18
Judah Kumpi Hezekiah
(2Khang 29:1-2; 31:1)
1 Elah i capa kumpi Hoshea in Israel ngam a uk kum thumnakin, Ahaz i capa Hezekiah cu Judah kumpi cang hi.
2 Amah cu kum sawm nih le kum nga a kim ten kumpi dekin Jerusalem pen Judah ngam cu kum sawm nih le kum kuah sung uk hi. A nu cu Zekhariah i canu Abijah hi.
3 Amah cu a pu David nungzui in, Topa i deih bang bawl hi.
4 Levi mitei i pathian biaknak munte siatsuah khawngin, a suangphut thiangthote cu sukeh khawng hi; pathiannu Asherah ca tukin a phut haw mi zen thiang ngawlmi khuamte vang phuk khawng hi. Moses i bawlmi daal ngul Nehushtan tin, a sam haw mi, mah khan tian Israel miten upatnak tuah a mai ah namtui a haal haw mi cu sukeh bilhbelh khawng hi.Ref 18:4 Mipum 21:9;
5 Hezekiah in Topa, Israel Pathian cu muang hi. A laih ngawlin hihen, a nungten hihen Judah kumpi lak pen Hezekiah a bangtu kumpi kuamah um haw ma hi.
6 Topa i mai ah muantak hi in, thu el awng ma hi; Moses lak a, Topa i thupiaknak hempoh komzetno in zui hi.
7 Mah hangin Topa cu a lakah umin, a bawlmi hempoh ah lawhting hi. Assiria kumpi vang do in, siah piaknak pen luat hi.
8 Filistin mi nehin, a khua le a ngam haw cu khuanobel pen khuapibel tian, Gaza le a elkim khuate vang neh khawng hi.
9 Hezekiah in, Judah kumpi a deh kum linak le Hoshea in Israel kumpi a deh kum salih kumin, Assiria kumpi Shalmaneser in Israel ngam cu do in, Samaria khuapi cu kil khawng hi.
10 Kum thum sung a kil nung haw ten Samaria cu la hi. Himi cu Hezekiah in Judah ngam a uk kum luknak le Hoshea in Israel ngam a uk kum kuahnakah hi.
11 Assiria kumpi in Israel mite cu Assiria ngamah pui in, a khenkhat cu Halah khua, a khenkhat cu Gozan peng Habor Ngun elkimah le a khenkhat cu Media khuapi ah umtik hi.
12 Israel miten Topa a Pathian haw i thupiakmi a ngaih haw ngawl hangin Samaria cu Assiria miten la haw hi. Topa i sila Moses lak pen Israel mite tuah Topa i thutepnak a bawlmi cu siatsuah khawngin zui nuam haw ma hi. A thu ngai ngawlin a thutep vang zui haw ma hi.
Assiria Ngalkap Ten Jerusalem Sim
(2Khang 32:1-19; Isa 36:1-22)
13 Kumpi Hezekiah in, Judah ngam a uk kum sawm le kum linakin, Assiria kumpi Sennacherib in Judah ngam sungah ngal kulhtian khuapi do in, tampi la hi.
14 Hezekiah in Sennacherib lakah, Lakhish a umlaihin mi hahin, “Khial ing hi; do toh pahsun hi, na ngetmi hempoh pia khawng tung,” ti hi. Assiria kumpi in thu kiklehin, a ngetmi cu ngun tangka a puakin puak za nih le sawm nga le sui puak sawm nih le puak nga hi.
15 Hezekiah in Topa i Biakinn sung a, ngun tangka hempoh le kumpi inn a, ngun tangkate kuat hi;
16 Biakinn kongka suikhu lotmi le Hezekiah amah loli in, kongka khuamte suikhu lotmi suite cu la in, Sennacherib kuat hi.
17 Assiria kumpi in Lakhish pen Jerusalem a, ummi Hezekiah do tukin ngalkap tamzet hah leleng hi. Mah ngalkapte cu a khutnuai a, bawi ngengbel pa thum ten ho haw hi. Jerusalem khua cu heng haw in, Humta Tuiting pen tui a luannak hawkluam el, puantaktu tei umnak lampi ah um haw hi.
18 kumpi Hezekiah cu samin, a khutnuai a bawi pa thum, kumpi inncingtu tei hotu Hilkiah i capa Eliakim, kumpi zung a laingantu Shebna le cazin lentu tei hotu Asaf i capa Joah hah hi.
