19
Kumpi Hezekiah In Isaiah Dong
(Isa 37:1-7)
1 Kumpi Hezekiah in mah thu a zak bek ten a thasia in, a puan botkek a, thangkhau puan silhin, Topa i Biakinn ah hawh hi.
2 Kumpi inncingtu bawi Eliakim, kumpi zung a, laingantu nadek Shebna le thiampi hotu deuhte cu Amoz i capa profet Isaiah lakah kumpi in hah hi. Amuhte vangin thangkhau puan silh bok haw hi.
3 Kumpi in Isaiah lakah, “Tu ni cu thinsu le lungbingin, ka um uh sun hi; liat ka tawh ni uh hi a, zakca mualpho in ka um uh ni vang hi. Tha nei ngawl toh hangin nau a hing thei ngawl tohmi numei bang ung.
4 Assiria kumpi in, a khutnuai bawi lak pen upabel hahin, a nungmi Pathian cu zawnsak nek hi. Topa na Pathian in hi zotsaknak awnkam hi thei in, mahti bangin a awntu cu bawlsia zal tahen. A nunglaihmi ka mihing tei ca in, Pathian nelah thu hu ngetsak zalin hi,” tin cah hi.
5 Isaiah in kumpi thucahmi a theih ten,
6 hitih hin thu hilh kikleh hi; Topa in, “Assiria kumpi khutnuai bawi ten thumin, keimah a zotsaknak haw awnkam hangin thinsu pahsun.
7 Assiria kumpi uknak sungah thusia pia tung a, mah thusia cu a zak ten a ngamah kik tuk hi; mahlai ah ama ngamsung a ngalnamin thitik tung,” ti hi.
Assiria Thupnak
(Isa 37:8-20)
8 Assiria bawi in, a kumpi haw cu Lakhish tulsanin, a el a um Libnah khuapi cu do hi tih a zak ten kikin, mahlai ah amah tawk tukin hawh hi.
9 Assiria kumpi in amuh do tukin Izipt ngalkapte cu Assiria kumpi Tirhakah ho in, hung haw tin thu za hi. Ethiopia kumpi in, Judah kumpi Hezekiah lakah kamtai hah lehin,
10 “Na muanmi na Pathian in ka khutsungah heng tuk ngawlin thu hilh hi, mahnaven mahmi in, na lungmuangtik sual pahsuh hen.
11 Assiria kumpi in, siatsuah tung tin ka tih nungsang cu a ngam haw iti bangin um mek hum tih cu na zaksa hi poh hi. Luat thei tung hi tin ngaisung cim?
12 Ka pu le pa uhten Gozan, Haran le Rezef khuapi siatsuah khawng zo haw in, Telassar a, ummi Betheden mite that khawng haw; a pathian haw akua bekin hup thei kaw tih thei awng cim?
13 Atu-in, Hamath, Arpad, Sefarvaim, Hena le Ivvah khuapi a kumpite ilai ah kaw a um haw?” tin ti hi.
14 Kumpi Hezekiah in, Assiria kumpi i laikuatmi cu a kamtai tei khut pen la in sial hi. Topa i Biakinn ah hawhin, Topa i mitmuhin mahlai cu koih a,
15 thungen hi: “ Topa aw, Israel i Pathian, Cherub i ha hum sunloihnak bawi khunnak hum a, khungtu, nangmah bek Pathian hi ci a, leihum peng le ngam hempoh uktu hi ci. Lei le van hi nangma bawlmi haw hi.Ref 19:15 Suah 25:22;
16 Maw, Topa, atu ka hum uh a hengmi hi muhpih zalin hi. Assiria kumpi Sennacherib in, a nungmi Pathian nangmah a nautatnak awnkam hempoh cu hu zain hi.
17 Maw, Topa Assiria kumpi ten miphun tampi siatsuahin, a ngam haw cu ngamkhingin suaktik haw;
18 Pathian ahi ngawlmi a pathiante, mihing khutin, thing le suang tuah bawlcopmi milimte cu haal khawng haw hi.
19 Mah hangin Topa ka Pathian uh, leihum buppi ah Topa, nangmah pa khat bek Pathian tatak na hihnak a theih zawhnak haw tukin Assiria mitei khut sung pen pantul zalin hi,” ti hi.
