4
Elisha In Meivong Ca-ngah Bawm
1 Profet honpi sung pen profet pa khat i zi cu Elisha lakah hawhin, “Bawipa, na salpa, ka pasalin thihsan hi. Na theih bangin amah cu Pathian deihzettu hi, hinaven atu-in, a leibatnak pa hungin ka capa pa nihte cu leiba ai-in salin mat tum,” ti hi.
2 Elisha in, “Ikaw ka bawlsak tuk? Innah ikaw na neih?” tin dong hi. Amah in, “Olif situi langkhat sialngawl neihmi dang imah nei mang,” ti hi.
3 Elisha in, “Hawh inna, na innnel tei lak pen palang tong tampi zawngin hi.
4 Nangmah le na capa pa nih cu inn sungah tumin, kongkhak unna, palang tong sungah na situi palang sung a, situi cu thun pepel un. A dim bek ten palangte cu a dangah koih lelem un,” ti hi.
5 Meivongnu cu a capate tuah inn sungah tumin kong a khah nung haw ten, a capa tei cawimi palang sungah, a neihsa mi situi cu thun pepel hi.
6 Palang hempoh dim khawngin, a thun nungten; “Palang tong dang umlaih maw?” tin dong hi. A capa pa khatin, “Palang tong dang umleh ma toh hi,” a tih ten situi a but lihmi kang hi.
7 Profet Elisha lakah hawh lehin, Elisha in, “Na situi zuak inna, na leiba hempoh lul khawngin hi. Mah hum pen nangmah le na capate i nunnak tukin sumpai a val um leleng tuk hi,” ti hi.
Elisha le Shunem Khua Mihaunu
8 Ni khatin, Elisha cu Shunem khua ah hawhin, mah khua ah numei mihau pa khat umin, Elisha cu an eih sam hi,
9 mah pepan Shunem khua a hen sialin mah innah Elisha cu an ei leleng hi. A pasal lakah, “A inn uhah a hung leleng pa hi Pathian mi thiangtho hi tukin um ing.
10 Inn humlamah khan pa khat bawlsakin, mah khansungah zaunak pa khat, cabuai pa khat, khunnak pa khat le mei inn pa khat koihsak nung inna, a zin sial ten mahlai ah ngiak hen,” ti hi.
11 Ni khat cu Shunem khua ah Elisha zinin, a khansungah cawl hi.
12 a umlawhpa Gehazi lakah, “Innteknu sam teh kek,” tin ti hi. Innteknu a hen ten,
13 Elisha in Gehazi lakah, hitihzahin oh a zoh phat le eimu ca a cim le khamnak hangin i kaw ka bawlsak thei tuk a um mi, dong hemin hi. Kumpi maw, ngalkap hotu ngalbawi maw, tawh sakin, i thu poh hilhsak tuk deih nen ti maw? tin ti hi.
Innteknu in, “Kulmi imah nei mang. Ka miphun pih lakah sapmi imah nei mang hi,” ti hi.
14 Elisha in, “Mah ahi tale, a ca in ikaw ka bawlsak tuk?” Gehazi cu dong hi.
Gehazi in, “Sapmi pa khat cu nei hi; capa nei ma. A pasal le tek zo toh,” ti hi.
15 “Hilai ah hung hen,” tin Elisha in ti hi. Innteknu cu hungin kongka ah ding hi.
16 Elisha in, “Mai kum tu hun ten na angah capano cawi tuk ci,” ti hi.
Mah nu in, “Mah kha ma hi, bawipa, nang Pathian mihing sisi, zolthu cu son pahsun!” ti hi.Ref 4:16 Pian 18:14;
17 Elisha in, a tih bangin mahnung kum khat ten capa hing ngangai hi.
18 A upat deuh ten vei khat cu cang at tukin, cang attu dangte tuah a pa cu lo ah hawh hi. A capano vang cu a pa i lakah hawh bok hi.
19 phawhkhak ngawlin, “Ka pa ka lu na, ka lu na,” ti hi.
A pa in, “A nu i lakah pua in hi,” tin, a umlawhpa khat hilh hi.
20 Umlawhpa in, a nu i lakah pua in, a nu in, a kawng humah sun tian cawi in thita hi.
21 A nu in, Elisha i khanah a luang cu hawhpihin zaunak humah a koih ceng ten kongkhakin zam hi.
22 A pasal cu samin, “Umlawh pa khat cu laak pa khat tuah hahin hi. Profet Elisha lakah hawh tung a, manlang zetin kikleh tung,” ti hi.
23 A pasalin, “Ita tuni kekin hawh tuk na nuam? Sabbath ni kha ma. Ha Thak Puai hei kha ma si”note 4:23 Sabbath ni le Ha Thak Puai in profet nelah len cu a phabel hi tin upnak nei haw hi. tin ti hi.
