15
Judah Kumpi Uzziah
(2Khang 26:1-23)
1 Israel kumpi Jeroboam pa nihnakin Israel ngam a uknak kum sawm nih le kum salih kumin, Amaziah i capa Uzziah cu
2 kum sawm le kum luk a kim ten Judah kumpi dek hi. Jerusalem khua pen Judah ngam cu kum sawm nga le kum nih sung uk hi. A nu cu Jerusalem khua mi Jekoliah hi.
3 Uzziah in, a pa bangin Topa i deihnak bawl hi.
4 Mahnaven leihum mitei pathian a biaknakte a siatsuah ngawl hangin mi tampi ten mahlai munah biakpiaknak bawlin, namtui halnakte bawl haw hi.
5 Topa in Uzziah humah phaaknat hengtikin, a nun sung phaaknat nei vawkta hi. A nadehmi hempoh midang ten dawnin, ama innah cangpakin um hi; a capa Jotham in ngam buppi na cu dek hi.
6 Uzziah i nadehmi a dangte cu Judah Kumpi Tei Khang Tangthu Laibu sungah sialsiah haw hi.
7 Uzziah cu thi in, Jerusalem David khuapi kumpi khanah vui haw hi.Ref 15:7 Isaiah 6:1;
Israel Kumpi Zekhariah
8 Kumpi Uzziah in, Judah ngam a uknak kum sawm thum le kum liat kumin, Jeroboam pa nihnak i capa Zekhariah cu Israel kumpi dekin Israel ngam cu Samaria khua pen ha luk sung uk hi.
9 Nebat capa, Israel a pui sualtu, kumpi Jeroboam i sualnak a zui bok hangin, a laih ngawl a, kumpi a dektute bang lelengin Topa i humah sualnak bawl hi.
10 Jabesh i capa Shallumin Kumpi Zekhariah cu suamin, Ibleam ah thatin, amah in kumpi dek hi.
11 Zekhariah i nadehmi a dangte cu Israel Kumpi Tei Khang Tangthu Laibu sungah sialsiah haw hi.
12 Topa in kumpi Jehu lakah thutiamin, “Na casuan tei lak pen khang linak tian Israel kumpi dek haw tuk hi,” a tihmi cu kim hi.Ref 15:12 2Kum 10:30;
Israel Kumpi Shallum
13 Kumpi Uzziah in, Judah ngam a uknak kum sawm thum le kum kuah kumin, Jabesh i capa Shallum cu Israel kumpi dek a, Samaria khua pen ha khat sung uk hi.
14 Gadi i capa Menahem cu Tirzah pen Samaria ah hawhin, kumpi Shallum a thah nungten amah in kumpi dek hi.
15 Shallum i nadehmi a dangte, mi a suamnak thu late tuah Israel Kumpi Tei Khang Tangthu Laibu sungah sialsiah haw hi.
16 Menahem cu Tirzah pen Samaria lamah a hawh laihin, Tappuah khuapi in, a kongkhah a hon nuam ngawl hangin mah khua cu siatsuah khawng hi; khuasung mite cu that khawngin, a elkim a khuanote vang siatsuah khawng hi. Naupai numei hempoh tianin cilpek khawng hi.
17 Kumpi Uzziah in Judah ngam a uknak kum sawm thum le kum kuah kumin, Gadi i capa Menahem cu Israel kumpi suak a, Samaria khua pen kum sawm sung uk hi.
18 Nebat i capa a thih tian, Israel a pui sualtu, kumpi Jeroboam i sualnak cu Menahem in zui bok a, Topa i humah sualnak bawl hi.
19 Assiria kumpi Tiglath Pileser in Israel ngam do in, Assiria kumpi khutnuai pen Israel kumpi a deh theih lelengnak tukin Tiglath Pileser lakah ngun tangka a puakin, puak thawng khat pia hi.
20 Israel ngamsung a mi neinung dedeuh tei lak pen mi pa khatah ngun tangka sawm nga ten siah la hi. Tiglath Pileser cu a ngamah kikleh hi.
21 Menahem i nadehmi dadang cu Israel Kumpi Tei Khang Tangthu Laibu sungah sialsiah haw hi.
22 Menahem cu thi in, vui haw hi. Mahten a capa Pekahiah in kumpi dek hi.
Israel Kumpi Pekahiah
23 Kumpi Uzziah in, Judah ngam a uknak kum sawm nga kumin Menahem i capa Pekahiah cu Israel kumpi dekin, Samaria khua pen kum nih sung uk hi.
24 Nebat i capa Israel a pui sualtu kumpi Jeroboam i sualnak a zui hangin Topa i humah sualnak bawl hi.
25 Pekahiah ngalkap lak pen ngalbawi pa khat Remaliah i capa Pekah in, Gilead mi mihing sawm nga tuah Pekahiah cu suamin Samaria khua, kumpi inn sungtabel khanah Argob le Areih tuah thatin, kumpi dek hi.
26 Pekahiah i nadehmi dadang cu Israel kumpi Tei Tangthu Laibu sungah sialsiah haw hi.
Israel Kumpi Pekah
27 Kumpi Uzziah in, Judah ngam a uknak kum sawm nga le kum nihnakin, Remaliah i capa Pekah cu Israel kumpi dekin Samaria pen Israel ngam cu kum sawm nih sung uk hi.
28 Israel a pui sualtu, Nebat capa kumpi Jeroboam i sualnak a zui bok hangin Topa i mitmuhin sualnak bawl hi.
29 Pekah in Israel kumpi a deh laihin, Assiria kumpi Tiglath Pileser in Ijon, Abel Beth Maakah, Janoah, Kadesh le Hazor khuapite la hi. Gilead ngam, Galilee ngam le Naftali ngamte vang la khawngin, mah ngammi tampi Assiria ah sila in pui hi.
30 Uzziah capa Jotham in, Judah kumpi a dehnak kum sawm nih kumin, Elah i capa Hoshea in kumpi Pekah cu suamin thatin, amah in kumpi dek hi.
31 Pekah i nadehnak dangte cu Israel Kumpi Tei Khang Tangthu Laibu sungah sialsiah khawng haw hi.
Judah Kumpi Jotham
(2Khang 27:1-9)
32 Remaliah i capa Pekah in, Israel ngam a uknak kum nihnak kumin, Uzziah capa Jotham cu Judah kumpi dek hi.
33 Amah cu kumpi a deh ten kum sawm nih le kum nga hi a, Jerusalem pen kum sawm le kum luk sung uk hi. A nu cu Zadok i canu Jerusha hi.
34 Jotham in, a pa Uzziah i nungzui in, Topa i deih zawng bawl hi.
35 Mahnaven leihum mitei pathian biakpiaknak bawlin, namtui haal leleng haw hi. Topa i biakinn saklam kongkhah a bawltu cu amah Jotham hi.
36 Jotham i bawlmi dangte cu Judah kumpi Tei Khang Tangthu Laibu sungah sialsiah haw hi.
37 Jotham in Judah kumpi a deh laihin, Topa in Siria kumpi Rezin le Israel kumpi Pekah cu Judah do tukin hah hi.
38 Jotham cu thi in, Jerusalem, David khuapi kumpi khanah vui haw hi. Mahten a capa Ahaz in kumpi dek hi.