7
Kumpi Solomon Inn
1 Solomon in, a inn tuk vang sa in, kum sawm le kum thum ngei hi.
2-3 Mah kumpi innsung a, Lebanon Tupi Khaan a tih haw mi cu pi za le sawm nga sau in, pi sawm salih le pi nga zal hi, a sanglam cu pi sawm li le pi nga hi. Sidar thing tuah bawlmi khuam thuang thum umin, thuang khatah khuam sawm le pa nga ten um hi. Mah khuamte cu innsunte dototu hi. Siling vang sidar thing tuah bawlmi hi a, na koihnak khante vang siling um khawngin, khuam tuah domi hi khawng hi.
4 Langkhat lam pangah tukvelh thuang thum umin, langkhatlam pangah vangin thuang thum um bok hi.
5 Athuang athuangin, a ummi langkhat lam pang le langkhat lam pang a, tukvelhte cu zawndun tek haw hi. Kongka le tukvelhte cu kil li nei hi khawng haw hi.
6 Khuampi khan a tihmi haw cu pi sawm salih le pi nga sau in, pi sawm li le pi nga zal hi. Maisap cu a humkhuh phano in bawlin mah a humkhuh dotu tukin khuam dang phut haw hi.
7 Kumpi Khunnak khan, ahimata Thukhennak khan a tih haw mi Solomon in thukhennakin, a manmi khan cu a suatdawh pen innsun tian, a pangtiante le khuamte cu sidar thingpek tuah khuh khawng haw hi.
8 Solomon umnak inn, thukhennak khan nunglam a sak haw mi inn cu inn dangte bang lengin sakmi hi. Mahti bang lelengin Izipt kumpi canu a huai mi, a zi umnak tukin inn pa khat sa hi.Ref 7:8 1Kum 3:1;
9 Hi inn hempoh cu inn tawphah khunnak pen dihakhai tian, suang laknak mun pen sukin le a ngeng, a neulam tehin talhmi, a sunglam le a pualam tian bangten tukin ahmi suang tuah sakmi hi.
10 Inn tawphahnakte cu suang laknak mun pen a khenkhat pi sawm le pi nih sau le adang pi sawm le pi nga sau suang ngengpi sekmite tuah bawlmi hi.
11 Mah suang ngengpi humah a neulam le a ngenglam tehin ahmi suang le Sidar thing tuah tiang haw hi.
12 Kumpi inn, Biakinn sung khanpi le biakinn sung tumnak inn khan pangte cu ahmi suang thuah thum ten sidar thing thuah khat telhmi hi.
Daal Tuah Ceimawinak
13 Solomon in Taiar khua a um, daalsu thiam Huram a tihmi pa cu sam hi.
14 A pa cu thi zo in, a nu umlaihin, a capa bang bokin daal seekthiam khutzung mawite haw hi. A pa vang cu Taiar khua mi hi. A nu cu Naftali phun hi. Huram cu micip hi a, kum ngeipi daal lam nadek mektu hi. Solomon i samnak bangin hawhin, daal lam nadehnak hempoh cu aman ho hi.
15 Huram in daal khuam pa nih, pi sawm nih le pi salih a sangmi le a kimsuakin, pi sawm le pi liat a ngengmi cu sukin Biakinn kongka elah phut hi.
16 Mah hum pen daal a lubol pa nih pi salih le a lang a sangmi, mah daal khuam pa nih humah koih tukin bawl hi.
17 Daal khuam i lu cu daal taicin kimin zuk cuangmi le,
18 daal taleti ngah zuk tuan nih cuangin ceimawi haw hi.
19 Khuam lubol cu lily pak zuk cuangin, pi luk sangin bawl haw hi.
20 Khuam hum a, daal taicin zuk humah koih haw in, khuam lubol humah a kimsuakin taleti ngah za nih zuk thuang nihin um hi.
21 Mah daal khuam pa nih cu Biakinn kongka mai ah Huram in phut hi. Pa khat cu hanglam mawkah phutin Jakhin tin sam haw hi; a dang pa khat cu saklam mawkah phutin, Boaz tin sam haw hi.
22 Lily pak zuk cuangmi daal lubol pa nih cu mah khuam pa nih humah koih haw hi. Daal khuam bawl cu celh haw hi.
Daal Tuikuang
(2Khang 4:2-5)
23 Huram in pi salih le a lang thuk, pi sawm le pi nga zalin, a kimsuakin pi sawm li le pi nga ngeng daal tui kuangkum pa khat bawl hi.
24 Mah daal tuikuang mawk kimsuakin, daal tuah bawlmi uum zuk pi sawm li le pi nga sau thuang nihin bawl hi. Daal tuikuang le daal tuah bawlmi uum zuk cu a pehdunin bawlmi hi.