Amah in, “Poi ma, pha tuk poh hi,” ti hi.
24 Laak cu a kung a dap ceng haw ten umlawhpa lakah, “Laak hi cakdeuh tukin nawt inna, ka hilh laklawh cu cumtik viang him pahsun,” ti hi.
25 tulin Elisha umnak Karmel mualah hawh hi. Shunem khua numei nu a hun cu Elisha in khawla thim pen mu in, a umlawh Gehazi lakah, “Zo tehin, Shunem khua numei nu a hun khi!
26 Manlangin a lakah tai inna, amah le a pasal le a capano dam haw maw, dongta hem,” ti hi.
Gehazi lakah, “Thawmvang pha leng poh,” ti hi.
27 Mahnaven Elisha lakah a hen ten a mai ah kunin, Elisha i ke cu kawi hi. Gehazi in nawmvawk tum naven Elisha in, “Nawm pahsun. A lung-am thong hi mu ma cim? Topa in, a lungapnak thu hilh ma si,” ti hi.
28 Numei nu in, “Bawipa, capa ngen awng sap ing maw, zolthu son pahsun ti ma ing maw?” tin ti hi.
29 Elisha in, Gehazi lakah, “Manlangin! ka thiangkhut hi la inna, a tai in, tai in hi. Lampi ah kuamah otpih pahsun. A otpih haw hei donleh pahsun hi. A innah hawh vingveng inna, a capa i humah ka thiangkhut hi nga in hi,” ti hi.
30 Numei nu in, “ Topa i nunnak le nangma nunnak salin thutiam ing hi: zam tuk mang,” tin Elisha cu ti hi. Mah hangin a pa nih haw in, hawh langkhat haw hi.
31 Gehazi cu a mai ah hawhin, a capano i humah Elisha i thiangkhut cu nga hi. Mahnaven thawm vang hei imah umma hi; phe hei phe ma. Mah hangin kiklehin Elisha lakah, “Naupangpa cu nung thei cuang ma hi,” ti hi.
32 Elisha a hen ten amah bek a khansungah tumin zaunak humah naupang pa i luang cu mu hi.
33 Kongkhakin Topa i lakah thungen hi.
34 naupang pa i humah bokin a kam zawnah a kam, a mit zawnkekah a mit le a khut zawnkekah a khut koihin delh hi. Naupang pa i luang cu lum tukin pan hi.Ref 4:34-35 1Kum 17:21;
35 Elisha cu tho in, a khansungah langkhat lam pen langkhat lamah vak kawkawi li hi, mah nungten naupang pa i luang cu delh leleu hi. Mahti bangin a bawl nungten naupang pa cu vei salih hahthio in, a mit hakto hi.
36 Gehazi cu samin, “A nu samin hi,” ti hi. A nu cu hungin Elisha in, “Na capa hi la in,” ti hi.
37 A nu cu Elisha i kebulah bokin a mai lei tawngkha tian upatnak pia hi. A capano cu cawi in hawhpih hi.
A Dang Nalamdang Pa Nih
38 Vei khat cu ngam buppi ah paampi tungin mahten Elisha cu Gilgal ah kik hi. Elisha in profet thu a zilh lih laih takin a umlawhpa i lakah, “Kaam humah beel ngengpi suangto inna, hi profet tei eih tukin sa cangcim huanin,” ti hi.
39 Umlawh pa khat cu anceh zei tukin hampa lakah hawh hi. Hampalak a, uum ngui mu a, uum ngah thawi in, a puak theih zahin tuah innah pinin, ihim tih thei ngawlin hampa lak uum cu sattanin, cikpehin huan hi.
40 A eih haw tukin uum cangpeh cu suakin, a tep haw ten, “Ai zaw, thihsi hi nei pah!” tin au in, ei ngam haw ma hi.
41 Elisha in, “Cangho vam dawmno pia hem un,” ti hi. Mahmi cu beel sungah hakin, “A eih haw tukin cangcim cu suak un,” ti hi. A suahleh haw ten eihpha in suak khawng hi.
42 Vei khat cu Baal Shalishah pen mi pa khat hungin, mah kumin, a lak masabel barli sangvut tuah bawlmi cangho zawl sawm nih le cangthak lakmi a ngui in, Elisha piak tuk pua hi. Elisha in, hi an cu profet pia in hi, ei haw hen tin, a umlawhpa cu hilh hi.
43 Mahnaven a umlawhpa in, “Mihing za khat eih tukin hi zah cu imah sial takma si,” ti hi.
Elisha in, “A eih haw tukin pia pohin hi, itahim titale Topa in, ei haw tuk, a val vang um tuk laih ti hi,” tin hilh hi.
44 Mah hangin profet cu pia haw in, a venghawng haw in, a eih nung haw ten Topa i tihnak bangin a khambang na um ngangai hi.