13
Israel Kumpi Jehoahaz
1 Ahaziah i capa Joash cu Judah kumpi a dehnak kum sawm nih le kum thumnakah Jehu capa Jehoahaz cu Israel kumpi dekin Samaria pen kum sawm le kum salih uk hi.
2 A laih ngawl a, kumpi a dektu Israel tei sualnakah a pui tumtu kumpi Jeroboam bangin Topa i humah sualnak bawlin, thil sual bawl cu zamsan thei ma hi.
3 Mah hangin Topa cu Israel humah a thinukin, Siria kumpi Hazael le a capa Benhadad in, Israel cu vei tampi neh haw hi.
4 Jehoahaz in, Topa i lakah thungenin, Israel mite Siria kumpi in, nuainem leita in, a bawlsiat haw cu Topa in, amuh hangin a thungetnak cu theihsak hi.
5 Topa in Israel tei lakah hotu pa khat hahin, Siria khut sung pen luattik a, masa lam bangin Israel mite cu lungmuangin umleh haw hi.
6 Mahnaven kumpi Jeroboam in Israel a sualtiknak sualnakte cu amuh vangin taisan ngawlin bawl leleng haw; pathiannu Asherah i zuk cu Samaria ah um leng laih hi.
7 Jehoahaz in ngalkap tampi nei ma hi; Siria kumpi in cimittik khawngin, cangcil hun a, leivul bangin a ke nuai ah a sihpek khawng hangin a neihmi venghawngin, cipuh ngalkap sawm nga, cipuhleng sawm le ke ngalkap thawng sawm bek hi.
8 Jehoahaz nadehmi dangte ngalpha zetin, a bawlmite cu Israel Kumpi Tei Khang Tangthu Laibu sungah sialsiah haw hi.
9 Jehoahaz cu thi in Samaria ah vui haw hi. Mahten a capa Jehoash in kumpi dek hi.
Israel Kumpi Jehoash
10 Judah kumpi Joash in, Judah ngam a uk kum sawm thum le kum salih kumin, Jehoahaz i capa Jehoash cu Israel kumpi cang a, Samaria pen kum sawm le kum luk sung uk hi.
11 Amah vang hi Israel mite a pui sualtu kumpi Jeroboam i sualnak cu bawl bokin, Topa i humah sual hi.
12 Jehoash nadehnak hempoh Judah kumpi Amaziah tuah a dodun haw laihin ngalpha zetin, a donakte cu Israel Kumpi Tei Khang Tangthu Laibu sungah sialsiah haw hi.
13 Jehoash cu thi in, Samaria khua kumpi khanah vui haw hi. Mahten a capa Jeroboam pa nihnakin kumpi dek hi.
Elisha Thihnak
14 Profet Elisha cu nasezet na in, a thih kuan ten Israel kumpi Jehoash in veh hi. “Maw ka pa, maw ka pa, cipuhleng le cipuh ngalkap bangin Israel hup theitu!” tin kah thahin ti hi.Ref 13:14 2Kum 2:12;
15 Elisha in, “Thalkung le thalcangte la in,” ti hi. A tih bangin Jehoash in la in,
16 Elisha in, “Na thal cu kapin,” ti in kumpipa in, a kap tum ten Elisha in, a khut cu kumpipa i khut humah koih hi.
17 profet i hilhnak bangin kumpi in, Siria lam a, ummi tukvelh cu hong hi. “Na thalcang cu kap tohin hi,” tin Elisha in ti hi. Kumpi in thalcang cu a kap bek ten profet in, “Nangmah hi Topa i thalcang hi ci a, nangmah mangin Siria cu neh tuk hi. Siriate cu Afek a tihmi munah do tuk ci a, neh tuk ci,” ti hi.
18 Elisha in kumpi cu, “Na thalcang dangte la inna, leihumah kapin,” ti hi. A tih bangin kumpipa in lei cu vei thum kap hi.
19 Elisha cu thinukin, “Vei nga, vei luk na kapta ahin, Siriate cu neh vawk tuk navecin! Atu-in vei thum tian bek neh tuk ci,” tin kumpi cu ti hi.
20 Elisha cu thi in vui haw hi.
Kumsialin Moab mi, ahon ahonin, a ummi damiah ten Israel ngam cu suammek haw hi.
21 Vei khat cu mithi a vui haw laihin, mahtibang damiah hon khat mu haw hi. Mithi phumtu ten a miluang haw cu Elisha i khansungah vawkta in, tai haw hi. Miluang le Elisha i nguhte a tawngkhadun haw bek ten mithi cu nunglehin dingto hi.
Israel le Siriate Dodun
22 Jehoahaz in Israel ngam a uk sung hempoh ah Siria kumpi Hazael in Israel mite cu nuainem zetin bawlsia hi.
23 Mahnaven Topa cu Israel humah hehpihnak le lainatnak nei in, mi ngaihsutnak vang nei hi; a siat khawng haw tuk phal ma hi. Abraham, Isaak le Jakob tei lakah a thutepnak hangin Israel mite cu bawm leleng hi. A mihingte phawk ngil awng ma hi.
24 Siria kumpi Hazael a thih ten a capa Benhadad in kumpi dek hi.
25 Israel kumpi Jehoahaz in Benhadad cu vei thum tian nehin, Jehoash i pa Jehoahaz kumpi a hih laihin, Benhadad i lakmi khuapi cu longleh khawng hi.