25
Jerusalem Caksuknak
(2Khang 36:13-21; Jer 52:3-11)
1 Babilon kumpi Nebuchadnezzar cu a khutnuai a, ummi Judah kumpi Zedekiah in do hi. Mah hangin Nebuchadnezzar cu a ngalkapte tuah hungin, Zedekiah in Judah ngam a uk kum kuahnak, ha sawmnak a ni sawm ni-in, Jerusalem cu do hi. Jerusalem khua kil haw in, a pualam kimsuakin, kulhtian kaltan theihnak tukin leivuk a, sihsan khual haw hi. Ref 25:1 Jer 21:1-10; 34:1-5; Ezk 24:2;
2 Jedekiah in ngam a uk kum sawm le kum khat tianin, kil haw hi.
3 Mah kum, ha linak, ni kua ni-in, khuasung mite cu eih tuk a neih haw ngawl toh ten,
4 Khuapi kulhtian cu keuletin Babilon ngalkap ten cing tiptep haw naven zanlamin Zedekiah le a ngalkapte cu tul khawng haw hi. Kumpi huan a lampi zui in, pang tian pa nih laklawh kailawn pen tulin Jordan munlawn lamah tai haw hi. Ref 25:4 Ezk 33:21;
5 Babilon ngalkap ten kumpi Zedekiah cu hilin Jerikho khua el munlawn pen pha in, man haw a, a ngalkap ten taisan khawng haw hi.
6 Zedekiah cu Babilon ngalkap ten pui in Riblah khua a, kumpi Nebuchadnezzar a umlaihin, a lakah henpih haw hi. Mahlai pen Nebuchadnezzar in, a thu cu khen hi.
7 Zedekiah i mitmuh cilcelin, a capa pa nih cu that haw, mahten Zedekiah i mit cu a pa nihin pholhin, daal taicin tuah a khih nung haw ten Babilon khua ah hawhpih haw hi. Ref 25:7 Ezk 12:13;
Topa i Biakinn Siatsuah Haw
(Jer 52:12-23)
8 Kumpi Nebuchadnezzar in, Babilon ngam a uk kum sawm le kum kuahnak, ha nganak ni salih ni-in, kumpi ngalkap tei hotu le kumpi ngaihsutnak piatu Nebuzaradan cu Jerusalem khuasungah tum hi.
9 Topa i Biakinn, kumpi inn le Jerusalem a bawi le upa dedeuh tei innte haal khawng hi. Ref 25:9 1Kum 9:8;
10 a ngalkap ten khuapi kulhtian cu phelet khawng haw hi.
11 Nebuzaradan in, Jerusalem a tang mipite, khutzung thiam le Babilon mitei lak a tangtute cu Babilon ah pui khawng hi.
12 Judah ngamsung a zamta mite cu imah nei ngawl, mi zawngkhalbelte hi haw in, mahte cu sabit huan le lo sungah nadektik hi.
13 Babilon ngalkap ten Topa i Biakinn sung a, ummi daal tuah bawlmi khuamte le khuam dinnakte cu vat ekin, sukeh khawng haw hi. Daal tuah bawlmi tui koihnak maihum ngengpi cu sukeh khawngin, daalte cu Babilon ah pua khawng haw hi. Ref 25:13 1Kum 7:15-26; 2Khang 3:15-17; 4:2-5;
14 Kawpiate, biaklandawh a, vut suahnak kuangte, mei inn cinkhawinak a manmi nate, biakpiaknak a manmi ngan thi donnak maihumte, namtui halnak kuangte le Biakinn sung a manmi daal tuah bawlmi na dangte la khawng haw hi. Ref 25:14 1Kum 7:45; 2Khang 4:16;
15 Mah hum pen sui le ngun tuah bawlmi na hempoh, maihum neunote le meiling cawinak kuangte la haw hi.
16 Topa i Biakinn ah Solomon in daal tuah a bawlmi khuam pa nih, khuam dinnakte le tui koihnak maihum ngengpite cu ngeng zetin cuaikhai theih hi haw ma hi.
17 Khuam pa nihte cu tiave haw in, pi sawm nih le pi salih sangin khuam pa khat i a lubol cu pi li le lang sang hi. Mah khuam lubol kimsuakin, daal tuah bawlmi hi a, taleti zuk cuangin mawitik haw hi.
Judah Mite Babilon Heng Haw
(Jer 52:24-27)
18 Ngalkap hotu ngalbawipa Nebuzaradan in, Thiampi Sang Seraiah, a sangtu thiampi Zefeniah le adang Biakinn upa pa thumte manin, pui hi.
19 Mah hum pen khuapi sung a, ngalkap hotu ngalbawipa, kumpi ngaihsutnak piatu pa nga, ngalkap lam cazin lentu, ngalkap hotu bawi bawmtu le a dadang mi upa sawm lukte man hi.
20 Mahte cu Babilon kumpi Hammath ngam Riblah khua a umlaihin,
21 Nebuzaradan in hawhpihin, Kumpi i thupiak bangin mahlai ah bawlsia in, that khawng haw hi.
Judah mite cu a ngam haw pen a thawngtaknak haw ngamah na pui haw hi.
Judah Ngam Uktu Gedaliah
(Jer 40:7-9; 41:1-3)
22 Babilon kumpi Nebuchadnezzar in, Ahikam capa, Shafan i tupa, Gedaliah cu Babilon ngam a, thawngkhiak ngawlmi Judah ngam a tangmite hotu in, Judah ngamuktu bawi in bawl hi.
23 Mahmi cu kumpi Nebuchadnezzar khutnuai ah a tum ngawlmi Judah ngalbawite le ngalkap ten a theih haw ten Gedaliah lakah Mizpah khua ah hung haw hi. Mah ngalbawite cu Nethaniah capa Ishmael, Kareah capa Johanan, Netofah khua mi Tanhumeth i capa Seraiah le Maach mi Jezaniah hi.
24 Gedaliah in amuh le a ngalkap tei lakah, “Thungai in hilh ing: Babilon bawite lau tuk umma hi. Judah ngamah in um unna, Babilon kumpi na cu dek un. Ihempoh lemcang tuk poh,” ti hi. Ref 25:22-24 Jer 40:7-9;
25 Mah kum, ha salih ha in, Nethaniah capa, Elishama i tupa, Judah kumpi i unaupih Ishmael cu ngalkap sawm khat tuah Mizpah ah hawh haw in, Gedaliah cu that haw hi. Gedaliah lakah um Israel le Babilon mite vang that khawng haw hi. Ref 25:25 Jer 41:1-3;
26 Israel mipite cu mihau hihen, a ca-ngah hihen ngalbawite tuah Babilon mi a lau haw hangin tulin Izipt ngamah tai haw hi. Ref 25:26 Jer 43:5-7;
Jehoiakhin Thawng Pen Suak
(Jer 52:31-34)
27 Evilmerodak cu Babilon ngam kumpi cangto in, a can kum loli in, Judah Kumpi Jehoiakhin cu hehpihin, thawng pen suah hi. A suah ni cu Jehoiakhin thawng a taknak kum sawm thum le kum salihnak, ha sawm le ha nih ha, ni sawm nih le ni salih ni hi.
28 Evilmerodak in Jehoiakhin cu phano in zo a, amah tuah Babilon ngam a thawng a khiak haw mi kumpi dangte sangin upatnak pia cuang hi.
29 Jehoiakhin cu a thawngta puante thektik khawngin, a nun sung hempoh cu Babilon kumpi tuah an ei langkhat haw hi.
30 A damsung cu nisialin, a kulmi leinak tukin sumpai pia leleng hi.