2
Jerusalem Ah Nehemiah Hawh
1 Ni khat cu kumpi Artakzaksis in kumpi a deh kum sawm nihnak, ha masabel, kumpipa an a eih laihin sabittui pia ing. Hi laihngawl cu ka mitmai sia in ka um mu awng tukma.
2 Mah hangin, “Itakaw na khawngaih? Dam ngawl na hi mata na thasiatnak pa khat um tuk hi!” tin ti hi.
Ka thinsu zetin,
3 “Maw kumpi Topa, na nunkhua sau tahen! Ka pu le pa tei vuinak khuapi siatsuah khawngin le a kongkate halkang khawngin, a umlaihin, itin kaw thasia ngawlin ka um theih tuk?” tin ti ing.Ref 2:3 2Kum 25:8-10; 2Khang 36:19; Jer 52:12-14;
4 Kumpipa in, “I bawl nuam cim?” tin dong hi. Van a Pathian nelah thu ka nget nungten,
5 kumpi lakah, “Maw kumpipa, ka humah na lungdamin, ka ngetmi na pia tuk ahi tale Judah ngam, ka pu le pa tei vuinak khuapi ah hawhtik zalin; mah khuapi tungdingleh nuam ing hi,” tin ti ing.
6 Kumpinu cu a elah khungin, kumpipa in, “I tuk ten kikleh thei tuk kam, ngei ni cim?” tin dong hi. Ka ngei tuk hun ka hilh ten hah tukin a lungkim hi.
7 Kumpipa lakah, “Na lungkim ahi tale Judah ngam tian ka hawh theihnak tukin Eufrates nitumnak lam peng uktu Ngamuktu bawi tei lakah laingat sak zalin hi. Judah ngam ka hen laklawh a munah tuangno hawhtik haw tuk hi.
8 Kumpipa i tuipi thing cingtute Asaf lak pen Biakinn cinnak kulhtian inn kongkhah bawlnak tuk, khuapi kulhtian tuk le ka umnak inn tukin thing na piak theihnak tukin a lakah laingat sak zalin,” tin ngen ing. Mi hehpihnak neitu Pathian i khut cu ka lakah a um hangin, ka ngetmi hempoh cu kumpipa in pia khawng hi.
9 Kumpipa in, keimah hentu tukin ngalbawi khenkhatte le cipuh ngalkapte hahin Eufrates Nitumnak ngam lamah hawh ing. Ka hen ten mah peng uktu ngamuktu bawi tei lakah kumpipa i lai cu pia ing.
10 Beth Horon khua mi Sanballat le Ammon mi bawi pa khat Tobiah in, Israel tei phatnak le nemcuamnak vaihawm tukin mi pa khat hung hi, tih a zak haw ten lungnop ngawl zetin um haw hi.
11 Jerusalem khuapi ah hengin, ni thum sung cawl ing.
12 Jerusalem khua ca nadek tukin Pathian ka lungmu sung a hilhmi cu kuamah hilh mang. Zanlaih tak tho in, ka ngualcam mi demno tuah hawh ung. Imah keng mang, ka khunmi cipuh pa khat bek keng ing.
13 Nitumnak lam Munlawn Kongka pen tul ing; mahten hanglamah hawhsukin, Ngulpi Ciktui pen Buak Kongka ka hen hei ten khuavak ma laih hi. Ka hawh thahin, khuapi kulhtian a sia mite le mei tuah a haal khawng haw mi kongkate cu zo pepel ing.
14 Hawhto in, Ciktui Kongka le Kumpi Tuitingah heng ing. Ka khunmi cipuhin, a cimmi suang le thing lakah lampi mu zo ma hi.
15 Mah hangin Kidron munlawn sungah tolhsukin, cipuh hum pen kulhtiante cu zo pepel ing. Ka hawh patnak mun heng kiklehin, Munlawn Kongka pen khuapi sungah tumleh ing.
16 Bawi pa khat hei in, ilai hawhin, i bawl ing tih thei haw ma. Judah mite, thiampite, a hotute, a bawite le nadehnak a teltu tukte pa khat hum hei ah imah awn ma laih ing.
17 Atu-in, a lak hawah hi bangin hilh ing. “Jerusalem khua cu sia khawngin, kongkate haal khawng a hih hangin izah haksatnak sungah um hung tih cu mu uh ci. Khuapi kulhtian cu tungdinglehin, a thangnaunak uh hi paitik nung,” tin ti ing.
18 Pathian in keimah a umpih dan le a bopnakte hilhin, kumpipa i ngatte vang hilh khawng ing.
“Tho in tungdingleh nung,” ti haw hi. Timtuah nadeh cu pan paih haw hi.
19 Sanballat, Tobiah le Arabia mipa Geshem a tih haw mi in, ka thil bawl tum uhmi cu a zak haw ten nuihsanin, “I bawl tukin, ngaisung nge uh cim? Kumpi langpang tuk ung ti uh cim?” tih tianin zawnsak haw hi.
20 Kei in, “Van a Pathian in lawhtinnak pia tuk poh hi. Kohte cu a sila hi ung, a sia mi cu saleh tuk poh ung hi. Mahnaven noh cu Jerusalem ah covo nei ma uh ci, thu hei nei ma uh ci, ham tuk imah nei ma uh ci,” tin ti ing.