5
Sualhah Biakpiaknak Bawl Kul
1 A nuailam a, sualnak hangin sualhah biakpiaknak bawl kul hi.
Akua hei hihen amuh mi le a zakmi hilh tukin thusonnak munah samin, a sonnuam ma tale, a humah mawhnak um tuk hi.
2 Kua hei hihen ama zulzaunak hangin, saluang tih bang a thiang ngawlmi a zen kha sual tale amah cu mithiang ngawl a hih hangin, a thil bawlmi a theihbek ten a humah mawhnak um tuk hi.
3 Kua hei hihen ama zulzaunak hangin mihing i thianthoh ngawlnak a zen kha tale, thianthoh ngawlnak a theihbek ten a humah mawhnak um tuk hi.
4 Kua hei hihen a sia le pha, ngaisungta ngawlin, tamsiatnak tuah thu a tiam zuzung tale, iti bang thu ahi vangin a bawlmi a theihbek ten a humah mawhnak um tuk hi.
5 Hi thu pa kha khat i hangin pa kha khat cu mawhnak a nei tale mawhnak cu phuang hihim tuk hi.
6 Sualhahnak tukin thiampi in biakpiaknak bawlsak tuk hi.
7 Tuu hihen, keel hihen a pia thei ma tale, a sual biakpiaknak tukin khulo pa nih ahimata laileng pa nih, Topa i nelah pia tuk hi; pa khat cu sualhah biakpiaknak tuk hi in, a dang pa khat cu halkang biakpiaknak tuk hi.
8 Thiampi nelah hunpih tuk a, thiampi in, a masa in, a vano pa khat cu sualhah biakpiaknakah pia tuk a, khenkhat cu biaklandawh mawkah theh tuk hi. A lu tawng ngawlno in, a ngawng melh tuk hi.
9 A thi khenkhat cu biaklandawh mawkah theh tuk hi. A tangmi thi cu biaklandawh bulah caktik khawng tuk hi. Hi biakpiaknak cu sualhahnak tukin hi.
10 Mahten a pa nihnak vano cu halkang biakpiaknak tukin, a daan bangin thiampi in pia tuk hi. Mahti bangin mi pa khat i sualnak hangin thiampi in biakpiaknak bawl tuk a, sualnak cu ngaihdam hi tuk hi.
11 Mahpa in, khulo pa nih, ahimata, laileng pa nih hei a pia thei ma tale, a sualhah biakpiaknak tukin sangvut vam leel khat hunpih tuk hi. An tuah biakpiaknak hi ngawlin, sualhah biakpiaknak a hih hangin, olif situi leih ngawlin namtui vang cokhel tukma hi.
12 Cangho vam cu thiampi nelah hunpihin Topa i lakah cangkimno in piak khawng hi tih langtiknakin thiampi khut khat dim la in, biaklandawh humah haal tuk hi. Hi cu sualhah biakpiaknak hi.
13 Mahti bangin mahpa i sualnak hangin thiampi in biakpiaknak bang lengin, a tang laihmi cangho vam cu thiampi ta hi.
Mawhnak Ca Biakpiaknak
14 Hi daan cu Topa in Moses nelah pia hi.
15 Akua hei hihen sual tukin tuptahnak nei ma naven Topa i nelah piak tukmi na thiangthote a pia ma tale, a mawhnak biakpiaknak tukin sonbang ngawl tuucang pa khat Topa i nelah pia tuk hi. A man cu upa tei ciangtan mi bangin hituk hi.
16 A piak ngawlmi Topa i na thiangtho cu kuan lehin, mah humah a valin, za ah sawm nih kuan tuk hi. Tuucang cu thiampi nelah pia tuk a, mahpa i mawhnak hangin thiampi in biakpiaknak bawlin, a mawhnak cu ngaihdam hi tuk hi.
17 Mi pa kha khatin tuptah himnak nei ngawlin Topa i thukham pa kha khat a palcat kha sual tale, sual hi tih a thei ngawl hei in, a sualman thuak tuk hi.
18 Thiampi nelah mawhnak biakpiaknak tukin sonbang ngawl tuucang, ahimata keelcang pia tuk hi, a man cu upa tei ciangtan bangin hituk hi. Mahpa i mawhnak hangin thiampi in biakpiaknak bawl tuk a, mah cu ngaihdam hi tuk hi.
19 Hihi cu Topa i humah a sual hangin, sual dantat biakpiaknak bawlmi hi.