3
Jerusalem Kulh Tiangleh Haw
1 Khuapi upnak kulhnote 3:1 Kulh a tian haw ten saklam pen pan masa haw hi. cu hi bangin tiangleh haw hi. Thiampi Sang Eliashib le a unau thiampi ten Tuu Kongka tihmi lemleh hi, thiangtikin, kongkhahte bawl haw hi. Kulhtian cu Za khat Taitan tihmi le Hananel Taitan tihmi tian lemleh haw hi.
2 Mah zomin kulhtian cu Jerikho khua miten lemleh haw hi.
Mah zomin Imri capa Zakkur in lemleh.
3 Hassenaah hinnam ten Ngasa Kongka bawl haw in, a zawlkhamin kongka bawl haw hi; kongka khahnak tukin a kalhnakte bawl haw hi.
4 Mahceng ten Uriah capa, Hakkoz i tupa, Meremoth in, a sangtu lemleh hi.
Berekhiah i capa, Meshezabel i tupa, Meshullam in, a zom lemleh. Baana i capa Zadok in, a sangtu lemleh hi.
5 Tekoa khua miten a zom cu lem haw hi. Mahnaven khuasung upa ten nadeh hotu tei nadehtikmi deh tuk cu nautatin el haw hi.
6 Paseah i capa Joiada le Besodeiah i capa Meshullam ten Jeshanah Kongka bawl haw hi. A zawlkhamin kongka a lepleh nung haw ten kongka khahnakah a kalhnakte bawl haw hi.
7 Gibeon mi Melatiah, Meronoth mi Jadon le Gibeon khua sung mi le Mizpah khua sungmi ten a zomin kulhtian cu tiang haw a, Eufrates Nitumnak peng uktu Ngamuktu Topa i inn tian lemleh haw hi.
8 A zomin sui sektu Harhaiah i capa Uzziel in lemleh hi.
A zomin namtui bawltu Hananiah in kulhtian Zalpi tiang lemleh hi.
9 Hur i capa Refaiah, Jerusalem peng a lang uktu pa in, a zomin kulhtian lemleh hi.
10 Harumaf i capa Jedaiah in kulhtian cu a zomin, a inn elno ta cu lemleh hi.
Hashabneiah i capa Hattush in, a zomin lemleh hi.
11 Harim i capa Malkhijah le Pahath Moab i capa Hasshub in, a zomin kulhtian le Thuangthu taitan tihmi lemleh hi.
12 Hallohesh i capa Shallum, Jerusalem peng a lang uktu bawi in, a zomin lemleh hi. (A canu ten bawm haw hi.)
13 Hanun le Zanoah khuasung ummi ten Munlawn Kongka lem haw hi. Kongkhahte bawllehin, a kalhnakte bawl haw, kulhtian cu pi thawng khat le za nga sung Buak Kongka tiang lemleh haw hi.
14 Rekhab capa Malkhijah, Beth Hakkherem peng uktu in, Buak Kongka cu lemleh hi. Kongkhahte cu lemin, a kalhnakte bawl hi.
15 Kolhozeh i capa Shallum, Mizpah peng uktu in, Ciktui Kongka lemleh hi. A humkhuhin, kongkate a bawl ceng ten a kalhnakte bawl hi. Kumpi huan zomtu Shelah Tuikhuk kulhtian cu lemlehin, David khuapi (Biakinn huan hanglamah ummi hi, Jerusalem khua masabel umnak mun hi) tolhsuknak kailawn tian bawl hi.
16 Azbuk i capa Nehemiah, Beth Zur peng a lang uktu in, a sangtu kulhtian cu lemlehin, David khan, tuikhuk le ngalkap tei umnak inn tian bawl hi.
Levi Mi Kulhtian Lemtute
17 A nuailam a, Levi miten kulhtian cu lem haw hi. Bani i capa Rehumin, a sangtu kulhtian cu lemleh hi.
Keilah peng lang uktu Hashabiah in, a peng sung ai-awhin, a sangtu peng cu lemleh hi.
18 Henadad i capa Bavvai, a dang Keilah peng lang uktu in, a sangtu kulhtian cu lemleh hi.
19 Mizpah uktu Jeshua capa Ezer in, a zomtu kulhtian ngal hiamnam bawlnak mai pen pang ning tian lemleh hi.
20 Zabbai i capa Baruch in, a sangtu kulhtian cu Thiampi Sang Eliashib inn tumnak kongka tian lemleh hi.
21 Uriah i capa le Hakkoz i tupa Meremoth in, a zomtu cu Eliashib inn tawpnak tianin bawl hi.
Kulhtian Lemtu Thiampite
22 Kulhtian lemlehtu tei lak pen a nuailam a thiampite teng haw hi.
Jerusalem khua elkim a thiampi ten kulhtian cu lemleh haw hi.
23 Benjamin le Hasshub in kulhtian cu amu inn mai zawntek lemleh haw hi.
Maaseiah i capa le Ananiah tupa Azariah ten a inn mai zawn haw tekah lemleh haw hi.
24 Hanadad i capa Binnui in, Azariah inn pen a ning kulhtian mawk tian lemleh hi.
25-26 Uzai i capa Palal in, a sangtu cu kulhtian ning le kumpi humta inn a, inn dawh kulhtian, inncingtu tei inn zawn pen lemleh haw hi.
Parosh i capa Pedaiah in, a zomin lemleh a, nisuahnak lam pen Tui kongka le biakinn cinnak tausangpi tian lem hi. (Hi cu biakinn satu tei umnak Ofel a tih haw mi khua elno ah hi.)
Nadektu Dadang
27 Tekoa khua miten kulhtian cu a zomin lemleh haw hi, a nadeh haw tum nihnak hi; biakinn cinnak inn taitan ngengpi mai pen Ofel el a kulhtian lemleh haw hi.
28 Thiampi hon khatin kulhtian a zomtu cu lemleh haw, Cipuh Kongka pen a saklamah amu inn mai zawntek lemleh haw hi.
29 Immer i capa Zadok in, a sangtu, ama inn mai zawnkek lem hi. Nisuahnak lam Kongka cingtu, Shekaniah capa Shemaiah in, a zomin lemleh hi.
30 Shelemiah capa Hananiah le Zalaf capa pa luknak Hanun in, a sangtu kulhtian cu a tum nihnakin lemleh hi.
Berekhiah i capa Meshullam in, a zomin ama umnak inn mai zawnkek lemleh hi.
31 Sui sektu Malkhijah in, a zomin kulhtian cu lem hi. A lepmi cu saklam, nisuahnak lam kulhtian kil humta khan tian, biakinn hawhnak kongka el a um, dawl bawltu le biakinn satu tei umnak inn tian bawl hi.
32 Sui sekte le dawl bawltu ten kulhtian cu a zomin, a ning khan pen Tuu Kongka tian lemleh hi.