah vaksuak thei ngawlin a um hangin leng tukin hawh ing. Amah in, “Nangmah le keima hawh sungin, na Biakinn ah ngelh tuk hung; kongka hempoh tawh kalh khawng tuk hung, itahim titale nangmah that tukin hung haw tuk hi. Zanlaihin hungin that haw tuk,” ti hi.
11 Keimah in, “Kei cu a tai le a ngelh thawthong tuk hi kha mang. Ka nunnak hup tukin Biakinn ah ngelh tuk hi tin, maw na ngaihsut? Ngelh tuk mang hi,” tin ti ing.
12 Ka ngaihsutleh ten Pathian in, a lakah thu a hilh hangin kha ma hi. Tobiah le Sanballat in nawhthuh a piak haw hangin hi bangin awn hi tih zaleh ing.
13 Ka thangsiatnak tuk le keimah zahcak tawk hen tin, nawhthuh pia in, sualnak bawltik nuamin, mi cial haw hi.
14 Thungen ing, “Maw Pathian aw, Tobiah le Sanballat tei bawlmi hi phawkleng inna, bawlsia in hi. A thinsu hen tin, a tili boktu profet nu Nodiah le adang profet vang phawk lelengin,” ti ing.
Nadeh Ceng Haw
15 Nadeh cu Elul ha, ni sawm nih le ni nga ni-in ceng ung, a venghawngin ni sawm nga le ni nih sung ngei ung hi.
16 Ka elkim uh a um ka ngal uhten a zak haw ten a mitmai siazet haw hi; itahim titale Pathian bopnak tuah ka bawl ceng theih uhmi a kuakua hei in za haw hi.
17 Mah hun sung hempoh ah Judah hotute le Tobiah cu laikuatdun leleng haw hi.
18 Tobiah cu Arah i capa Shekaniah i makpa a hih hangin Judah ngamsung mi tampi cu ama lamah tang haw hi. Mah hum pen a capa Jehohanan in Berekhiah i capa Meshullam i canu huai hi.
19 Mi khenkhat ten Tobiah i phatnak bebek ka zak lelengin son haw, ka otmi hempoh cu a lakah hilh khawng haw hi. Tobiah in, a thinsu hen tin, laikuat leleng hi.