8
Thutiam Kuang Biakinn Ah Hunpih Haw
(2Khang 5:2-6:2)
1 Kumpi Solomon in Israel hinnam hotute, namkak tei hotute le a innkua ten haw a hotute cu, Topa i Thutiam Kuang cu David khuapi, Zion khua pen biakinn ah hunpih tukin Jerusalem ah sam khawm hi.Ref 8:1 2Sam 6:12-16; 1Khang 15:25-29;
2 Ha salih ha, Ethanim ha sung, Puanbuk Puai hun ten tawkdun haw hi.Ref 8:2 Thiam 23:34;
3 A hotu hempoh a hen khawng haw ten thiampi ten Thutiam Kuang cu la haw in,
4 Levi mite vangin bawm haw in, Topa i Puanbuk cu a sung a, nate hempoh tuah Biakinn ah pua haw hi.
5 Kumpi Solomon le Israel mipite cu Thutiam Kuang mai ah khawm haw in, biakpiaknak tukin sial celhngawl tuu le khui ngo haw hi.
6 thiampi ten Thutiam Kuang cu la haw in, biakinn khan sungta khan Mun Thiangthobel mun, Cherubim tei ha nuai ah koih haw hi.
7 A phalhmi Cherubim ha ten Thutiam Kuang le a zawnnak ngolhte cu khuh khawng haw hi.
8 A zawnnak ngolhte cu sau zetin, Mun Thiangthobel sungta khan mai a, Biakinn khanpi sung pen a leklam cu muh theih hi, mahnaven pualam pen muh theih ma hi. A zawnnak ngolhte cu tuni tianin mahlai ah um haw laih hi.
9 Izipt ngam pen Israel mite tulin Topa in, a lak hawah thu a tepnak Sinai Mualhum a, Moses i suangpeek pa nih a koihmi sial ngawl Thutiam Kuang sungah adang imah umma hi.Ref 8:9 Thuk 10:5;
10 Thiampi ten Biakinn zamin, a zam celh bek haw ten Biakinn sung cu meingo dim paih hi.Ref 8:10-11 Suah 40:34-35;
11 Biakinn cu Topa i sunloihnak huham tuah a dim khawng hangin, thiampite cu Biakinn ah kiklehin, a na haw dek thei haw ma hi.
12 Solomon in,
“ Topa aw, nangmah in
ni cu vanah khin koih ci.
Meingo sahzet le thimzet sung a,
um cu teng saw ci.Ref 8:12 Saam 18:11; 97:2;
13 Hilai ah biakinn mawizet
sahsak zo ing,
kumkhua na umnak tukin,” ti hi.
Mipi Tei lakah Solomon Thuhilhmi
(2Khang 6:3-11)
14 Mahlai a mipite a din haw laihin kumpi Solomon cu amu lam hekin ding a, amu ca in Pathian muicu ngen hi.
15 “Israel Pathian, Topa cu thangphatin umta hen! Itahim titale ka pa David lakah
16 ‘Izipt ngam pen ka mihing Israel mite ka puitul ni pepanin, tuni tian Israel ngam buppi sungah keimah a biaknak haw tukin Biakinn a saknak haw tuk mun le khuapi teng mang hi. Mahnaven ka mihingte uktu tukin nangmah David teng ing hi, tin,’ a thutep cu kimtik,” ti hi.Ref 8:16 2Sam 7:4-11; 1Khang 17:3-10;
17 Mah hum pen Solomon in, “Ka pa David in Israel Pathian Topa biaknak tukin Biakinn sa nuamzet hi,Ref 8:17-18 2Sam 7:1-3; 1Khang 17:1-2;
18 mahnaven Topa in ka pa David i humah na tumtahmi ka lungdamzet ing.
19 Biakinn satu cu nang hi tukma ci, na capa saw hi tuk hi” tin ti hi.Ref 8:19 2Sam 7:12-13; 1Khang 17:11-12;
20 “Atu-in, mah a thutiam cu Topa in kimtikin, ka pa David i khunnak Israel kumpi khunnak cu keimah in luah zo ing. Israel Pathian Topa biaknak tukin Biakinn vang sa zo ing.
21 Topa in, a pi le pu uhte Izipt ngam pen a tulpih laihin thutepnak a bawlmi ngatnak suangpeek pa nih koihnak kuang vang hi Biakinn sungah koih zo ing,” ti hi.
Solomon Thungetnak
(2Khang 6:12-42)
22 Mahten mipi tei muh cilcelin, Solomon cu hawh a, biaklandawh mai ah ding hi. A baanzakin thungen hi.
23 “ Topa aw, Israel i Pathian, vanah hihen, lei ah hihen, nang bang Pathian imah lai ah umma hi. Na thutepmi cu kimtik leleng ci, lungmu tak tuah a zuitu na mihing tei humah a cat awng ngawlmi itnak langtik ci.
