20
Kumpi Hezekiah Damma
(Isa 38:1-8, 21-22; 2Khang 32:24-26)
1 Mah hunin, kumpi Hezekiah cu nasezet a tina in, thi awndiak hi. Amoz i capa profet Isaiah in vehin, a lakah, “ Topa in lo le lam na cah nuamte cahin ti hi; itahim titale nung zo tukma toh ci,” tin hilh hi.
2 Hezekiah cu pang lamah helin, thungen a,
3 “Maw, Topa, nangma muantakin le lungmu ka neihmi venghawng tuah na nadek ing a, na mai ah a pha mi bebek bawl ing tih cu thei khawng poh ci,” tin nasezet kap hi.
4 Mah hangin inntual laizang pen Isaiah a tul laih ngawlin, a humah Topai thu cu heng hi.
5 Topa i mihingte uktu Hezekiah lakah kikleh inna, a lakah, “ Topa keimah in, na thungetnak cu za zo ing a, na hitui cu mu zo ing. Damtik tung a, ni thum sungin Biakinn ah hawh thei tuk ci.
6 Tu nung kum sawm le kum nga nung hih tuk ci. Nangmah le hi khuapi cu Assiria kumpi khut pepan tung. Hi khuapi cu ka minthannakah le ka sila David lak a, ka thutepmi hangin hup tung,” ti hi.
7 Isaiah in, kumpi umlawh tei lakah, “A uilut meima ah theingah tuah bawlmi si noih unna, dam tuk,” ti hi.
8 Kumpi Hezekiah in, “ Topa in damtik tuk a, ni thum sungin Biakinn ah hawh thei tung, tih theihtupnak cu i hi tuk kaw?” tin dong hi.
9 Isaiah in, “ Topa in, a thutepmi kimtik tuk hi tih langtiknakin theihtupnak pia tuk hi. Nilim cu mailamah kal sawm thawntik deih cim maw, ahimata nunglamah kal sawm kiktik deih saw cim?” tin dong hi.
10 Hezekiah in, “Nilim mailamah kal sawm thawn cu baih saw deuh tuk hi; nunglamah kal sawm kiktikin hi,” ti hi.
11 Isaiah in, Topa i lakah thungenin, Topa in nilim cu kumpi Ahaz i bawlmi kailawnah a hawhsuk lih laih takin nunglamah kal sawm kiktik hi.
Babilon Pen Kamtai Hung Haw
(Isa 39:1-8)
12 Mah hunin, Baladan i capa, Babilon kumpi Merodak Baladan in, Hezekiah hi tih thei in, lai le laksawng kuat hi.
13 Hezekiah in Babilon pen a hungmi kamtaite cu phano in zo in, a hauhnak hempoh, a sui le a ngun a namtuite le a ngalkap tei hiamnam tian laksak khawng hi. A na le a thil thuamte koihnak khante hihen, a ngamsung a um na dadang hihen a lak ngawlmi imah umma hi.
14 Profet Isaiah cu kumpi Hezekiah lakah hawhin, “Hi mihingte hi ilai pen kaw a hun haw? Na lakah i kaw a son?” tin dong hi.
Hezekiah in, “Amuh cu ngam khawlapi, Babilon ngam pen hung haw,” ti hi.
15 Isaiah in, “Kumpi inn sungah i kaw a zoh haw?” ti hi. Hezekiah in, “Ihempoh zo khawng haw hi. Na koihnak sungta ka muh ngawlmi imah umma,” tin don hi.
16 Isaiah in, kumpi lakah, “ Topa in,
17 Na pu le pa ten tuni tian a cum haw mi nate hi Babilon ah a heng khawng hun heng tuk hi. Imah tang tukma hi.Ref 20:17 2Kum 24:13; 2Khang 36:10;
18 Na sungsuak na canau khenkhatte vang pui haw tuk a, Babilon kumpi innah tilngetin, nadektu hi haw tuk hi,” tin hilh hi.Ref 20:18 2Kum 24:14-15; Dan 1:1-7;
19 Mahti bangin a tihmi cu Kumpi Hezekiah in, “Ka nun sungah lemdaihnak le himnak um tuk hei,” tin, a ngaihsut hangin Isaiah lakah, “ Topa i awn, na hilhmi cu pha hi,” ti hi.
Hezekiah Thihnak
(2Khang 32:32-33)
20 Kumpi Hezekiah i bawlmi dadang, ngalpha zetin, a nadehnak le khuapi ca in tuikhawlnak ngengpi bawlin leinuai pen tuikong a bawlmi thute cu Judah Kumpi Tei Khang Tangthu Laibu sungah ngan haw hi.
21 Hezekiah cu thi in, a capa Manasseh in kumpi dek hi.