27
Topa Nelah Piakmi Daan
1 A nuailam a daan cu,
2 Topa in Israel tei zui tukin Moses lakah a piakmi hi. Thutepdun a kimnak tukin mi pa khat cu Topa i nelah piaksa mi a hih nungten suakca a nuamleh tale, a nuailam a, sum le pai pia haw hen hi.
3 Pano upa, kum sawm nih le kum sawm luk laklawh ten ngun tangka sawm nga pia hen hi.
4 Numei cu ngun tangka sawm thum pia hen hi.
5 Khang dawn pano, kum nga le kum sawm nih laklawh ten ngun tangka sawm nih pia hen hi. Numei cu cang sawm pia hen.
6 Kum nga nuai pano naupang cu ngun tangka cang nga pia tuk hi. Numei cu cang thum pia hen.
7 Pano kum sawm luk hum cu ngun tangka sawm le cang nga pia tuk hi. Numei cu ngun tangka cang sawm pia hen hi.
8 Tamsiatnak thutiam bawl naven ca-ngah zetin sum piak tuk a nei ma tale amah cu thiampi lakah hawhpihin, a piak theih zah tuk tianin thiampi in kiamsak tuk hi.
9 Thutepnak a bawlmi cu Topa i santak ngan piak tuk ahimata mah ngan cu a thiangthomi a hih hangin,
10 thutepnak a bawltu in ngan dangin thek pahsuh hen. A thek tale ngan a pa nihin, Topa ta hi tuk hi.
11 Mahnaven Topa i lakah tepmi ngan cu sonbangmi le a thiangtho ngawlmi ahimata a neitu in mah ngan cu thiampi nelah hawhpih tuk hi.
12 Mah ngan a pha le pha ngawl zo in, thiampi in aman ciangtan tuk a, ciangtanmi man cu kuamah in thekleh thei haw tukma toh hi.
13 A piatu in, a tanleh nuam tale aman zah i humah za ah sawm nih pia tuk hi.
14 Mi pa khatin, Topa i nelah a inn a pia tale inn pha le pha ngawl zo in, thiampi in aman ciangtan tuk a, kuamah in thek thei haw tukma toh hi.
15 Inn a piatu in, a tanleh nuam tale aman zah i humah za ah sawm nih pia tuk hi.
16 Mi pa khatin Topa i nelah a leingam khenkhat a pia tale anci i zong cinnak mun him tih zo in, aman cu ciangtan tuk a, barli cangci seu khatah ngun tangka cang sawm zinin tuat hi tuk hi.
17 A lei ngam cu Jubilee kum bo bek ten piakmi ahimata aman cu a ciangtan zah haw in hi tuk hi.
18 Jubilee kum bo nungten piakmi ahimata mai a, Jubilee kum a kim laih ngawl sung a, kum cu sialin, thiampi in aman tuatin kiam tuk hi.
19 Leingam a piatu pa in, a tanleh nuam tale aman zah i humah za ah sawm nih pia tuk hi.
20 Topa i lak pen tan masa ngawlin midang nelah a zuak tale tatleh theihnak a neihmi cu sung tuk hi.
21 Mai Jubilee kum a kim ten mah leingam cu a kumkhua in Topa i leingam hi tuk a, thiampi teita hi tuk hi.
22 Mi pa khatin, a leicopmi lei ngam Topa i lakah a pia tale,
23 mai Jubilee kum tian a kum tuatin, thiampi in, a man ciangtan tuk a, mahpa in mah ni-in pia tuk hi, mah sumpai cu Topa ta hi.
24 Jubilee kum ten mah lei ngam cu amasa neitu pa i lakah ahimata a casuan tei nelah kikleh hi tuk hi.
25 Thil man hempoh cu biaknak lam a, zapi man lih zo mi, soncatnak bangin hi khawng tuk hi.
26 Kuamah in ngan catawntil cu a thatuinak tuah biakpiaknakin Topa i nelah pia haw pahsuh hen; itahim titale mah catawntil cu Topa ta in umsa zo hi. Khuino, tuuno, le keelno cu Topa ta hi.
27 Mahnaven a thiangtho ngawlmi ngan tei catawntil cu a ciangtan zah man le za ah sawm nih tuah tanleh thei haw tuk hi. A neitu pa in, a tanleh ma tale midang nelah aman ciangtan zahin zuak hi tuk hi.
28 Topa i nelah pumpia in piaksa mi cu mihing hihen, ngan hihen, leingam hihen, kuamah in tanlehin, zuakleh thei haw tukma hi. A kumkhua in Topa ta hi zo hi.Ref 27:28 Mipum 18:14;
29 Mihing hei pumpiakmi Topa i nelah piaksa mi cu tatleh tukmi kha ma hi, thah tuk hi.
30 Na lo uh pen a suakmi an le thingngah sung pen seh sawm seh khat cu Topa i ca in, a thiangthomi hi.Ref 27:30 Mipum 18:21; Daan 14:22-29;
31 Mi pa khatin mah cu a tan nuam tale, a ciangtan haw zah aman le za ah sawm nih pia tuk hi.
32 Ngan vang sawm sungah pa khat cu Topa ta hi. Ngan na sial uhten a sawmnak cu Topa ta hi.
33 Mahti bangin na sial uhten a sawmnak cu a nawmtambel tukin a neitu pa in ngaisung pahsuh hen; tensa mi in ai-awhtu vang nei thei haw tukma hi. Ngan pa khat cu adang tuah a thekdun tale ngan a pa nihin, Topa ta hituk a, tatleh theih hei hi tukma toh hi.
34 Hi daan cu Sinai Mual hum pen Topa in Israel tei ca in Moses nelah a piakmite hi.