5
Mi Ca-ngahte Nuainepnak
1 Hun a ngei deuh ten numei ti ngawl, pano ti ngawlin a unau Judah mi khenkhat tei humah lungkim ngawlnak nei haw hi.
2 “Nau ngual ka hih uh hangin an kham ma ung,” ti haw hi.
3 Mi khenkhatin, “An ngawlin thihtuk sangin tin, ka inn le lo uhte, ka sabit huan uh tiangin pawng ung,” ti haw hi.
4 Adang mi khenkhat ten, “Ka lo uh le ka sabit huan uh ca in siah piak tuk sumpai ka cawi uh kul hi.
5 Judah mi unaute hi thi le sa khat hung hi; Amu kul le sapmi le keimu kul le sapmi hi bangten ma maw? A canote cu amu ca in, a sunglawi bangin ka canote uh cu keimu ca in sunglawi bok haw ma maw? Mahnaven ka canote uh cu sila in, a bawl uh kul hi. A canu uh khenkhatte cu sila tukin zuak zo hung. A bawl theih uh imah umma, itahim titale a lo le sabit huan uhte cu sut khawng haw,” ti haw hi.
6 A phuknak haw ka zak ten thinukzet ing,
7 pa kha khat ka bawl kul tuk hei, ti ing. A hotute le a bawi upate cu liat ing, a lak hawah, “Na unau tei hum a, na bawl uhmi hi pha ma hi,” tin hilh ing.Ref 5:7 Suah 22:25; Thiam 25:35-37; Daan 23:19-20;
Mah thuson tukin mipite sam khawm ing,
8 a lak hawah, “A cangthei ngawl toh hangin miphun dang tei lakah a zuakdun copmi a unau uh Judah mite hei a cangthei tawpin leileh li ung. Mahlai in noh ten na unau uhte cu zuakdun cop tukin kun lehlam si uh si,” ti ing. A hotute cu dai khipkhepin, ot tuk thei haw ma hi.
9 “Na bawl uhmi hi sual hi! A ngal uhte, Gentail mitei a zawnsak ngawlnak tukin Pathian kihca in, a dikmi bawl tukmi hi saw uh ci.
10 Mipite ka lak pen sumpai le an puatik ing. Mahti bang bokin ka nadeh pihte le ka nadektute vangin pukcawi bok hi. Tu pepanin, a cawi haw mite cu kuamah in sotleh ma toh nung.
11 Tu loli in, a lo le sabit huan haw, a olif huan haw le a innte cu pialeh khawng un. Sumpai maw, an cang maw, sabittui maw, olif thau maw, a bat haw mi hempoh atu pepanin map khawng un,” ti ing.
12 A hotu haw ten, “Na hilh bangin bawl khawng tuk ung hi; a na haw pia lehin, a bat haw mite vang sotleh tukma toh ung,” tin ti haw hi. Thiampite samin, a thutep haw bangin bawlsuak tukin a mai hawah siatcamtik ing.
13 Ka taihet puannote 5:13 Ka taihet puan tih cu ihempoh sung khawng belh ing, ka ham theihmi umma toh tihnak hi. dukin, a mai haw pen thing ing hi, “Na thutep uh bangin na bawl uh ma tale Pathian in hi taikennak puan bangin nohte cu thing tuk hi. Pathian in, na inn uhte le na neihmi hempoh uhte laksak khawng tuk a, thacangin zam tuk hi,” tin ti ing.
Mahlai a, um hempoh ten “Amen” ti haw in, Topa cu thangphat haw hi. A thutep haw mi cu zui haw hi.
Nehemiah Mi Lawithiam
14 Artakzaksis kumpi a deh kum sawm nihnak pen kum sawm thum le kum nihnak tian kum sawm le kum nih Judah ngamuktu bawi ka deh sungin keimah hihen, ka sangngamte hihen ngamuktu bawi i eih tukmi an ei awng ma laih hung.
15 Ka masuan a, ngamuktu bawi a dektute cu mipi tei ca in bawmngit na hi haw a, nisial a an haw le a zu leinak tukin ngun tangka sawm li mang leleng haw hi. A umlawhte tianin mipi bawlsiatu haw hi. Mahnaven kei cu Pathian ka lau hangin mahti bangin bawl mang.
16 Ka zaangtha neihmi hempoh cu khuapi kulhtian lemlehnak tukin mang ing a, ka ca in iti bang nate hei zei mang. Ka nadehsaktu ka umlawhte hempoh vang mah kulhtian nadeh dek khawng haw hi.
17 Ka an eihnak cabuai ah Judah mi le a hotute za le sawm nga an eih pih leleng ing, mah hum pen ka elkim uh ngamte pen ka lak a hungmi hempoh vak ing.
18 Ka eih tukin nisial khuicang pa khat, tuu a phabel pa luk le ak tampi ngo leleng ung, ni sawmah vei khat sabittui a thakin suah leleng ing. Mipite a cimkham leita haw a hih hangin ngamuktu bawi i ngah tuk a hilhzah hei in la mang hi.
19 Hizahta in mipi tei ca in ka bawlmi hi Pathian in ka phatnak tukin hu theihsak zal tahen.