24 Ka pa David lak a, na tepmi cu kimtikin tuni in mah na thutepnak cu bawlsuak zo ci.
25 Maw, Topa, Israel i Pathian, ka pa David lakah, “Ka thu na ngaih bangin na casuan ten ka thu a ngai bok haw tale Israel uktu tukin na casuante cu kumpi in bawl leleng tung hi,” tin na thutepnak vang kimtik zalin hi.Ref 8:25 1Kum 2:4;
26 Maw Israel i Pathian Topa, ka pa David na sila lak a na thutepmi cu hu kimtik zazalin, tin ngen hi.
27 “Mahnaven Pathian, nang cu leihumah um thei ngangai ni cim? Khua tihkim vanhaang nuai hempoh hei hi nangma ca in cawngcikzet laih hi. Mah hangin hi Biakinn ka sakmi ah hin itin kaw na thawl theih tuk?Ref 8:27 2Khang 2:6;
28 Topa ka Pathian, ka thungetnak le hehpih ka kutnakte hi hu ngai zal inna, tuni a, ka aunak le ka ngetnak cu zaksak zalin hi.
29 Nangmah ka biaknak tukin, na tenmi hi mun le Biakinn hi a sun a zanin cing zalin hi. Hi Biakinn sung a, ka thungetnak hi hu ngai zalin hi.Ref 8:29 Thuk 12:11;
30 Keimah hihen, ka mihingte hihen, hi munah thu ka nget uhten hu ngai zalin hi. Vancung na umnak pen hu ngai inna, kohte cu thei in, ka sualnak uhte ngaidam zalin hi.
31 Mi pa kha khat midang humah sual nawnin, ‘Sual mang,’ tin siatcamnak bawl tukin hi Biakinn biaklandawhah a hunpih haw tale,
32 Maw Topa a thu haw cu van pen ngai inna, na sal tei thu hu khen zalin hi. Misual cu a sualnak bangin bawlsia inna, mawh ngawltu cu a mawh ngawlnak bangin hu hah zalin hi.
33 “Na miphun Israel mite na humah a sual haw hangin a ngal ten a neh haw ten sualsikin, na lakah kikin, nangmah thangphat thahin, sual ngaihdam hi tukin hi Biakinn sung pen hehpih a ngen haw tale,
34 vancung pen hu ngai zalin hi. Na mihing tei sualnak cu ngaidam zal inna, a pi le pu tei lak a, na piaksa mi ngamah pui kiklehin hi.
35 “Na mihing ten na humah sualin, nguahzutik ngawlin na bawlsiat ten, a sual haw sikin, hi Biakinn lam hekin le na min samin, thungenin nangmah a thangphat haw tale,
36 vancung pen hu ngai sak zalin hi. Na silate, Israel tei sualnak cu ngaidam zalin hi. A zui haw tuk lamdik lak inna, kumkhua a neih haw tukin na piakmi a ngam hawah nguahzutik zalin hi.
37 “A ngam haw paampi a tun ten hihen, pulhnat a hen ten hihen, a lo sung haw ante huihtheu le khaau ten a siatsuah haw ten hihen, na mihingte ngal ten a sim haw ten hihen, a hum hawah natsia ahimata hizul a hen ten hihen,
38 na nelah a thungetnak haw cu hu ngai zalin hi. Na mihing Israel mi pa kha khat lungsia khaw-ngai zetin hi Biakinn lam hekin baanzakin thu a ngen tale,
39 a thungetnak cu hu ngai zalin hi. Na umnak vancung pen ngai inna, a sualnak cu ngaidamin, hu bawm zalin hi. Nangmah bekin mi hempoh tei lungmu cu thei ci. Mi pa khat hum tenah amu umdan bang tekin bawl inna,
40 mahten ka pi le pu tei lak a, na piakmi ngam a um sung hempoh ah na mihing ten nangmah kihca haw tuk hi.
41-42 “Lam khawlapi a um ngamdangmi in, na minthannak le na mihing tei hum a, na ngengpi na bawlmite thei in, nangmah bia tukin le hi Biakinn ah thungen tukin a hung haw tale,
43 a thungetnak haw cu hu ngai zalin hi. Na umnak vancung pen hu ngai zal inna, a nget haw mi cu bawlsak zalin hi. Na mihingte bangin hi leihummi hempoh ten nang cu thei haw tuk a, kihca haw tuk hi. Hi ka sakmi Biakinn ah nangmah cu biak tuk hi tih thei haw tuk hi.
