8
Aaron le A Capate Sathau Thihnak
(Suah 29:1-37)
1 Topa in Moses nelah,
2 “Aaron le a capate cu Thukham koihnak Puanbuk kongka ah hawhpih inna, thiampi thuam, sathau thih tuk situi, sualhah biakpiaknak tukin khuicangno pa khat, tuucang pa nih le naman hel ngawl cangho bawm khat hunpihin hi.
3 Israel mi venghawngin mah laih munah na sam khawngin,” ti hi.
4 Topa i thu piaknak bangin Moses in bawlin, a venghawng haw in, a khop khawm ceng haw ten,
5 Moses in, “Ka bawl mite hi Topa i thupiaknak bangin,” ti hi.
6 Moses in Aaron le a capate cu mailamah tulpihin thiannak tukin tisomtik hi.
7 Aaron cu angki silhtawn le angki cualpi silhtikin, taikennak tuah a tai sawm hi. Angki sau thiangtho silhtikin, mawi zetin tak mi taikhap khap hi.
8 Mah nungten awmbelh belhtikin, a sungah Urim le Thummim koih hi.
9 Topa i thupiak bangin lupawng pawngtikin, a lupawng i mailamah, “ Topa i lakah piakmi,” tin melciknak suipek belh hi.
10 Moses in sathau noihnak tuk situi cu la in, Topa i umnak Puanbuk le a sung a, um na hempoh cu noih khawngin, a venghawngin, Topa i lakah thianthohtik mi in suak haw hi.
11 Topa tatuk thianthohtik tukin Moses in sathau khenkhat cu la in, biaklandawh a nate, maihum le a khunnak cu vei salih tian theh hi.
12 Moses in Aaron cu sathau thihnak pia in, a lu ah sathau theh hi.
13 Mah nungten Moses in Aaron i capate cu mailamah tulpih a, angki cualpi silhtikin, a tai hawah tai sawmnak tuah kenin Topa i thupiakmi bangin a lu humah lukhu khihsak hi.
14 Sualhah biakpiaknak tukin khuicang cu Moses in kai in, Aaron le a capa ten khuicang i lu humah a khutsuan haw hi.
15 Moses in khuicang cu ngo in, a thi khenkhat a lak ceng ten, Topa i nelah thiantikin hi, tihnakin biaklandawh kil humah thi cu a khut zung tuah noih hi. Mahceng ten a tangmi thi cu biaklandawh bulah leih hi. Moses in Topa i nelah pia in biaklandawh cu thiangtik hi.
16 Moses in, a sungngil hum a, thau hempoh, a kal, a kal hum a thau le a thinkak hum a thau cu la in, a venghawngin biaklandawh humah haal khawng hi.
17 Topa i thupiaknak bangin a taksa dang hempoh a cik, a vun, a sungngil cu a ngiahnak haw pualamah haal khawng hi.
18 Mahceng ten Moses in halkang biakpiaknak tuk khuicang cu hunpihin, Aaron le a capa ten tuucang lu humah a khutnga haw hi.
19 Moses in tuucang cu ngo in, a thisan cu biaklandawh i a mawk ningli ah theh hi.
20-21 Tuucang cu lem khawng a, tui tuah a sungngil le a nunglam ke somciangin, Topa i thupiaknak bangin tuucang sa hempoh, a lu le a thau tuah biaklandawh humah mei in haal hi. Hi halkang biakpiaknak cu an luih biakpiaknak a hih hangin, Topa i ca in namtui mi hi.
22 Mahten thiampi sathau thihnak tukin man tukmi tuucang pa nihnak cu Moses in hunpihin, Aaron le a capa ten tuucang i lu humah a khutsuan haw hi.
23 Moses in tuucang cu ngo in, a thi khenkhat la a, Aaron i taklam beng lekah le a taklam khutpi le a taklam kepi noih hi.
24 Aaron i capate cu mailamah tultikin, tuucang thi khenkhat cu a taklam beng lek, khutpi le a taklam kepi ah noih hi. A tangmi thi cu Moses in biaklandawh i ningli ah theh hi.
25 A thau, a mei uum thau le a sungngil tuamtu thau hempoh, a thinkak hum a thau, a kal le a kal hum a thau le a taklam kawng la hi.
26 Topa i lak a, piakmi naman hel ngawl cangho bawm sungta cangho zawl khat, situi tuah bawlmi cangho zawl khat le a em haw mi cangho pano phel khat cu la in, tuucang thau le a taklam kawng humah koih hi.
27 Hi hempoh cu Aaron le a capa tei khutah pia in, amuh ten, Topa i nelah a cuangin laksawngin pia haw hi.
28 Mah nungten Moses in mah an cu la in, halkang biakpiaknak hum a, sathau thih biakpiaknak tukin biaklandawh humah haal hi. Hi biakpiaknak cu an luih biakpiaknak a hih hangin Topa i nelah namtui mi hi.
29 a awm cu Moses in la in, a cuang a piakmi laksawng tukin Topa i lakah pia hi. Hi cu sathau thihnak tuucang sa sung pen Moses i covo hi. Topa i thupiaknak bangin Moses in bawl khawng hi.
30 Sathau thihnak situi le biaklandawh hum a, um sathi khenkhat cu Moses in la in, Aaron le a capa tei puan a silh haw mi humah theh hi. Amuh le a puansilhte cu Topa i nelah thiangthotik hi.
31 Moses in Aaron le a capa tei nelah, “Sa cu Topa i umnak Puanbuk kongka pen huan unna, Topa in, na bawl tuk uh thu a piak zo bangin sathau thih ni-in, a piakmi biakpiaknak bawm sung a um cangho tuah mahlaiah ei un.
32 Na khambang uhmi cik le an cu haal khawng un hi.
33 Sathau thih biakpiaknak na celh uh laklawh Puanbuk tumnak kongka ah ni salih sung tulsan ngawlin um leleng un hi.
34 Na sualhahnak tukin tuni a bawl uhmi hi bawl tukin Topa in, ka lakah thu a piakmi hi.
35 Topa i thupiakmi cu bawl unna, Puanbuk tumnak kongka ah ni salih sung a sun a zanin, na um un hi. Mahti bangin na bawl uh ma tale thi tuk uh ci. Himi hi, Topa in ka lakah thu a piakmi,” ti hi.
36 Mah hangin Topa in Moses tawnin, a thupiakmi cu Aaron le a capa ten cangkimno in bawl khawng haw hi.