7
Mawhnak Ca Biakpiaknak
1 A nuailam a daan hi mawhnak ca biakpiaknak hi. Hi biaknak cu a thiangzet mi biakpiaknak hi.
2 Halkang biakpiaknak a, man mi ngante a ngawhnak haw mun, biaklandawh saklam mawkah hi biakpiaknak ngan cu ngo in, a thi cu biaklandawh ningli ah noih hi tuk hi.
3 A thau hempoh cu la in biaklandawh humah biakpiaknakin man hi tuk hi; a mei uum thau, a sungngil hum a kopmi a thau.
4 A kal le a kal hum a kopmi thau le a thinkak a, thau hi tuk hi.
5 A thau hempoh cu Topa i nelah halkang biakpiaknakin piakmi a hih hangin thiampi in biaklandawh humah haal tuk hi. Hihi cu mawhnak biakpiaknak bawlmi hi.
6 Thiampi hin pano in ei thei tuk hi. Mahnaven biakpiaknak thiangtho a hih hangin mun thiangtho sung hihimah ei haw tuk hi.
7 Sualhah biakpiaknakah hihen, mawhnak biakpiaknakah hihen, bangten man tukmi daan pa khat cu biakpiaknak a, man mi cik cu biakpiaknak a bawltu thiampi ta hi haw hi.
8 Halkang biakpiaknak a, piakmi ngan i vun cu biakpiaknak a bawltu thiampi ta hi.
9 Cangho emnak a, em mi hihen, suankang ahimata thik beel a, phan sa an tuah biakpiaknak hempoh cu Pathian lakah a piatu thiampi ta hi.
10 Mahnaven phan ngawlmi le huan ngawlmi an tuah biakpiaknak hempoh cu a ko mi ahi vangin, situi tuah cawhhelmi ahi hei in Aaron hin thiampi teita a hih hangin bangten sem haw tuk hi.
Pawlkom Biakpiaknak
11 Topa i lak a, piakmi pawlkom biakpiaknak a bawl haw ten a nuailam a daan hi zui haw tuk hi.
12 Mi pa khatin, a lungdamnak Pathian nelah phuang nuamin biakpiaknak a bawl tale, biakpiaknak ngan le naman hel ngawl cangho tuah bawl tuk hi. Cangho cu cangho vam tuah bawlmi olif thau tuah cawhhelmi, sahzet a, bawlmi ahimata olif thau tuah cawhhelmi hi tuk hi.
13 Mah hum pen naman cawhhel ngawlmi cangho em pia tuk hi.
14 Cangho nam khat pen demno ten a cuangce laksawng tukin Topa i nelah pia tuk hi; mahmi cu biaklandawh humah sathi a thehtu thiampi ta hi tuk hi.
15 A ngawh ni haw in, a cik cu ei hihim haw tuk hi; a zing tian tangtik i haw tukma hi.
16 Mi pa khatin thutep a kimtiknak tukin pawlkom biakpiaknak bawlin; ahimata ama lungtho in, a piakmi biakpiaknak a pia tale, a ngawh ni haw in, a cik cu ei haw tuk hi, eih bang a um tale, a zingten eih khawng hi tuk hi.
17 A ni thumnak tian a tangmi cik cu haal khawng haw tuk hi.
18 A ni thumnak tian a tangmi cik cu a ei haw tale mahpa i biakpiaknak cu Pathian in sang tukma hi. A piaknak cu biakpiaknakin sial theih tukma hi, thil nawngkai in sial hi tuk a, a ei tu cu a sualman thuak tuk hi.
19 Mah biakpiaknak cik cu thil thiang ngawl tuah a tawng khadun haw tale, eih hi tukma hi. A venghawngin haal khawng hi tuk hi.
Mah cik cu mithiang ten ei thei tuk hi.
20 Mahti bang lengin mithiang ngawl ten a ei haw tale, Pathian i mi nam sungah sialcih hi haw tukma toh hi.
21 Mah i hum pen mihing hihen, ngan hihen, a thiang ngawl mi thil pa kha khat a zen nungten, hi biakpiaknak cik a ei tale, amah cu Pathian i hinnam sungah sialcih hileh tukma toh hi.
22 Topa in Israel tei ca in,
23 A nuailam a, daan hi Moses nelah pia hi. Khui thau hihen, tuu thau hihen, ahimata keel thau vang hihen, ei haw tukma hi.
24 Amahno in, a thi cawm mi, ahimata sahang i matmi ngan i thau vang ei hihim haw tukma hi. Mahnaven kincak dang a kulnakah mang thei haw tuk hi.
25 Topa i nelah mei tuah halin piakmi nganhing thau a ei tu cu Pathian miphun sungah sialcih hi tukma toh hi.
26 Mahbek sial ngawlin ilai banglaiah na um hei in, vano i thi hei hihen, nganhing thi hei hihen ei hihim pahsuh un.Ref 7:26 Pian 9:4; Thiam 17:10-14; 19:26; Daan 12:16, 23; 15:23;
27 Akua hei hihen thi a ei kha tu cu Pathian miphun sungah sialcih hi tukma toh hi.
28 Topa in Moses lakah, a nuailam a daan hi,
29 Israel tei ca tukin pia hi. Kua hei hihen pawlkom biakpiaknak a pia atu-in, a piakmi khenkhat cu a cuangin Topa i nelah laksawngin pia tuk a,
30 ama khut loli in cawi in pia hen hi. Ngan i thau cu a awm tuah hunpihin, laksawng a dangno in Topa i nelah pia tuk hi.
31 A thau cu thiampi in biaklandawh humah haal tuk hi. Mahnaven a awm cu thiampi teita hi.
32 A taklam kawng cu pawlkom biakpiaknak thau le thi, Topa i nelah a piatu thiampi lakah,
33 a dangno in piakmi laksawng hi tuk hi.
34 A awm sa cu laksawng a cuangin, na piakmi hi a, taklam kawng cu Israel tei lak pen, Topa in la in, thiampi tei nelah pia hi tih langtiknakin piakmi hi. Hi cu Israel miten a piak leleng haw tukmi hi.
35 Hihi cu Topa i thiampi dek tukin apdun ni-in, an tuah biakpiaknak sung pen Aaron le a capa tei covo hi.
36 Mah ni-in, Topa in Israel tei lakah hi biakpiaknak sung pen thiampi piak tukin thu a piak mi hi. Hihi cu khang khat nung khang khat Israel miten a zui haw tukmi daan hi.
37 A humlam a daan hi halkang biakpiaknak, an tuah biakpiaknak, sualhah biakpiaknak, sual biakpiaknak, sathau thih biakpiaknak le pawlkom biakpiaknak ca in piakmi daan hi.
38 Sinai Mualhum pen Pathian in, Moses lakah, hi daan cu phillawn ngamkhing a, Israel tei bawl tuk biakpiaknak thu a hilh ni-in, a piak mite hi.