44 “Na mihingte cu a ngalte do tukin thu na piak ten hi na tensami khuapi le a ca tukin ka sak zomi Biakinn lam hekin thu a ngen haw tale,
45 a thungetnak haw cu ngai zalin hi. Vancung pen ngai inna, a ngal tei humah nehnak piazalin hi.
46 “Mihingte iti bangin a sual khawng haw hei in, na mihingte vang na humah sualin, na thinukin, a ngal tei khut sungah pia in, salin man haw a, ngamdangah a pui haw ten iti bang ngam khawla ahi hei in,
47 na mihing tei thungetnak cu ngai zalin hi. Mah ngam pen sualsikin, na lakah thungenin, a sualdan haw le a phatngawl dante na lakah a phuang haw tale, maw Topa, hehpih a ngetnak haw cu ngai zalin hi.
48 Mah ngam pen thungai le lungmu tak tuah a pi le pu tei lak a, na piak zomi ngam le na tenmi khuapi cu na ca in ka sakmi Biakinn lam hekin thu a ngen haw tale,
49 a thungetnak haw cu ngai zalin hi. Na umnak vancung pen thei inna, hu hehpih zalin hi.
50 A sualnak haw hempoh le nangmah a langpannak haw hempoh ngaidam inna, a ngal haw vang a hum hawah hehpihnak neitik zalin hi.
51 Amu ca in thik vamtiknak somei bang Izipt ngam pen na suahtik zo mite hi na mihing le nangmata haw poh hi.
52 “Maw Topa Pathian, na mihing Israel mi le a kumpi haw humah na mitmai pha langtik leleng zal inna, bopnak a ngen haw tale, a ngetnak haw cu ngai zalin hi.
53 Leihum miphun hempoh lak pen amuh cu nangmata hi tukin teng zo ci, mah thu cu na sila Moses lak pen Izipt ngam pen ka pi le pu uhte na puitul ten hilh zo ci,” tin thungen hi.
Nungdawlbel Thungetnak
54 Solomon cu Topa i lakah vanlamah baanzakin le biaklandawh mai ah khukdinin thu a ngetnak mun pen dingto hi.
55 Mahlai mun a, khawmmi mipi tei lakah nging zetin Pathian muicu ngen hi.
56 “Pia tung hi, tin na tepsa bangin na mihing tei lak a, lemdaihnak a petu Topa cu thangphat un. A sila Moses lakah cangkim zetin, a thutepmi hempoh cu kimtik khawng hi.Ref 8:56 Thuk 12:10; Josh 21:44-45;
57 Topa a Pathian uh cu a pi le pu tei lakah a um bang bokin ohtei lakah vang um zal hen. Nunghekin zamsan thong pahsuh hen.
58 Ama deihnak bangin a nun theihnak tuk uhin le a pi le pu tei lak a, piakmi daan le thukhamte a zui theihnak tuk uhin, a thu zui theitu hitik zal hen.
59 Topa a Pathian uhin, tuni ka thungetnak le ka ngetnak cu a kumkhua in cing leleng zal hen. Israel mite le a kumpi haw humah nisialin, a kul haw mi bangin hehpihnak nei zal hen.
60 leihum miphun hempoh ten Topa bek hi Pathian hi a, Pathian dang umma hi tih thei haw tuk hi.
61 Noh ama mihingte vangin tuni a thu ngaih uh bangin a daan le a thupiakmi hempoh zui unna, Topa a Pathian uh i muantakin um leleng un,” ti hi.
62 Mahten Kumpi Solomon le Israel mipi ten mahlai pen Topa i lakah biakpiaknak bawl haw hi.
63 Solomon in pawlkom biakpiaknak tukin khuicang thawng sawm nih le thawng nih, tuu thawng za khat le thawng sawm nih ngo hi. Kumpi Solomon le Israel mipi ten biakinn cu Topa i Biakinn tukin ap haw hi.
64 Mah ni-in Biakinn mai a, um inntual laizang vang Solomon in apin, mahlai ah halkang biakpiaknak, an biakpiaknak le pawlkom biakpiaknak a sathaute pia hi. Hi biakpiaknakte cu mah inntual laizang pen a bawlnak cu Biakinn sung a daal biaklandawh cu hi biakpiaknak hempoh bawlnak tukin a neu leita hangin hi.
65 Solomon le Israel mi hempoh, saklam Hamath mualkawn pen hanglam Izipt ngamngi tian, a venghawngin Topa Pathian mitmuhin Puanbuk Puai ni salih sung bawl haw hi.
66 Ni liat ni-in Solomon in mipite cu a inn hawah pintik hi. A venghawng haw in, Solomon cu paak ten haw hi. Topa in, a sila David le a mihing Israel tei hum a, muicu a piak hangin lungdam thatui zetin, a inn tenah pin haw hi.