21
Judah Kumpi Manasseh
(1Khang 33:1-20)
1 Manasseh cu Judah kumpi a deh tuk ten kum sawm le kum nih kim hi. Jerusalem pen Judah ngam cu kum sawm nga le kum nga sung uk hi. A nu cu Hefzibah hi.
2 Israel mite Kanaan ngam a tum haw laihin, Topa i hawlvawkmi miphun tei ningdelhhuai a bawlte a zui hangin Manasseh cu Topa i humah sual hi. Ref 21:2 Jer 15:4;
3 Manasseh in, a pa Hezekiah i siatsuah khawng zomi pathian a biaknak haw innte cu a thakin saleh hi, Baal pathian biaknak biaklandawhte dawhin, Israel kumpi Ahab i bawl zo bangin pathiannu Asherah zukte bawl hi. Manasseh in aksite vang bia hi.
4 Biakinn sungah pathian dangte biaknak tukin biaklandawhte bawl hi. Ref 21:4 2Sam 7:13;
5 Topa i Biakinn a khan pa nih sungah aksite biaknak tukin biaklandawh pa nih dawh hi.
6 Halkang biakpiaknak tukin a capa tianin pia hi. Aisannak le mitzialte bawl hi. Khutlam zothiamte le kungkhai thiam tei lakah leng hi. Topa mitmuhah a sualnak cu nase zetin, Topa a thinuktik hi.
7 Topa i Biakinn mun thu ah Topa in, David le a capa Solomon lakah, “Jerusalem khuapi a, hi Biakinn cu Israel miphun sawm le pa nih tei ngam hempoh lak pen keimah biaknak tukin ka tenmi mun hi.
8 Israel miten ka thupiakmi ngai in, ka sila Moses i piakmi Daan cu a kimno in, a zui haw tale, a pu le pa tei lak a, ka piakmi ngam pen kuamah in hawlvawk haw tukma,” ti hi. Ref 21:7-8 1Kum 9:3-5; 2Khang 7:12-18;
9 Mahnaven Judah miten Topa i thu ngai haw ma. Kanaan ngam a luh laih haw in, Topa i hawlvawkmi miphun tei sualnak a bawl haw mi sangin luai saw lalaihin sualnak bawl tukin Manasseh in zol hi.
10 Topa in, a sila profet tei lak pen phuangin,
11 “Kanaan mitei bawlmi sualnak sangin a sual saw deuhmi, ningdelhhuai mullinghah sualnak cu Manasseh in bawl zo hi. Milimte bia in Judah cu sualtik zo hi.
12 Mah hangin Israel Pathian Topa keimah in Jerusalem le Judah humah siatsuahnak nase zetin hengtik tung a, a mutu le a zatu ten lamdang sazet haw tuk hi.
13 Samaria ka bawlsiat bangin le Israel kumpi Ahab le a canaute ka bawlsiat bangin, Jerusalem bawlsia tung. Jerusalem cu mihing kuamah um ngawl tianin, bawl tung hi, a nawtciang haw mi pakan cu a khupin, a koih haw bangin, Jerusalem cu som ciang khawng tung hi.
14 A tang calam mihingte vang nunghek tung a, a ngal tei khutah pia tung hi, a ngalte le a dotu ten a ngam haw cu simin, a neih hempoh lonsak khawng haw tuk hi.
15 Keima miphun hi haw naven, Izipt ngam pen a tul ni haw pepanin, tuni tian ka humah sual leleng haw hi. Ka thin a uktik leita haw toh hangin hi bangin, a hum hawah bawl tung,” ti hi.
16 Manasseh in sualnak a nei laihngawl mihing tam leita thatin, Jerusalem khuapi lampi ah thisan luang dudut hi. Judah mite milim biaknakah a pui hangin Topa i mai ah misual a cantiknak hi.
17 Manasseh bawlmi dadang le sualnak a bawl mite cu Judah Kumpi Tei Khang Tangthu Laibu sungah sialsiah khawng haw hi.
18 Manasseh cu thi in, kumpi inn a, Uzza huanah vui haw hi. Mahten a capa Amon in kumpi dek hi.
Judah Kumpi Amon
(2 Kang 33:21-25)
19 Amon cu kum sawm nih le kum nih a kim ten Judah Kumpi dekin, Jerusalem pen kum nih sung uk hi. A nu cu Jotbah khua mi Haruz i canu Meshullemeth hi.
20 A pa Manasseh bangin, Topa i mitmuhah sual hi;
21 a pa i bawlmite cungin, a pa i biakmi milimte bia bok hi.
22 A pu le pa tei Pathian Topa cu lawlin, a thupiakmi zui nuam ma hi.
23 A khutnuai bawi ten Amon cu suamin, kumpi inn sung pen that haw hi.
24 Mahnaven Judah miten Amon thattu bawite cu thatin, a capa Josiah cu kumpi in koih haw hi.
25 Amon i nadehmi dangte cu Judah Kumpi Tei Khang Tangthu Laibu sungah sialsiah haw hi.
26 Amon cu Uzza huan sungah vui haw; mahten a capa Josiah in kumpi dek hi.