14
Judah Kumpi Amaziah
(2Khang 25:1-24)
1 Jehoahaz i capa Jehoash in Israel kumpi a deh, a kum nihnakin, Joash i capa Amaziah cu Judah kumpi dek hi.
2 Amah cu kum sawm nih le kum nga hi. Jerusalem pen kum sawm nih le kum kuah sung ngam uk hi. A nu cu Jerusalem khua mi Jehoaddin hi.
3 Amaziah in, Topa i deihnak bangin nungca hi, mahnaven a laihngawl a kumpi David bang cu hi kha ma. A pa Joash bangin nadek hi.
4 Leihum mitei pathian biaknakte a siatsuah ngawl hangin mi tampi in biakpiaknak bawlin namtui haal leleng haw hi.
5 Amaziah in, kumpi thuneihnak khozet tuah ngam a uk theih ten, a pa kumpi a thattu bawite cu thatleh hi.
6 Mahnaven a ca haw cu that ma hi; Moses Thukham sung a, Topa i thupiakmi, “Ca tei sual hangin a nu le a pate thah hi ma hen; nu le pa tei sualnak hangin a cate cu thah hi ma hen, ama sualnak bek hangin mihing cu thah hihen tihmi zui saw hi.”Ref 14:6 Daan 24:16;
7 Amaziah in, Tuipi Thi hanglam a, Ci Munlawn a tih haw mi ah Edom ngalkap thawng sawm that hi, Sela khua la a, Joktheel tin, a min thek hi. Tuni tianin mahtin sam haw hi.
8 Amaziah in Israel kumpi Jehoash lakah, “Dodun tukin nangmah zuam ing, tin thucah hi.”
9 Mahnaven kumpi Jehoash in, “Vei khat cu Lebanon mualah, lingkung hon pa khatin, Sidar thing lakah thucah hi, ‘Ka capa ca tukin na canu pia in hi,’ ti hi. Sahang pa khat a elah hungin, lingkung hon cu sik ek khawng hi.
10 Atu-in Edom mi na neh hangin pualthau in ultungzet ci. Na minehnak humah na lungkim inna, mengdenin um pohin hi. Nangmah le na mihing tei ca siatsuahnak ahi tukmi thil cu ita tokpil li kam?” tin thutheitikleh hi.
11 Amaziah in mah thu cu ngai nuam ma. Mah hangin kumpi Jehoash cu a ngalkapte tuah hawhin, Judah ngam Beth Shemesh a tihmi munah kumpi Amaziah tuah dodun haw hi.
12 Judah kumpi Amaziah ngalkap ten Israel kumpi Jehoash cu a neh haw ngawl hangin a inn hawah tai khawng haw hi.
13 Jehoash in Amaziah cu manin, a khuapi Jerusalem vang la hi; khuapi kulhtian cu Efraim kongkhah pen khua ning kongkhah tian, pi za luk sung, phe let khawng hi.
14 A muhmi sui le ngun hempoh, Biakinn nate le kumpi inn a, sumpai le na manpha hempoh la in, Samaria ah pua khawng hi. Ngalmatmi tampi vang pui bok hi.
15 Kumpi Jehoash i bawlmi hempoh, ngalpha zetin Judah kumpi Amaziah a donakte tuah Israel Kumpi Tei Khang Tangthu Laibu ah sialsiah khawng haw hi.
16 Jehoash cu thi in, Samaria a, kumpi khanah vui haw hi. A capa Jeroboam pa nihnakin kumpi dek hi.
Judah Kumpi Amaziah A Thihnak
(2Khang 25:25-28)
17 Israel kumpi Jehoash i thih nungten Judah kumpi Amaziah cu kum sawm le kum nga nung hi.
18 Amaziah i nadeh hempoh cu Judah kumpi Tei Khang Tangthu Laibu sungah sialsiah khawng haw hi.
19 Jerusalem khua sungah Amaziah that tukin a tum haw hangin Amaziah cu Lakhish ah tai hi; mahnaven a suamtu ten na zui haw a, mahlai ah that haw hi.
20 A luang cu cipuh tuah Jerusalem ah pua in, David khuapi, kumpi khanah vui haw hi.
21 Judah miten Amaziah i capa kum sawm le kum luk a kimmi Uzziah cu kumpi in bawl haw hi.
22 A pa a thih nungten Elath khua a la lehtu le a tungding lehtu cu amah Uzziah hi.
Israel Kumpi Jeroboam Pa Nihnak
23 Joash i capa, kumpi Amaziah in, Judah ngam kum sawm le kum nga a uk kumin, Jehoash i capa Jeroboam pa nihnakin Samaria pen Israel cu kum sawm li le kum khat sung uk hi.
24 A laih ngawl a, Judah kumpi a dektu, Israel a pui sualtu, Nebat i capa Jeroboam i bawlmi thilpha ngawl a zui bok hangin Topa i humah sual hi.
25 Israel ngam ahi awng mi, saklamah Hamath mual kawn pen, hanglamah Tuipi Thi tian laleh khawng hi. Hi a lakmi cu Gath Hefer khua a Amittai capa profet Jonah lak pen Topa, Israel Pathian i thutep a kimtiknak hi.Ref 14:25 Jn 1:1;
26 Topa in Israel mite, sila hihen, miluat hihen cimkhamnak le a thuaknak haw venghawng cu mu khawng hi; mahnaven kuamah bawmtu nei ma hi.
27 Israel siatsuah nom tuk cu Topa i deihmi a hih ngawl hangin kumpi Jeroboam pa nihnak mangin Israel cu hup hi.
28 Jeroboam i bawlmi dang hempoh, ngalpha zetin ngal a donak le Damaskas le Hamath a laklehnak thute cu Israel Kumpi Tei Khang Tangthu Laibu sungah sialsiah haw hi.
29 Jeroboam pa nihnak cu thi in, kumpi khanah vui haw; mahten a capa Zekhariah in kumpi dek hi.