Isaiah In Kumpi Thucah
(Isa 37:21-28)
20 Isaiah in, kumpi Hezekiah lakah thucahin, “ Topa in, na thungetnak ngai zo hi.
21 Assiria kumpi Sennacherib dodalin, Topa i awnkam cu hi bangin hi:
“Zion a khanglainote 19:21 Zion khanglai tihmi hi, Jerusalem khuapi tihnak hi. in
nang zawnsakin,
nangmah nuihsan hi.
Jerusalem canu in, a lu thing hi,
Nungkik inna, taivawkin hi.
22 Ancim na tihmi le
na zotsak lih mi,
Akua hi tin kaw na ngaihsut?
Na ausanmi hi akua kaw?
Israel i Pathian thiangtho,
Keimah zawnsak ci.
23 Ka lakah tuangkhawng tukin,
na kamtai hah ci;
Ka cipuhlengte tuah
mual sangbel neh ing,
Lebanon mualkul vang hengin,
Sidar thing sangbel vang
phuk thei ing, mikang cakthing phabel,
tupi sung a mawktabel
mun heng ing,
Ngam tawpnak phul tian, ti ci.
24 Hin dang tei ngamah
tuikhuk co ing.
Mahlai a tui in ing, ka ngalkap ten
Nail Ngunte a ke loli tuah sik haw,
kokang khawngin sik haw,
tin tuangkhawng ci.
25 Hitin na bawlmi hempoh hi
Tanglaih cawngin keima tupsa hi,
tih thei awng ma cim?
Tu bekin bawlsuak ing hi!
Ngal kulhtian tuah upmi khuapi cu
Siatsuah khawng theihnak
huham pia ing;
26 Khua sung a ummi mihingte cu,
thil tihtheihnak nei bikbek haw ma.
Launak le thinsuknak tuah
dim haw hi.
Lo sung a po mi kiak le
Inn hum a po mi hampa
bang haw hi,
Huihsia theu in, a nuai ten
thim khawng haw hi.
27 Na cungcang cu a venghawngin
thei khawng zo ing,
Na bawlmi le na hawhnak tuah;
Ka hum a na thinuk daan tuah
kimno in thei khawng ing.
28 Ka lak a na thinuknak le
ka hum a na uangthuannak cu,
ka beng bulah heng khawng haw hi.
Mah hangin na naalah
kawizang khaih tung a,
Na kam kamkalh tung,
mahten na hunnak lampi pen,
pui kikleh tung,” ti hi.
29 Isaiah in, kumpi Hezekiah lakah, “A cang tukmi na sialsiahnak cu hi bangin hituk hi: tu kum le mai kum cu hampa lak a pomi cang ei tuk uh ci. Mahnaven kum thumnak kumin nangmuh ten anci cingin, an cawm tuk uh ci. Sabitte cingin, Sabit ngah ei tuk uh ci.
30 Judah ngamah nungin, a tang calam mite cu thukzetah zung mutin, a ngahmi thingkung bang hi haw tuk hi.
31 Jerusalem le Zion mualte ah a tangmi um haw tuk hi; itahim titale Topa in kimtik hihim tuk hi.
32 “Assiria kumpi thu ah Topa in hi bangin ti hi: ‘Hi khuapi sungah tum tukma hi. Thalcang pa khat hei kap tukma hi. Ngal lumphaw tuah a ngalte cu, khuapi mai heng haw tukma hi. Kulhtian pualam a, ngaldonak lei tian, khuhdip mite tiang haw tukma.
33 A hunnak lampi pen kikleh tuk a, hi khuapi sungah tum tukma hi. Topa keimah in phuang zo ing.
34 Hi khuapi cu pan tung a, hup tung hi. Ka minthannak tukin le ka silapa David lak a ka thutepmi hangin,’ ” ti hi.
35 Mah zan cu Topa i vancungmi pa khat Assiria ngalkap tei ngiahbukah hawhin, ngalkap thawng za khat le thawng sawm liat le thawng nga that hi. A zingten zingtungno in, a venghawng haw in, thi khawng haw hi.
36 Assiria kumpi Sennacherib cu nunglamah kikin, Nineveh ah um hi.
37 Vei khat cu a Pathian Nisrok biakinn ah a Pathian a biak laihin, a capa pa nih Adrammelek le Sharezer in, a ngalnam haw tuah sun hum haw in, mah nungten Ararat ngamah tai in, a capa Esarhaddon in kumpi dek hi.