24
1 Jehoiakim Judah kumpi a hih laihin, Babilon kumpi Nebuchadnezzar in Judah ngam cu do in, kum thum sung Nebuchadnezzar i khutnuai ah um haw hi. Mahnung ten ngal tho hi. Ref 24:1 Jer 25:1-38; Dan 1:1-2;
2 Topa in Babilon mi, Siria mi, Moab mi le Ammon mite cu Jehoiakim do tukin le Judah ngam siatsuah tukin hah hi. Hihi cu Topa in, a nadektu profet tei lak pen a hilhsami a kimtiknak tukin hi.
3-4 Kumpi Manasseh sualnak hempoh hangin le a cuangin sualnak nei ngawl mite thisan tam leita a luantik hangin Topa in Judah mite cu a mitmuh ngawlnak ngamah hawlvawk khawng a tum hangin hi nate cu ama thupiaknak tuah a piangmi hi. Topa in Manasseh cu ngaidam thei ma hi.
5 Jehoiakim i nadehmi dangte cu Judah Kumpi Tei Khang Tangthu Laibu sungah sialsiah haw hi.
6 Jehoiakim cu thi in, a capa Jehoiakhin in kumpi dek hi.
7 Izipt kumpi le a ngalkapte cu a ngam haw pen ngamdangah vei khat hei hawhleh thei haw ma toh, itahim titale Izipt i ukmi ngam tampi cu Babilon kumpi in la khawngin, Eufrates Ngun pen Izipt Ngun tian uk khawng hi.
Judah Kumpi Jehoiakhin
(2Khang 36:9-10)
8 Jehoiakhin cu kum sawm le kum liat a kim ten Judah kumpi dekin, Jerusalem pen ha thum sung uk hi. A nu cu Jerusalem khua mi Elnathan i canu Nehushta hi.
9 Jehoiakhin cu a pa i ziaza a zui hangin Topa i humah sual hi.
10 Jehoiakhin cu Judah kumpi a hih laihin, Babilon ngalkapte Nebuchadnezzar i ngalbawi tei ho in, Judah ngamah hung haw a, Jerusalem khuapi kil haw hi.
11 A kil haw sungin Nebuchadnezzar amah loli Jerusalem ah hungin,
12 Kumpi Jehoiakhin in, a nu, ama nadektu umlawhte, a khutnuai bawite le kumpi ngalkap hotu bawite tuah Nebuchadnezzar lakah hawhin, a khutnuai ah tum hi. Nebuchadnezzar in Babilon ngam a uknak kum liat kumin, Jehoiakhin cu man hi. Ref 24:12 Jer 22:24-30; 24:1-10; 29:1-2;
13 Topa i Biakinn le Kumpi inn a ummi sui le ngunte cu Babilon ah pua khawng hi. Topa i hilh hamsanak bangin Nebuchadnezzar in Topa i Biakinn a, man tukin Solomon in sui tuah a bawlmi nate cu sukeh khawng hi.
14 Jerusalem khuasung mi, kumpi sung khat le hotute hempoh, a venghawng haw in thawng sawm, Babilon ah Nebuchadnezzar in sila in pui hi. Khutzung thiamte le pumsute tianin pui khawngin Judah ngamah mi ca-ngahbelte bek zam hi.
15 Nebuchadnezzar in, kumpi Jehoiakhin cu a nu le a zite, a khutnuai bawite le Judah ngam hotute tuah Babilon ah sila in pui hi. Ref 24:15 Ezk 17:12;
16 Mi ngil le mi thupite, ngalkap dek theitu le ngaldo tukin a matsate thawng salih le khutzung thiamte le pumsute mihing thawng khat, Babilon ah pui hi.
17 Nebuchadnezzar in Jehoiakhin i pasel, Mattaniah cu Judah Kumpi ah bawlin, a min cu Zedekiah tin thek hi. Ref 24:12 Jer 22:24-30; 24:1-10; 29:1-2;
Judah Kumpi Zedekiah
(2Khang 36:11-12; Jer 52:1-3)
18 Zedekiah cu kum sawm nih le kum khat a kim ten Judah kumpi dekin, Jerusalem pen kum sawm le kum khat uk hi. A nu cu Libnah khua mi Jeremiah i canu Hamutal hi. Ref 24:18 Jer 27:1-22; 28:1-17;
19 Kumpi Jehoiakim i sualnak bawlmi cu kumpi Zedekiah vangin bawlin Topa i humah misual hi.
20 Jerusalem le Judah mitei humah Topa cu a thinuk zetin, a mitmuh ngawlnak ngamah hawlvawk hi. Ref 24:20 Ezk 17:15;