3
Israel le Moab Mite Dodun
1 Judah kumpi Jehoshafat in, a ngam uknak kum sawm le kum liatnakin Ahab capa Joram cu Israel kumpi dekin, Samaria khua pen kum sawm le kum nih sung uk hi.
2 Topa i mai ah sualnak bawl hi; mahnaven a pa le nu Jezebel bang ngangai in sual ma hi. A pa i Baal biaknak milim a bawlmite siatsuah khawng hi.
3 Mahnaven ama laihngawl a, kumpi dektu Nebat capa Jeroboam bangin Israel mite cu sualnak lampi ah pui in, mah sualnak cu zamsan nuam ma hi.
4 Moab kumpi Mesha in, tuu khawihin, kumsial a piakmi cu tuuno thawng za khat le tuu ham thawng za khat i mul cu Israel kumpi lakah pia leleng hi.
5 Israel kumpi Ahab a thih ten Israel do tukin Mesha cu ngaltho hi.
6 Kumpi Joram cu Samaria pen tulin, a ngalkapte sam khawm hi.
7 Judah kumpi Jehoshafat lakah, “Moab kumpi cu keimah do tukin langpang hi. Amah do tukin keimah bawm thei ni cim?” tin thucah hi.
Kumpi Jehoshafat in, “Bawm tung hi. Keimah le ka ngalkapte le ka cipuhte cu na deih bangin na man tukmi hi poh ung hi.
8 Ilai lam pen kaw ka sim tuk uh?” tin dong hi.
Joram in, “Edom ngam lam pen hawh tuk hung,” ti hi.
9 Israel kumpi Joram cu Judah kumpi le Edom kumpite tuah tul haw hi. Ni salih a hawh nung haw ten a tuicawi haw mi bo hi. Mihing intuk hihen, ngan tei intuk hihen umleh ma toh.
10 kumpi Joram in, “Lalthongta hung ngei! Moab kumpipa i a deih babang a bawl tukin Topa in, a pa thum uh hi, a ngaihsutsa na hi nei pah!” ti hi.
11 Kumpi Jehoshafat in, “ Topa thu a siampih theihnak tukin hilai ah profet akua bek um haw ma maw?” tin dong hi.
Kumpi Joram i ngalbawi pa khatin, “Shafat i capa Elisha um pahcuh. Amah cu Elijah bawmtu hi,” tin hilh hi.
12 Kumpi Jehoshafat in, “Elisha cu profet dik hi,” ti in, a pa thumin Elisha lakah hawh haw hi.
13 Elisha in Israel kumpipa i lakah, “Ita ka lakah hung nge cim? Na nu le pa tei thudot mekmi profet tawkin,” ti hi.
Joram in, “Mah kha ma, kohten kumpi pa thum hi Moab kumpi in, a nuam bangin bawl thei tukin a koihtu cu Topa hi,” ti hi.
14 Elisha in, “A na ka deh lihmi Topa i min salin hilh ing. Judah kumpi Jehoshafat ka upatnak a umma tale nang cu a zo hei zo nuam tuk mang hi.
15 Ilam banglam ahi vangin tingtang tum thiam zeisak vele,” ti hi.
Tingtang tum thiampa in, tingtang cu tumin, Topa i huham cu Elisha humah a hen ten,
16 Elisha in, “ Topa in, hi a ko mi tui luannakah khuk co un.
17 Huih le nguah mu tukma nave uhcin, hi luitui luannak cu tui in dim tuk a, nangmuh le na ngalkapte uh le na ngan tei in tukin tui tampi um tuk hi,” ti hi.
18 Mahnaven hihi cu Topa i ca in baihno hi. “Mah hum pen Moab mitei humah Topa in nehnak vang pia tuk hi.
19 Mawizet a bawl haw mi le pha zetin, a up haw mi a khuapi haw vang la khawngin, a ngah zetmi a thingkungte phuk khawng tuk uh ci. A ciktui haw hempoh ko kangtik khawng tuk uh ci a, a lo ngampha hempoh vang suang tuah sepin, siatsuah khawng tuk uh ci,” ti hi.
20 A zing, zinglam biakpiaknak bawl hun ten Edom lam pen tui luangin lei cu khuh khawng hi.
21 Eimuh do tukin kumpi pa thum hung zo haw toh tih cu Moab miten a zak haw ten, hiamnam cawi theitu pano hempoh, upabel pen nautabel tian sam khawm haw a, ngamngi haw pen sihsankhual haw hi.
22 A zing, zingtungno in, a thawh haw ten ni-in tui cu a det ten thi bangin san khawngin mu haw hi.
23 “Thisan hi si! A ngal uh ngalkap hon thumte amuh le muh dodunin thatdun khawng haw hi tuk hi. Hawh nung inna, a ngiahbuk haw longta nung,” tin ti haw hi.
24 Hawh haw in, Israel tei ngiahbuk a hen haw ten Israel miten nam tawtok haw a, kiktik haw hi. Israel miten hil haw a, Moab mite tampi thatin,
25 a khua haw tampi siatsuah haw hi. A hawhnak haw a, lo ngam pha hempoh humah Israel mi pa khatin, suang pa khat ten tuah sep haw in, a lo ngam hempoh cu suang dim khawng hi. A ciktui haw vang ko khawngin, a thingkungte vang phuk khawng haw hi. Nung dawlbel ten a khuapibel Kir Haresheth bek tangin, Israel suangpei sep thiam ten kilin, do haw hi.
26 Moab kumpi in, a ngalkapte sung li zo haw tih a zak ten ngalnam mang ngalkap za salih tuah a ngal tei kilhnak munkhat pen pah tulin Siria kumpi lakah tai tukin zuam naven pahtul thei ma hi.
27 Mah hangin ama ai-in kumpi dektu tuk a capa upabel cu samin, a khuapi kulhtian humah Moab pathian lakah halkang biakpiaknak tukin thatin, pia hi. Israel ngalkap ten mahmi cu amuh haw ten thinsu in mah khuapi pen nungkikin, a ngamah pin haw hi.