4
Nehemiah le Amah Langpangtute
1 Judah miten Jerusalem kulhtian ka leplih uhmi cu Sanballat in, a zak ten a thinukin, a thin cu tuisa so bangin so tawtok hi.
2 A ngualcamte le Samaria ngalkap tei mai ah keimuh cu zawnsakin, “Hi Judah mi nawmtamte i bawl ung tin, kaw a ngaihsut haw? Khuapi tundinleh tum haw maw? Biakpiaknakte bawlin, ni khat sungin dek khawng tuk ung hi tin ngaisung haw maw? A cimmi le a kangtum mite mangin, innsaknak suangte bawl thei tuk ung tin maw a ngaihsut haw?” tin tili hi.
3 Ammon mi Tobiah cu a elah ummi amah vangin, “Iti bang kulhtian kaw, hi ten a tian theih haw tuk? Cingne nangawn kulhtian humah a kai ahin, cimtik thei tuk si!” tin ti hi.
4 Keimah Nehemiah in thungen ing a, “Maw Pathian aw, keimah a zawnsak daan haw hi hu theihsak zalin hi. A awnkam siate amu lu humah heng zal tahen. A neihmi hempoh haw lonsak khawngmi le ngamdang a, thawng khiakmi ah suak haw tahen.
5 Amuhno in, kulhtian a lemlehtu le bawltute a zawnsak haw hangin a phatngawlnakte hi ngaidam pahsuh unna, a sualnak haw hi phawkngil zal pahsuh un,” ti ing.
6 Mah hangin kulhtian cu tung pepel ung a, mipi tei nadeh a lol leita haw hangin a ngei ngawlin a sanlam i alang hengto hi.
7 Jerusalem kulh tiangin, thung zetin bawl thei ung a, pang awngte vang bin pepel ung, tih cu Sanballat le Tobiah, Arabia mite, Ammon le Ashdod in, a zak haw ten a thinukzet haw hi.
8 Mah hangin thu tuang zetin Jerusalem cu do in, buaitik tukin suam tum haw hi.
9 Mahnaven ka Pathian uh lakah thungenin, ngalviltu tukin a sun, a zan mi koih ung.
10 Mahlai in, Judah miten a sah mek haw mi la cu:
“Ka nadeh uh cim leita in
cawl dedeuhta ung,
Buakvawk tukte tam laih sih;
Itin kaw kulhtian cu
ka tundin theih tuk uh?”
tin ti hi.
11 Ka ngal uhten, “A theih man haw laih ngawlin le amuh man haw laih ngawlin a lak hawah hengin that tuk ung a, a nadeh haw mi cu cawlvawk haw tuk hi,” tin ngaisung haw hi.
12 Ka ngal tei lak a, um Judah miten ngal tei a do tumnak haw thute cu tu le tu hilh leleng haw hi.
13 Mah hangin mipite cu ngalnam, ceipi le thalcangte pia in, ahin, ahin in ka celh uh laih ngawlmi kulhtian limah um pepeltik ing.
14 Mipite a um haw nop deuh ma tih ka muh ten mipite, a hotute le a bawi ten “A ngal uhte cu lau hihim pahsuh un. A Topa uh cu itizah ngilin lauhuai him tih cu phawk leleng unna, na unau uhte, na ca uhte, na zi uhte le na innkua tei ca ngaisung thahin, do un,” ti ing.
15 A ngal uhten a suamnak haw a phawhkhak uh hi thei haw in, a tuptah haw mi cu Pathian in phelhsolh zo hi tih cu za haw hi. Mahnung ten ka venghawng uhin nadeh cu panleh ung hi.
16 Mah pepan ka mihingte a langin nadekin, a langin ceipi, lumphaw, thalcang le thik angki tuah ngalcing haw hi. Kulhtian a lemtu Judah mite cu a hotu haw ten nase zetin panpih haw hi.
17 Kulhtian na puatu hempoh ten a khut langlam hawah a nate cawi in, a langlamah hiamnam cawi haw hi.
18 Nadektu hempohin, a tai hawah ngalnam kencih khawng haw hi. Thukincak poh a um tale pengkul tumtu tuk pa cu ka elah um leleng hi.
19 Mipite, a hotute le a bawi upate cu, “A deh uhmi hi zal leita a hih ten kangdun leita in, a um uh hangin pa khat le pa khat hi khua ladun leita hung.
20 Pengkul tum na za uh tale ka elah zuan vut un. A Pathian uhin eimu ai-in do tuk hi,” ti ing.
21 Mah hangin nisial zingtungno pen taklam hade vak tian, khenkhat ten nadekin, khenkhat ten ceipi tuah ngal vilveng ung hi.
22 Mah hun laihin, nadektu le amuh bawmtu hempoh cu zanin, ngal vilveng tukin le sunin, nadek tukin Jerusalem khua sungah cam tukin hilh ing.
23 Keimah le ka ngualcamte, ka umlawhte le keimah cingtute tuah ka venghawng uhin van duk man um ngawlin, ka khut uhah hiamnamte cawi tek ung.