5
Naaman Damnak
1 Naman cu Siria ngalkap hotu ngalbawi pa khat hi in, amah hangin Siria ngalkapte cu Topa in bawmin, a ngalte neh leleng haw hi. Mah hangin a kumpi in ngalbawi Naman cu sunsak zetin, upatzet hi. Ngalbawi ngilzet hi naven phaaknat thuak ngelcel hi.Ref 5:1-14 Lk 4:27;
2 Vei khat cu Israel a do haw laihin, Siria ngalkap ten naupang nu pa khat man haw hi. Pui in, Naaman zi i umlawhin suak hi.
3 Ni khat cu a bawinu i lakah, “Ka bawipa hi Samaria a um profet lakah a hawh ahin, deih sing! A phaaknat hi damtik loli tuk hi” tin ti hi.
4 Mah thu cu Naamanin, a zak ten kumpipa lakah hawhin hilh hi.
5 Kumpi in, “Hawh inna, hi ka laikuat hi Israel kumpi pia thahin,” ti hi.
Naaman cu hawhin, ngun tangka thawng sawm thum, sui pek thawng luk le thekdunnak puan zun sawm pua hi.
6 A puakmi laikuat sungah, “Hi laikuat a piatu hi ka ngalbawi Naaman hi a, na theihnak tukin hilai hi kuat ing. A natnak hi damtik zalin hi,” tin ngan hi.
7 Mah laikuat cu Israel kumpi in, a sial ten lamdangsa in, a puante botkek khawng a, “Itin kaw Siria a kumpi in hi pa hi na damtikin tin, a tih thong theih? Nunnak le thihnak huham neitu Pathian hangin maw kei a ngaihsut? Keimah tuah hauhdunnak zei hi poh hi,” tin ti hi.
8 Mah thu cu profet Elisha in, a zak ten kumpi lakah, “Ita lungsia in, na puan botkek khawng cim? Israel ngam sungah profet um hi tih a theihnak tukin mahpa cu ka lakah hungtikin hi,” tin thucah hi.
9 Mah hangin Naaman cu a cipuhleng le a cipuhte tuah hawhin, Elisha inn kongkhahah ding hi.
10 Elisha in, a umlawhpa khat hahin, Naaman lakah, “Hawh inna, Jordan Ngunah vei salihin tuibualin hi. Na taksano suakleh tuk a, dam tuk ci,” tin hilh hi.
11 Naaman cu a thinukin kikleh hi, “Mahti lawlawm! Ka lakah hungin, Topa a Pathian nelah thungenin ka natnak meima humah a khutsuanin damtik tuk tin ngaisung ing.
12 Damaskas ah a luangmi Abana le Pharpar ngunte hi Israel ngam a, ngunte sangin pha saw ma maw? Mah ngunte ah tui ka bual ahin, dam saw tukma ing maw?” tin phu cawcok thahin, a thinukin kikta hi.
13 A umlawh ten nek haw a, “Bawipa, profet in, na haksa deuh a bawltik a hin bawl tuk sisi. Ita tui sungah tuibualin, dam tuk cu na nuam ngawl?” tin ti haw hi.
14 Mah hangin Naaman cu Jordan Ngunah hawhin, tui sungah Elisha i tihnak bangin vei salih nimin, mahnung ten a natnak cu dam ngangai hi. A taksa dam khawngin, nauno taksa bangin mom mimmemleh hi. Damleh zetin naupang bangin suak hi.
15 Elisha lakah a mihingte tuah kik haw in, “Atu-in Israel ngam a Pathian sialngawl leihum ilai mah hei ah Pathian dang umma tih cu thei ngah zo ing. Mah hangin Bawipa ka lungdamnak laksawng hi hu sansak zazalin,” ti hi.
16 Elisha in, “Ka biakmi a nung Pathian min salin hilh ing hi: laksawng imah la tuk mang,” ti hi.
A laksawng la tukin Naamanin kun li naven, Elisha in la nuam ma hi.
17 Naamanin, “Ka laksawng na co sak thei ma ahi tale ka khua ah ka puak tukin laak pa nih puak lei latik zazalin,note 5:17 Lei latik zalin tihmi hi, mah hun laihin pathian cu ama leingam bekah biak theih hi tin, a up haw hang hi. itahim titale tu pepanin, Topa i lakah sialngawl pathian dang kuamah i lakah hei in, biakpiaknak le halkang biakpiaknak cu pia hihim tukma toh ing.
18 Siria pathian Rimmon biakinn ah ka kumpi hawhin ka zui ten amah in pathian a biak ten ka biak kul bok tuk hi, mah bek ten Topa in hu ngaidam zal hen, Topa in ngaidam leng tuk poh,” ti hi.
19 Elisha in, “Damno in, na hawhin hi,” tin ti in, Naaman cu hawh hi.
Naaman lak pen dawmlaihno a hawh nungten,
20 Elisha i umlawhpa Gehazi in, “Ka bawipa in, laksawng imah la ngawlin Naaman cu hawhtik hi. Siria ngalbawi pa i piakmi cu san tuk hi naven! A nungmi Topa i min salin hilh ing hi: hil nang inna, ino bek ngenta tung tin,” ti hi.
21 Mah hangin Naaman cu hil hi. Naamanin, a nunglam a tai li mi pa khat amuh ten a cipuhleng hum pen tolh vutin tawk hi, “Thu poi um maw?” tin dong hi.
22 Gehazi in, “Thu poi imah umma. Mahnaven Efraim mualhum ngam a profet tei lak pen mihing pa nih na heng haw in, a lak hawah ngun tangka thawng thum le puan thekdunnak zun nih ka bawipa in pia nuamin, mahmi cu nangmah in pia thei ni cim tih hilh tukin keimah hah hi,” ti hi.
23 Naaman in, “Ngun tangka thawng luk hi la in,” ti hi. Ngun tangka cu dip pa nih sungah thunsakin, sang tukin kun hi. Thekdunnak puan zun nih cu a umlawhpa nihte thuanin, Naaman i thupiaknak bangin Gehazi mai ah hawh haw hi.
24 Elisha umnak mual a hen haw ten, Gehazi in dip pa nih cu la in, inn sungah koih hi. Naaman i umlawhpa nihte cu kiktik hi.
25 Innsungah a tumleh ten Elisha in, “Ilai hawh nge cim?” tin Gehazi cu dong hi.
Gehazi in, “Imah lai hawh hihim mang,” tin im lo hi.
26 Elisha in, “Naaman cu a cipuhleng pen tolhin, nangmah a tawh laih khin ka hawvangin, na lakah tel bokma hi tin maw na ngaihsut? Tu hun hi sumpai le puan, olif huan le sabit huan, tuu le khui, salnu le salpa laak hun kha ma hi.
27 Mahnaven Naaman i nat thuak bangin, nangmah le na casuan ten a kumkhua in, neinomta tuk uh ci” tin ti hi. Gehazi cu pualamah tulin mah nat cu thuak ngangai hi, a vun cu vuk bangin ngo khawng hi.