10
Kumpinu Sheba Zin
(2Khang 9:1-12)
1 Sheba ngam kumpinu in Solomon i minthan dan a zak ten a thiatha zo tukin thudotnak haksazet tuah Jerusalem ah hawh hi.Ref 10:1-10 Mt 12:42; Lk 11:31;
2 Umlawh tampi tuah hawhin, namtuite, suang manpha le sui tampi puatu tukin kalauk tampi tuah Jerusalem khuapi ah heng hi. A tawhdun haw ten Sheba kumpinu in, a lungmu sung a, um babang thu tampi dong hi.
3 Solomon in, a thudot mite cu hilh thei khawng hi. A hilh theih ngawlmi thu imah umma.
4 Solomon i thasiahhuai a cihnak cu Sheba kumpinu in zain kumpi inn a sakmi vang mu hi.
5 Cabuai hum a, an a eihmi, a khutnuai bawi tei umdan, a nadektu tei silhmi puan mawi dan, a umlawh tei phetdan le Biakinn a bawlmi biakpiaknakte amuh ten Sheba kumpinu cu a lunglutzet hi. A muhmi hempohin kumpinu cu lamdang satik zetin, a lung-am khawng hi.
6 Kumpi Solomon lakah, “Ka ngam pen na thu le la, na cihnakte ka zakmi cu man hi.
7 Mahnaven hilai ah hungin, ka mit loli tuah ka muh cilcel laih ngawl cu sang thei mang. Ka zakmi cu atu ka mit a ka muhmi i a lang hei hi ma hi. Na cihnak le na hauhnak hi a hilh haw mi sangin nase saw hei!
8 Na zite cu bawngphazet haw ei! Na lakah ummi na cihnak awnkam a za lelengtu na umlawhte hi bawngphazet haw si!
9 Topa na Pathian cu thangphatin um tahen! Israel kumpi in, a bawl hangin na humah a lungdam hi tih cu langtik zo hi. Israel mite a ihnak cu kumkhua in, a kho mi a hih hangin dikcangnak le thudik thuman tuah amuh uk tukin nangmah cu a kumpi haw in bawl zo hi,” tin ti hi.
10 Sheba kumpinu in Solomon cu sui puak za le sawm nih le puak nga val, namtui le suang manpha tamzet pia hi. Sheba kumpinu in, a piakmi namtui cu Solomon in tum khat a ngahmi laksawng hempoh lak pen a tambel hi.
11 Mah humah Ofir ngam pen sui a puatu Hiram i timbaw tuah almug thing le suang manphate tampi puak bok haw hi.
12 Hi thing cu Solomon in Biakinn le kumpi inn upnakin mangin, awnmawi tumtu tei phaidaak le tingtangin bawlbok hi. Israel ngamsung pen a puak haw mi almug thing hempoh lak pen a phabel mi thing hi. Mahtibang thingpha cu mu awngleh haw ma toh hi.
13 Kumpi Solomon in Sheba kumpinu i a ngetmi le a deihmi hempoh pia khawngin, mah hum pen a dang tampi pia bet laih hi. Mah nungten Sheba kumpinu cu a zuitute tuah Sheba ngamah pin haw hi.
Solomon i Hauhsak Daan
(2Khang 9:13-29)
14 Kumpi Solomon in kumsialin sui puak za luk le puak sawm nih le puak nga ngah leleng hi.
15 Hihi cu sumbawl tei lak pen siah a lakmi tei lak pen a met a ngahmi le Arabia kumpite le Israel ngamkhen uktu bawi tei lak pen siah a lakmi humah hi.
16 Solomon in ngal lumphaw ngengzet za nih bawlin ngal lumphaw pa khat cu sui cuai nga khu luanmi hi.
17 Mah hum pen ngal lumphaw neudeuh za thum bawlin ngal lumphaw pa khat cu sui cuai khat le a lang tuah khu luanmi hi. Hi ngal lumphawte cu Lebanon Tupi Inn a tih haw mi a inn khansungah koih hi.
18 Kumpi khunnak ngengpi pa khat cu Saiho le sui phabelin bawl hi.
19-20 Mah kumpi khunnak hum kainak tuk kailawn pa luk umin, kailawn pa khatah kiosa zuk pa nih ten koihin, a venghawngin kiosa zuk sawm le pa nih um hi. Kumpi khunnak nunglamah khuicang lu zuk umin, khunnak hum khut ngaknak pa nih mawkah kiosa zuk pa nih, langkhat lamah pa khat veve in um hi. Hiti bang khunnak cu akua kumpi hei in nei awng haw ma hi.
21 Solomon i manmi khuat hempoh cu sui tuah bawlmi hi khawng hi. Lebanon Tupi Khaan sung a, manmi beel le khuangte vang sui tuah bawl ngeh hi. Ngun cu imah mang haw ma hi; itahim titale Solomon khanin, ngun cu man nei ngawlin a ngaihsut haw mi hi.
22 Solomon in tuipi thuanthum hum a, Tarsas lam a hawhmi timbaw vang tampi nei in, Hiram i lawngte tuah hawh langkhat mek haw hi. Tangpawlawngte cu kum thum vei khat pinin sui, ngun, saiho le zawng ngengpite le Utawngte pua haw hi.
23 Kumpi Solomon cu kumpi dang hempoh sangin hau saw in, a cih vang cip deuh hi.
24 Pathian i piakmi cihnak thei nuamin le ngai nuamin leihum khua tihkim pen mihing tampi a lakah hung mek haw hi.
25 Kum khat nung kum khat a lak a hungmi ten laksawng puak mek haw in, a piak haw mi laksawngte cu sui le ngun tuah bawlmi nate angki cualte, hiamnamte, namtuite, cipuh le laakte hi.
26 Solomon in ngaldonak cipuhleng thawng khat le za li nei in, cipuh cu thawng sawm le thawng nih nei hi. A khenkhat cu Jerusalem ah koihin, a khenkhat cu khua dangah koih hi.Ref 10:26 1Kum 4:26;
27 Solomon i ngam a uk sungin ngun cu Jerusalem a suang zahin tamin sidar thing cu Judah munlawn a theipi kung zahin tam hi.Ref 10:27 Thuk 17:17;
28 A cipuhte cu Izipt le Silisia pen lei mi hi. A mihing tei a man a ciangtan zahin Silisia pen lei mek hi.Ref 10:28 Thuk 17:16;
29 Izipt ngamah ngaldonak cipuhleng pa khat man cu ngun tangka za luk hi, cipuh pa khat man cu ngun tangka za le sawm nga hi. Solomon i mihing ten cipuh le ngaldonak cipuhlengte cu Hit kumpi le Siria kumpi lakah zuak sawlawn haw hi.