26
Daan Zuitu Ca Muicu
(Daan 7:12-24; 28:1-14)
1 Topa in, “Biak tukin milim hihen, suangphut hihen, suang tuah bawlmi zuk hihen seekmi suang milim hihen bawl pahsuh un. Keimah cu Topa na Pathian uh ing.Ref 26:1 Thiam 19:4; Suah 20:4; Daan 5:8; 16:21-22; 27:1;
2 Ka Sabbath ni cu cang unna, keimah biaknak mun thiangtho cu upat un hi. Keimah cu Topa ing.
3 “Ka daan le ka thupiakmi na zui uh tale,Ref 26:3-5 Daan 11:13-15; 28:1-4;
4 na ngam uh pen an suahnak tukin le na thingkung uhten ngah a ngah theihnak tukin van nguah a hun manno in zutik tung.
5 Na lo uh pen an tampi suak tuk a, sabit ngah bawkliuhin, na lo anci cin a hun hei ten sabit thawi hih tuk uh ci. Na eih nuam uhmi hempoh ngah khawng tuk uh ci. Na ngamsung uhah ngimta zetin um tuk uh ci.
6 “Na ngam uhah lemdaihnak umtik tung a, kuamah lau tuk um ngawlin zan hihbu tuk uh ci. Na ngamsung uh a, sahangte cu cimit khawng tung a, ngal dodunnak vang umleh tukma toh hi.
7 Na ngal tei humah nehtu hi tuk uh ci; ngalnam tuah na mai uhah thi haw tuk hi.
8 Nohte mihing pa nga in, na ngal uh za khat neh tuk uh ci, noh za khatin, na ngal uh thawng sawm neh tuk uh ci.
9 Muicu pia tung a, canau tampi pia tung hi. Nangmuh tuah thutepnak ka bawl mite kimtik khawng tung hi.
10 Na lo uh pen an tampi suak tuk a, kum bo ten anthak koih nuamin an lun cu na vawk uh kul tuk hi.
11 Noh tei lak a, ka Puanbuk thiangtho sungah um tung a, ituk mahten nunghek tuk mang hi.
12 Noh tei lakah um tung a, keimah cu na Pathian uh hi tung hi, nohte cu ka mihing hi tuk uh ci.Ref 26:12 2Kor 6:16;
13 Sal hileh ngawltohin, Izipt ngam pen Topa na Pathian uh keimah loli in suah ing. Nohte a henciptu kol cu ektuah khawngin, cam zetin le mai ngal zetin hawhtik ing,” ti hi.
Thu Ngai ngawlte Dantatnak
(Daan 28:15-68)
14 Topa in, “Ka thupiakmi na zui uh ngawl ahi tale bawlsiatnak tawk tuk uh ci.
15 Ka daan le ka thupiakmite zui nuam ngawlin nangmuh tuah ka bawlmi thutepnak na siatsuah uh tale,
16 dantat tung hi. Haksatnak na hum uhah hengtik tung hi. A dam thei ngawl tohmi natnak a phunkim le nattun thuak tuk uh ci, na mit uh thimin, kokang dedeuh tuk uh ci. Anci na cing uh hei in nohtei ca in nemcuamnak um tukma; itahim titale a eitu cu na ngam uh a, nehtu na ngalte hi haw tuk hi.
17 Nohte cu lawl tung a, ngal tei nehmi hi tuk uh ci, nangmuh a huatu ten nohte cu uk haw tuk hi. Thinsuzet tuk uh ci a, kuamah in, a hil haw ngawl hei in tai li tuk uh ci.
18 “Mahti bangin na thuak nung uh hei ten ka thu na ngai nuam ma uh tale na thuaknak uh cu a let salihin thuak bettik tung hi.
19 Na pualthau lelengnak uhte botkek khawng tung hi. Nguahzu ngawlin na nuai uh a, lei cu thik bangin cangtik tung.
20 Haksa zetin, na dehnak uh cu thawnthongin suak khawng tuk hi; itahim titale na lei ngam uh pen an suak tukma hi, na thingkung uhte vang ngah haw tukma hi.
21 “Ka thu cu el lelengin, na ngai nuamma uh tale ka bawlsiatnak cu a let salihin khangtik leleu tung.
22 Na lak uhah sahang hah tung a, na cano uhte le na ngan uhte man haw tuk hi, mi demno bek tang tuk uh ci a, na lampi uhte ngamkhingin suak khawng tuk hi.
23 Hitih bang bawlsiatnak na thuak nung uhten ka thuzui ngawlin, na langpang leleng uh tale,
24 masa laih sangin let salih hakin bawlsia tung.
