4
Sualhah Biakpiaknak
1 Topa in, Moses lakah,
2 Israel tei lakah hitih bangin hilhin ti hi; mi pa kha khat cu sualin, Topa i thupiak zui ngawlin a um tale, a nuailam a, daan hi zui tukin thupia hi.
3 Sathau thihmi Thiampi Sang cu sualin Israel tei nelah sualnak a hen tuk tale, a sualhahnak tukin sonbang ngawlmi khuicang hunpihin, Topa i lakah biakpiaknak bawl tuk hi.
4 A khuicang cu Topa i umnak Puanbuk kongka ah hawhpihin, a khui lu humah a khutsuan tuk a, Topa i mai ah a khui cu ngo tuk hi.
5 Thiampi Sang in, a khui thi khenkhat cu la in, Puanbuk sungah hawhpih tuk hi.
6 Mah thisan sungah a khut mikawk nimin, a thiangmi puanzak maiah vei salih tian thi cu theh tuk hi.
7 Puanbuk sung a, namtui halnak biaklandawh khuamki tei humah mah thi khenkhat cu noihin, a tanglaih mi thi cu Puanbuk sung tumnak a, ummi halkang biakpiaknak tukin man mi biaklandawh bulah leih khawng tuk hi.
8 Hi khui i thau hempoh, a sungngil tei thau le,
9 a kal le a kal hum a, kopmi thau le a thinkak hum a, thau pholh khawng tuk hi.
10 Lemnak tuk biakpiaknak a, man mi khuicang a ngawh haw mi i thau la khawngin, a haal haw bangin thiampi in hi khuicang i thau cu la in halkang biakpiaknak biaklandawh humah haal tuk hi.
11 Mahnaven, a vun, a cik hempoh, a lu, a ke le a sungngil hempoh la tuk a,
12 a ngiahnak haw mun pen khuahial pualam, vut a leihnak haw humah haal tuk hi.
13 Topa i thukham pah kha sualin, theih ngawlnak hangin a sualtu cu Israel mipi a venghawng haw tale,
14 a sualnak haw cu a theihbek ten sualhah biakpiaknak tukin khuicangno pa khat hunpih haw tuk hi. Topa i umnak Puanbukah hunpih haw tuk a,
15 Israel mi puitu ten a lu humah a khut haw suanin, mah laih munah ngo haw tuk hi.
16 Thiampi Sang in khui thi khenkhat cu Puanbuk sungah hunpih tuk a,
17 mah thisan sungah a khut mikawk a nipsuk celh ten puanzak maiah vei salih tian theh tuk hi.
18 A thi khenkhat cu Puanbuk sung a, um namtui halnak biaklandawh khuamki tei humah noihin, a tangmi thi cu Puanbuk tumnak a ummi, halkang biakpiaknak biaklandawh bulah leih khawng tuk hi.
19 a thau hempoh cu la in biaklandawh humah haal tuk hi.
20 Sualhah biakpiaknak khuicang a bawl bangbokin hi khuicang vang cu Israel tei sualnak hangin thiampi in biakpiaknak bawl tuk a, ngaihdam hi tuk hi.
21 Amah thiampi in sualhahnak khuicang a bawl bang lengin, hi khuicang vang cu la in, a ngiahnak haw pua leu lamah hawhpihin haal tuk hi. Hi cu mipi tei sualhah biakpiaknak bawlmi hi.
22 Topa i thukham cu ngamuktu in pahvawkin, a sual kha pang tale,
23 a sualnak a theihdun bek ten, sonbang ngawlmi keelcang pa khat biakpiaknak tukin hunpih tuk hi.
24 Keelcang i lu humah a khutnga tuk a, halkang biakpiaknak ngan a ngawhnak haw biaklandawh i saklam mawkah ngo tuk hi. Hi cu sualhahnak tukin biakpiaknak hi.
25 Keelcang i thisan cu thiampi in, a khut mikawk tuah tok tuk a, biaklandawh ki tei humah noih tuk hi. A tangmi thisan cu biaklandawh bulah leih khawng tuk hi.
26 lemnak biakpiaknak a piak haw mi ngan tei thau a halkang bangin keelcang thau hempoh cu biaklandawh humah haal tuk hi. Mahti bangin puitu i sualnak hangin thiampi in biakpiaknak pia tuk a, puitu cu a sual ngaihdam hi tuk hi.
27 Israel mi lak pen mi pa kha khat tuptahmi nei ngawlin sual kha in, Topa i thukham a palcat kha tale,
28 a sual a theihdun bek ten sonbang ngawlmi keelnu cu hunpih tuk hi
29 Mah keelnu i lu humah a khutsuanin, halkang biakpiaknak a, ngan a ngawlnak haw biaklandawh pen saklam mawkah ngo tuk hi.
30 Mah thisan sungah thiampi in, a khut mikawk tuah tok tuk a, biaklandawh khuamki humah noih tuk hi; a tangmi thi cu biaklandawh khuamki bulah noih tuk hi.
31 lemnak biakpiaknak cik i thau a lak haw bangin a thau la khawngin Topa i deihmi namtui hi tukin, biaklandawh humah haal tuk hi. Mahti bangin mahpa i sual hangin thiampi in biakpiaknak bawl tuk a, mahpa cu a sual ngaihdam hi tuk hi.Ref 4:31 Mipum 15:27-28;
32 Mi pa khatin, a sualhahnak tukin tuu pa khat a hunpih tale, a nu sonbang ngawlmi hi tuk hi.
33 Mah tuu i lu humah a khutsuan tuk a, halkang biakpiaknak tuk a ngawhnak, biaklandawh pen saklam mawkah ngo tuk hi.
34 Mah ngan i thi sungah thiampi in, a khut mikawk tuah tok tuk a, biaklandawh i khuamkil tei humah noih tuk hi, a tangmi thi cu biaklandawh bulah leih khawng tuk hi.
35 Lemnak biakpiaknak cik, a thau a lak haw bangin, thiampi in, a thau la khawng tuk a, halkang biakpiaknak a piak haw mi an tuah Topa pia tuk a, biaklandawh humah haal tuk hi. Mahti bangin mahpa i sualhahnak tukin thiampi in biakpiaknak bawl tuk a, mahpa cu ngaihdam hi tuk hi.