12
Judah Kumpi Joash
(2Khang 24:1-16)
1 Israel kumpi Jehu in Israel ngam a uknak kum salihnakin, Joash cu Judah kumpi dek a, Jerusalem pen kum sawm li sung uk hi. A nu cu Beersheba khua mi Zibiah hi.
2 Joash cu thiampi Jehoiada in, a zilh hangin a damsung hempoh cu Topa i deihzawng bawl hi.
3 Mahnaven leihum mitei lawki a biaknak munte siatsuah ngawlin khawih a, mi tampi in mahlai mun pen biakpiaknak le halkang biakpiaknak bawl leleng haw hi.
4 Joash in thiampite samin, “Pathian biatu tei a bawl leleng haw mi biakpiaknak tuah a piakcih haw mi, sumpai hihen, amu thinthawhno in, a piak haw mi sumpai hihen, Biakinn sung a, bawlmi biakpiaknak tuah pehdunin, a piak haw mi sumpai hempoh cu na khawl uh kul tuk hi.Ref 12:4 Suah 30:11-16;
5 Thiampi in, na nadehsak uhmi Pathian biatu tei a piak haw mi sumpai cu phano in cingkhawi tek unna, a kul hun pawpoh ten Biakinn lepnakah man hi tuk hi,” tin thupia hi.
6 Mahnaven kumpi Joash in ngam a uknak kum sawm nih le kum thum a kim ten, thiampi ten Biakinn cu imah lem haw ma laih.
7 Kumpi Joash in Jehoiada le a dang thiampite samin, “Ita tutian Biakinn lem ma kam uh ci? Tu pepanin, na ngah uhmi sumpai cu nangmuh ten kem tukma toh uh ci. Sumpai na ngahmi hempoh uh cu ap unna, Biakinn lem tuk ung,” ti hi.
8 Amuh in sumpai la tuk ngawltohin Biakinn vang amuh ten lem tuk ngawlin thiampite lungkim ten haw hi.
9 Jehoiada in kuang pa khat la in, a sinah a awng a bawl nungten biaklandawh el, Biakinn sung tum ten taklamah koih hi. Pathian biatu tei piakmi sumpai cu biakinn kongka nadektu thiampi ten la in, mah kuang sungah khum haw hi.
10 Kuang sungah sumpai tam toh hei tih a theih haw ten kumpi cazi le Thiampi Sang ten sumpai cu sialin, phano in dip tuah cun haw hi.
11 A umzah cu cazin sungah phano in, a sialsiah nung haw ten, Biakinn lemtu tei hotu i khutah pia haw hi. Topa i Biakinn a nadektu khutzung thiam le innsatute,
12 Suangtiangtu le suangseektu tei nilawhin pia haw hi. Biakinn lepnak tukin a kulmi thing-ah, suangte le a dadang a bomi hempoh leinak tukin mang haw hi.
13 Mahnaven mah sumpai cu ngun khuathai, kuang, pengkul le mei-inn vaknak a, manmi nate le a dadang sui le ngun tuah bawlmi nate leinakin mang haw ma hi.
14 Biakinn lepnak tuk a kulmi na le a lemtu tei thaman bebekin mang haw hi.
15 Mah nadektu tei hotute cu muantak ngangaimi hi haw in, a sumpai mandante cu dotkan lih kul hihim ma hi.Ref 12:15 2Kum 22:7;
16 Mawhnak biakpiaknak tukin piakmi sumpai le sualzah biakpiaknak a piakmi sumpaite cu mah kuang sungah khum haw ma hi, thiampi tei covo hi.Ref 12:16 Thiam 7:7;
17 Mahlai in Siria kumpi Hazael in Gath khuapi do in la hi, mahten Jerusalem khuapi cu do tum hi.
18 Judah kumpi Joash in, a laihngawl a kumpi dektu Jehoshafat, Jehoram le Ahaziah ten Pathian lakah a piak haw sumpite, Topa i Biakinn sumpai koihnak sung a, ummi sui hempoh le kumpi inn a, um sui hempoh cu la khawngin, kumpi Hazael lakah laksawngin kuat haw hi. Hazael cu Jerusalem do ngawlin a ngalkapte tuah kikleh haw hi.
19 Kumpi Joash i bawlmi dangte cu Judah Kumpi Tei Khang Tangthu Laibu sungah sialsiah haw hi.
20-21 Kumpi Joash cu a khutnuai a, bawi ten suamin, bawi pa nih Shimeath i capa Jozakar le Shonur i capa Jehozabad ten that haw hi. Silla khua hawhnak lampi, Millo luam a, ummi innah Joash cu that haw hi. Jerusalem, David Khuapi, kumpi khanah vui haw in, a capa Amaziah in kumpi dek hi.