25 Ka thutiam mi na siatsuah uh hangin dantat tung hi; khuapi sungah him nuamin, na ngelh uh hei in, na hum uhah natsia hengtik tung a, na ngal tei khutsungah heng khawng tuk uh ci.
26 Na an eih tuk uh phiatlet khawng tung a, numei sawm tei comi cangho cu cangho emnak pa khatah em tham cacang hi tuk hi. Bangten co tukin semdun un hi. Na co uhmi hempoh ei tuk nave uhcin, na ngil uh kial leleng tuk hi.
27 Hih tibang bawlsiatnak hempoh nung hei ten, ka thu ngai ngawlin, na do leleng uh laih tale,
28 Ka thinukin, nase zetin bawl tung a, na hum uh a, bawlsiatnak cu a let salihin thuak bettik tung hi.
29 Ngilkial leita in, na sung uh pen a suakmi na cano uh nangawn ei tuk uh ci.
30 Mualhum a, na sak uhmi biakinn cu siatsuah khawng tung; namtui na halnak uh biaklandawh vang phelet khawng tung a, na milim uh a lummi tei humah na luang uhte vawk tung hi. Ningdelhhuai hi tuk uh ci,
31 na khuapi uhte sia khawng tuk hi. Na biakinn uhte siatsuah khawng tung a, na piak uhmi biakpiaknak vang sang tuk mang hi.
32 Na ngam uh ka siatsuah daan cu nase leita in, na ngam uh a luahtu na ngal ten, amuh haw ten lamdang sazet haw tuk hi.
33 Ngaldonak hengtik tung a, ngam dadangah khenkhek khawng tung hi. Na khuapi uhte lop khawng tuk a, na ngam uhte veng diudeu tuk hi.
34-35 colhnak hun na piak awng uh ngawlmi na lei ngam uhin, colhnak hun ngah tuk hi. Zamsanmi ngamkhingin suak tuk a, na ngal ngam uh a, ngalmatmi na hih sung uh cu na ngam uh cawlum tuk hi.
36 Ngamdang a pui mi noh mi vakvai cu thinsu lelengin bawl tung a, huih i thingceh amuh thawmnging na zak uh hei ten tai li tuk uh ci. Ngaldonak mun a, ngal hilmi bangin tai tuk uh ci, na elkimah ngal umma naven lum li tuk uh ci.
37 Kuamah in, a hil haw ngawl vangin pa khat le pa khat humah bahin lum tuk uh ci, na ngal uhte vang do thei tukma uh ci.
38 Ngal ngam na um sungin thi tuk uh ci. Na ngal tei leingamin thon khawng tuk hi.
39 a nungmi pa nih khat na um uh hei in, nangmu sualnak le na pupa tei sualnak hangin pailal leng tuk uh ci.
40 “Mahnaven na casuan uhten a sualnak haw phuang haw tuk a, amu sualnak bek hi ngawlin ka thu a ngai ngawltu le a dotu a pu le pa tei sualnak vang phuang haw tuk hi.
41 Mahti bangin a pu le pa tei sualnak hangin amuh cu lawlin, a ngal tei ngamah ngalin, suaktik ing. A dawlbelin, a pu le pa tei sualnak hangin bawlsiatnak a thuak nungten a thin haw a nemlehin,
42 Ka hinnam Kanaan ngam pia tukin Jakob Isaak le Abraham lak a, ka thutepmi cu theileh tung a, kimtikleh tung hi.Ref 26:42 Pian 28:13-14; 26:3-4; 17:7-8;
43 Hi naven masabelin hi ngam hi colhnak a ngah theihnak tukin ngamsung mihingte cu hi ngam a suahsan haw kul hi. Ka thupiakmi le ka daan a lawl haw hangin haksatnak namkim a thuak haw kul hi.
44 Mahnaven, a ngal tei ngam sungah a um sung haw hei in zamsan tuk mang, a siat vang siatsuah khawng tuk mang hi. Mahti bang siatsuah khawng a hih ngangai haw tale amuh tuah ka thutepnak cu bothal tatak tuk si; keimah cu Topa Pathian haw hi sing.
45 Keimah cu Topa a Pathian ngangai ka hihnak tukin mi ngam dadang tei mitmuhah ka huham suahin, Izipt ngam pen ka suahtik laihin, a pu le pate tuah thutepnak ka bawlmi cu theileh haw tuk hi.”
46 Hi daan le thupiakmite cu Israel hinnam ca in Sinai Mual humah Topa in Moses nelah a piakmi hi.