25 Mah daal tuikuang puatu cu daal khuicang sawm le pa nih hi a, saklam, hanglam, nisuahnak lam le nitumnak lamah khuicang pa thum ten hektik haw hi.
26 Daal tuikuang cu zung thum sah hi. A mawk cu khuathai mawk bang hi a, pak zik bangin a pualamah palh hi. Tui bung thawng nih le za nga va hi.
Daal Khuileng
27 Mah hum pen Huram in daal khuileng sawm bawl hi. Pi luk sau, pi luk zal le pi li le lang sang hi.
28 Khuileng a pualam belhmi cu a tedunmi ningli nei thing hi in,
29 a humah kiosa, khuicang le Cherubim zuk haw hi. A zawlpi i hum, kiosa le khuicang zuk tei hum le nuai ah pak kual zuk haw hi.
30 Khuileng pa khatin daal lengke pa li le daal lengke pehdunnak tuan nei tek haw hi. Khuileng i ningli ah maihum dotu daal tawdam um tek hi. Mah tawdamte cu paakkual zuk tuah coih haw hi.
31 Maihum i humah a kualmi ngolh um hi. Mah ngolh cu khuileng humah zung sawm le zung liat lawttulin khuileng sungah zung salih tum hi. A pumpi cingin coihmi hi.
32 Lengke cu pi sawm nih le pi nga sangin lengzawl nuai ah um hi. A ke holhnak thing cu khuileng tuah thing pa khatin bawlmi hi.
33 Lengke cu cipuh lengke bang hi a, ke holhnak thing, a ke mawk, a ke holhnak thing khamtute cu daalngek tuah bawlmi hi.
34 Khuileng kil li i nuailamah a dotu pa khat ten um hi, mahmite cu khuileng tuah thing pa khatin bawlmi hi.
35 Khuileng humlam kimsuakin lengkhap um hi. Leng dotu le a zawlte cu leng tuah thing pa khatin bawlmi hi.
36 A dotu le lengzawlte cu Cherubim le kiosa le tuumkung zuk tuah mawitik haw in, a tongnak hempoh ah paakkual zuk cuang pepeltik haw hi.
37 Khuileng a bawl daan haw cu mahti bangin hi. A venghawng bangten khawng haw in, tevedun khawng haw hi.
38 Mah hum pen Huram in khuileng pa khat ca in maihum pa khat tenin maihum sawm bawl hi.Ref 7:38 Suah 30:17-21;
39 Biakinn hanglam mawkah khuileng pa nga koihin, adang pa nga cu biakinn saklam mawkah koih hi. Tuikuang cu hanglam nisuahnak lam mawkah koih hi.
Biakinn Nate
(2Khang 4:11-5:1)
40-45 Huram in beelte, kawpia le kuangte vang bawl hi. Solomon i dehtiknak bangin Huram in Topa i Biakinn ca in, a nadeh hempoh cu ceng hi. A bawlmite cu a nuailam bangin hi haw hi.
Khuam pa nih,
Khuam hum a koihmi, kuang tuah bangten mi lubol pa nih,
Khuam lubol ceimawinak daal taicin zukte,
Khuam lubol hum a, thuang nihin zukmi taleti zuk za li,
Khuileng sawm,
Maihum sawm,
Tuikuang pa khat
Tuikuang puatu khuicang sawm le pa nih,
Beel, kawpia le kuangte,
Kumpi Solomon ca tukin Huram i na bawlmi Biakinn nate hi mom zetin nawtmi daalte hi.
46 Jordan munlawn, Sukkoth le Zarethan laklawh a daal suknak sobul a bawlmi ngeh hi.
47 Daal tuah bawlmi nate cu Solomon in cuai tehtik ma hi. A tam leita hangin cuai izah ngit hum tih cu sialcelh tukmi hi ma hi.
48 Mah hum pen Biakinn ca tukin Solomon in sui tuah bawlmi nate vang bawltik hi. Mahte cu sui biaklandawh, zehsah cangho koihnak tuk sui cabuai,Ref 7:48 Suah 25:23-30; 30:1-3;
49 Biakinn sung Mun Thiangthobel sungta saw khan mai a, koihmi sui meivaknak sawm, hanglamah pa nga, saklamah pa nga koihmi sui paakte, sui mei-innte, sui caicehte,Ref 7:49 Suah 25:31-40;
50 Sui Biakinn khanpi le Mun Thiangthobel tumnak kongka a sui pattate hi.
51 Solomon in Biakinn nadeh a celh ten a pa David in Topa i lak a piakmi sui le ngun le adang nate cu Biakinn na koihnak khansungah a venghawngin koih khawng hi.Ref 7:51 2Sam 8:11; 1Khang 18:11;