19 Assiria bawi pa khatin, a lak hawah, ita kumpi Hezekiah hi hiti lawlawmin, a muanduncop theihnak tih hi ka kumpi uhin thei nuam hi!
20 “Ngaldonak lam a, thiamnak le ngilnak hi kam bek tuah leiceng thei tuk hi tin upnak nei hi maw? Assiria do tukin a koi panpihnak kaw na muansan uh?
21 Muansan nuam pahsuh un! Na muansan uh ahi tale phaikung thiangkhut mang tuah bangve tuk uh ci, ek tuk a, na khut uh at saw lam tuk hi. A muangtu tei ca in Izipt cu mah tih leleng cu na hi poh hi.”
22 Mah ahimata, “ Topa ka Pathian uh muansan ung hi,” tituk kam uh ci? Na kumpi uh Hezekiah amah hi kha ma maw, Topa i Biakinnte le biaklandawhte cu siatsuah khawngin, Jerusalem a, biaklandawh bekah Pathian bia tuk uh ci; tin Judah mi le Jerusalem khuasung mite a titu cu?
23 Ngam ngai uh cim? Assiria kumpi minin zuam ing hi; cipuh khungtheitu mihing thawng nih na um uh tale cipuh thawng nih pia thei tung!
24 Assiria ngalkap sung pen ngalbawi nautabel hei kim ngawlin Izipt miten cipuhleng le cipuh ngalkapte a kuat haw ahin, ti uh ci.
25 Topa i bopnak tel ngawlin na ngam uh hi do in, siatsuah tukin maw na ngaihsut uh? Thungai in titale, Topa amah loli in, na ngam uh hi do tukin le siatsuah tukin thupia hi.”
26 Eliakim, Shebna le Joah in, Siria bawi lakah, “Sazapa, kohtei lakah Aramik awn mangin hi; Thei leng poh ung. Hebru awnin awn pahsun; khuapi kulhtian hum a mihing ten ngai haw,” ti haw hi.
27 Amah in, “Kumpi in, a hah ten, hite hi nangmuh le na kumpi lak uh bekah awn tukin hah hi tin maw na ngaihsut uh? Mah kha ma! Nangmuh le kulhtian hum a khungmi, mai ek ei tuk le mai zun a intuk mite, na venghawng lakah awn tukin hah hi!” ti hi.
28 Dingto in, Hebru awnin, “Maw mihingte, Assiria kumpi i hilhmi hi ngai un!
29 Hezekiah in nohte zol li toh pahsuh hen tin, ngallinnak pia hi. Hezekiah in nohte pan thei hihim tukma.
30 Topa muansan tukin a hilhmi vang hi sang pahsuh un. Topa in ohte pan tuk a, Assiria ngalkap ten a khuapi uh cu la haw tukma hi, tin ngaisung nuam pahsuh un.
31 Hezekiah i thu cu ngai pahsuh un. Assiria kumpi in thupia hi. Khuapi sung pen tul unna, lemdaihnak bawl un. Assiria kumpi in, nangmu ngam bang ngam sungah, sabit ngah thei tukin sabit ngui umnak, cangho bawlnak tukin cang umnak, olif umnak le olif sathau le khuaitui umnak ngam sungah a umtik laklawh cu,
32 nangmu sabit ngui pen sabit ngah ei tuk uh ci, nangmu theikung pen thei ngah ei tuk uh ci, nangmu tuikhuk pen tui intuk uh ci. Topa in hup tuk hi tin, Hezekiah in zol li pahsuh hen.
33 Assiria kumpi i neh tuk ngawlin pathian i a patmi miphun dang um haw maw? Hu hilh hem un!
34 Ilai ah kaw Hamath pathian le Arpad pathiante a um khawng haw? Ilai ah kaw Sefarvaim pathian, Hena pathian le Ivvah pathiante a paihlal khawng haw? Akua beekin Samaria khuapi hup thei haw maw?
35 Ituk ten kaw hi ngamte hi a pathian haw ten hupin, Assiria kumpi khut pen luat haw hi, tih na zak awng uh? Jerusalem cu Topa in hup tuk hi tin itin kaw na up theih uh?” tin au het hi.
36 Mipite cu dai khipkhep haw! Kumpi Hezekiah i hilh bangin kuamah in awn haw ma.
37 Eliakim, Shebna, le Joah cu lungsia in, a puan haw botkekin, Assiria ngalbawi awn cu kumpi lakah hilh tukin hung haw hi.