9
Solomon Lakah Pathian Lang Leh
(2Khang 7:11-22)
1 Kumpi Solomon in Biakinn le kumpi innte a sak nuammi hempoh a sak ceng ten,
2 Topa cu Gibeon khua pen a lakah a lang bang bokin, langleh hi.Ref 9:2 1Kum 3:5; 2Khang 1:7;
3 Topa in, a lakah, “Na thungetnak za zo ing. Keimah biaknak tukin na sakmi Biakinn cu thiangthotik ing a, hi innah ka min koih zo ing. Cingkhawi tung a, kumkhua in hup tung hi.
4 Na pa David in thumanzet le kom zetin ka na a deh bangin nang vang ka nadekin, ka thupiakmi le ka daan piakmi hempoh na zui tale,
5 na pa David lakah, “Na casuan ten Israel cu uk leleng haw tuk hi,” tin ka tepmi cu kimtik tung hi.Ref 9:5 1Kum 2:4;
6 Mahnaven nangmah hihen, na casuante hihen keimah zui ngawlin ka daan piakmi le ka thupiakmite siatsuahin pathian dadang i nadekin, na bia uh tale,
7 Ka mihing Israel mite cu ka piaksa ngamsung pen lengkektik khawng tung hi. Keimah biaknak tukin ka thianthohtikmi hi Biakinn hi lawl tung a, leihummi hempohin Israel mite cu zawnsakin nautatzet haw tuk hi.
8 Hi Biakinn cu innlopin suak tuk hi. A elkim a hawhtu hempoh ten lamdang sazet haw tuk hi, “Itahim hi ngam le hi Biakinn humah Topa in hi bang lawlawmin, a bawl?” tin tili haw tuk hi.Ref 9:8 2Kum 25:9; 2Khang 36:19;
9 Midang ten ‘Israel miten a pi le pu haw Izipt ngam pen a puitultu Topa a Pathian nunghekin le pathian dadang tei na dekin a biak haw hangin Topa in hi bangin siatsuahnak hengtik hi;’ ti haw tuk hi.”
Solomon le Hiram Tei Lungkimnak
(2Khang 8:1-2)
10 Solomon in Biakinn le a kumpi inn cu kum sawm nih sung sa in ceng hi.
11 A nadehnak tukin a kulmi sidar thing, caak thing le sui hempoh cu Taiar kumpi Hiram in pia hi. Inn a sak celh ten Galilee peng a, khua sawm nih cu Solomon in Hiram pia hi.
12 Mah khua sawm nih zotu tukin Hiram cu hawhin, a zoh ten deih nge ma hi.
13 Mah hangin Solomon lakah, “Hi bang khua thongpoh maw na piak? Unau pa” tin ti hi. Mah hangin mah ngam cu Kabulnote 9:13 Kabul tihmi hi Hebru awnin ‘Kebal’ tih tuah bangve hi, a sullam cu Nemcuamnak nei ngawl tihnak hi. tin tuni tian sam haw hi.
14 Hiram in Solomon cu sui puak za le sawm nih le puak nga kuat hi.
Solomon Nadehmi Dadang
(2Khang 8:3-18)
15 Kumpi Solomon in, nadek tukin a tiklomi ten Biakinn le kumpi inn cu sa haw hi. Khuapi pen nisuahnak lamah leidipin, Millo khua satin khuapi kulhtian vang tiang haw hi. Hazor khua, Megiddo khua le Gezer khua vang sat leleu haw hi.
16 Izipt ngam kumpi in Gezer khua cu do in la hi. Khua sung um Kanaan mite cu thatin, a khua haw cu mei in halkang khawng hi. Solomon i zi a canu humah a pasal neih laksawngin, mah khua cu a canu pia in,
17 Solomon in tungdingleh hi. Mah hum pen nadeh tiklote mangin Nuailam Beth Horon,
18 Baalath le Judah hampa lak um Tamar khua,
19 an koihnak khua le a cipuh le a cipuhleng koihnak khua, Jerusalem le Lebanon ah hihen, a ukmi ngamsung mundang hempoh ah hihen, tundinleh tuk a deihmi khua hempoh cu Solomon in tungdingleh khawng hi.
20-21 Mahti bangin a manmi a nadektute cu Israel miten Kanaan ngam a lak haw ten a thah haw ngawlmi Kanaan mitei casuante haw hi. Mahmite cu Amor mi, Hit mi, Periz mi, Hiv mi le Jebus mite hi haw a, casuante cu tuni tianin sila hi haw hi.
22 Solomon in Israel mite cu salin mang ma hi. Amuh cu a ngalkapte, a khutnuai bawite, a ngalkap hotute, a lenghawl hotute le a cipuh ngalkapin mang hi.
23 Solomon in, a sakmi inn a phunkim a dektute hempoh hotu tukin mihing za nga le sawm nga koih hi.
24 Izipt ngam kumpi canu, Solomon i zi cu David khuapi pen tulin Solomon in amata tukin a sakmi kumpi innah thawn hi; mahnung ten Solomon in leidipin Millo khuapi sat hi.
25 Kum khatah vei thum Solomon in halkang biakpiaknak le pawlkom biakpiaknak cu Topa i ca a tianmi biaklandawh humah bawl hi. Topa i lakah namtui vang halin pia hi. Solomon in Biakinn sak cu ceng hi.Ref 9:25 Suah 23:17; 34:23; Thuk 16:16;
26 Kumpi Solomon in Eziongeber khua ah timbaw tampi bawl hi. Eziongeber cu Edom ngam, Aqaba Tuipi tuikel a, um Elath khua el a, ummi hi.
27 Kumpi Hiram in, a timbaw ngalkap thiamzette cu Solomon i timbaw ngalkapte tuah dek langkhat tukin kuat hi.
28 Ofir ngamah hawhin Solomon ca tukin sui puak za li laih puakin henpih haw hi.