6
1 Topa in, a nuailam a daan cu Moses lakah pia hi.Ref 6:1 Mipum 5:5-8;
2 Mi pa kha khat nelah a ngualcam pihin sum kemtikin, a kemtu pa in, a pialeh nuam ma tale, a ngualcam lak pen na a ngu in hei hihen, a innnel a zol tale,
3 mah ahimata thilpai khul na pi in, khul mang hi tin, imin thu a tiam tale, Topa i mai ah misual a hih hangin biakpiaknak a bawl kul hi.
4-5 Hiti bangin sual ahi tale, a dik ngawlin a ngahmi a hih hangin kuanleh hihim tuk hi. Mawh hi tin, a theih ten a neitu pa i nelah cangkimno in, a loh khawng hum pen a valin za ah sawm nih bet tuk hi.
6 A sualhah biakpiaknak tukin thiampi nelah sonbang ngawl tuucang ahimata keelcang hunpih tuk hi. A man cu upa tei ciangtan bangin hituk hi.
7 Mahpa i sual hangin biakpiaknak cu thiampi in pia tuk a, ngaihdam hi tuk hi.
Halkang Biakpiaknak
8 Topa in,
9 Aaron le a capa tei halkang biakpiaknak a bawl haw ten, a nuailam a, daan hi zui tukin Moses nelah thupia hi. Halkang biakpiaknak cu zankhua in biaklandawh humah zamta hi tuk a, meimit ngawlin alhtik leleng hi tuk hi.
10 thiampi in, a bawngbi comno le a angki cualpi a silh nungten biaklandawh humah halkang biakpiaknak vut cu la in, biaklandawh mawkah koih tuk hi.
11 Mah nungten a puansilh thekin, vut cu a ngiahnak haw pualam munthiangah koih tuk hi.
12 Biaklandawh hum a, mei cu alhtik leleng hi tuk a, mit awng hihim tukma hi. Zingsialin thiampi in thingbetin halkang biakpiaknak a tuangtim nungten lemnak biakpiaknak a, sathau cu haal tuk hi.
13 Biaklandawh hum a, mei cu mit ngawlin alhtik leleng hi tuk hi.
An Tuah Biakpiaknak
14 An tuah biakpiaknak tukin daan cu a nuailam bangin hi. Aaron hin thiampi in an tuah biakpiaknak cu Topa i nelah biaklandawh maiah bawl tuk hi.
15 A venghawngin Topa i nelah piakmi hi tih langtiknakin, cangho vam khut khat dim, situi le namtui a venghawng la in, biaklandawh humah haal tuk hi. Hi biakpiaknak cu Topa i nelah a namtui mi biakpiaknak hi.
16 A tangmi hempoh cu thiampi ten ei haw tuk hi.
17 Naman hel ngawlin em haw tuk a, halkang biakpiaknakah thiampi covo tukin Topa i piakmi hi. Sualhah biakpiaknak le mawhnak ca biakpiaknak bangin a thiang zetmi hi bok hi.
18 San khat nung san khat Aaron hin pano hempohin, Topa i lakah biakpiaknak an cu kumkhua in, a covo haw a hih hangin ei thei haw tuk hi. Mi pa kha khat ahimata thil pa kha khatin, Topa i lakah piakmi a zen tale, a thianthohnakin, a zentu cu siatsuah tuk hi.
19 Topa in, a nuailam a daante cu,
20 Aaron hin thiampi sathau thihnak a co haw ten zui tukin Moses lak a, piakmi hi. Sathau thih a hih ni haw ten Topa i nelah cangho vam leel khat pia haw tuk hi. Nisial an tuah biakpiaknak a piak mi zahin hi tuk hi; zinglamin, a lang, taklamin, a lang pia haw tuk hi.
21 Situi tuah cokhelin suankang sungah a phan nung haw ten deng haw tuk a, an tuah biakpiaknak a, piakmi hi tuk hi. Mahmi cu Topa i ca in, a namtui mi hi.
22 Khang khat nung khang khat, Aaron hin tei Thiampi Sang a deh sial ten hi biakpiaknak cu bawl leleng tuk hi. Mah biakpiaknak cu a bo tianin, halmi Topa i nel a biakpiaknak hi tuk hi.
23 Thiampi i piakmi an tuah biakpiaknak cu demno hei ei ngawlin a venghawngin haal khawng hi tuk hi.
Sualhah Biakpiaknak
24 Topa in Moses lakah,
25 Aaron le a capa ten a nuailam a daante cu sualhah biakpiaknak a bawl haw ten a zui haw tukin pia hi. Sualhah biakpiaknak tukin ngan a ngawh haw ten, halkang biakpiaknak a, ngan a ngawhnak haw biaklandawh pen saklam mawkah ngo haw tuk hi. Hi sualhah biakpiaknak cu thiangtho zetmi hi.
26 Hi biakpiaknak a bawltu thiampi in biakpiaknak cik cu, Topa i umnak Puanbuk up sung, munthiang sung pen ei tuk hi.
27 Mi pa kha khat mahma tale thil pa kha khatin hi biakpiaknak cik cu a zen kha sual tale, cik thiangtho a zen hangin siatsuahnak tawk tuk hi. Hi sathi in puan a noih kha sual tale, mah puan cu munthiang sung pen sawp tuk hi.
28 Hih cik huannakah leibeel a mang haw tale, mah beel cu sukkeh khawng hi tuk hi. Mahnaven thik beel a mang haw tale nase zetin nawtin tui tuah teuh haw tuk hi.
29 Thiampi i unau pih pano ten hi cik cu ei thei bok haw tuk hi. Hi cik cu cik thiangthozet hi.
30 Mahnaven sualhahnak tukin tin sathi khenkhat cu Puanbuk sungah a henpih haw tale mah biakpiaknak cik cu eih tuk hihim hi ma hi. Mei tuah haal khawng hi tuk hi.