6
Solomon In Biakinn Sa
1 Izipt ngam pen Israel tei suah nung kum za li le sawm liat, Israel ngam a uknak kum li kum, ha nih ha, Ziv ha in, Solomon in Biakinn sak pan hi.
2 Biakinn cu a sunglam pen pi sawm kuah sau, pi sawm thum zalin pi sawm li le pi nga sang hi.
3 Biakinn sung tumnak a ummi khan cu pi sawm le pi nga sau in biakinn tia in, pi sawm thum zal hi.
4 Biakinn pangah tukvelh umin, mah tukvelh awngte cu a pualeu lam pen neu in, a sunglam pen ngeng hi.
5 Pang i pualamah, a siklam le nunglamah inndat dang thuah thum sa haw in, thuah khat cu pi salih le a lang ten sang haw hi.
6 Nuaitabel khan cu pi salih le a lang zal hi, a lai khan cu pi kuah zalin humtabel khan cu pi sawm le a lang zal hi. Biakinn pang cu thuah khat nung thuah khat a humta cu pa pepelin, inndat suat dawhnak khan sukte cu pangtian sungah tiancih kul ngawlin pang humah a khamin kham haw hi.
7 Biakinn saknak suangte cu suang laknak munah seksami a hih hangin Biakinn a sak haw ten sobul heipi le adang thik hiamnam tuah bawl le suk lih kulleh ngawl toh a hih tak thawmnging leilui imah umma hi.
8 Inn peh nuaitabel khan tumnak kongka cu biakinn hanglam mawk pen a thuah nihnak le thuah thumnak tian cu kailawn sau um hi.
9 Kumpi Solomon in Biakinn sak cu ceng hi. A hum cu sidar thing tuah khuhin, kaan le innsunte vang sidar thing ngeh mang hi.
10 Pangtian pualeu lam a inndat dang thuah thum a sakmi, pi salih le a lang ten sangmi cu sidar thing tuah Biakinnpi humah khih haw hi.
11 Topa in Solomon lakah,
12 “Ka daan le ka thukhamte na zui khawng a hih hangin na pa David lak a, ka tepmi hempoh na humah kimtik tung hi.
13 Ka mihing Israel mi lakah hi na sakmi Biakinn ah um tung a, ituk mahten nunghek tuk mang,” ti hi.
14 Solomon in Biakinn cu sa khawng hi.
Biakinn Sunglam Mawitiknak
15 Biakinn pangtian sunglam cu suatdawh pen siling tian sidar thingpekin khuh haw hi. A suat cu cakthing tuah dawh haw hi.
16 A sungta khaan, Mun Thiangthobel, tihmi cu Biakinn sung nunglambelah um hi. Mah khan cu pi sawm thum sau in, sidar thingpek tuah suatdawh pen siling tian dam haw hi.Ref 6:16 Suah 26:33-34;
17 Biakinn khanpi cu pi sawm luk sau hi.
18 Sidar thingpek humah uum kuhkuum le uum pak zukte cuangin ceimawi haw hi. Inn sunglam hempoh cu sidar thing tuah khuh khawng haw in, pang suangtiante cu pa khat hei lang ma hi.
19 Topa i Thutiam Kuang koihnakah sungta saw khan cu Biakinn sung nunglambelah bawl haw hi.
20 Hi khan cu pi sawm thum zalin, pi sawm thum sau hi. A sanglam vang pi sawm thum hi. A venghawngin suikhu luan haw hi. Biaklandawh cu Sidar thingpekin khuh haw hi.
21 Biakinn sunglam cu suikhu luan haw, sungta saw khan vang suikhu luanmi hi in, a tumnak kongka ah sui bawk khaih haw hi.
22 Biakinn sunglam cu Mun Thiangthobel khan le a khanpi tuah suikhu luan khawng haw hi.Ref 6:22 Suah 30:1-3;
23 Cherubim tihmi ha nei ngannung limzuk pa nih cu olif thing tuah bawl haw in Mun Thiangthobel ah koih haw a, pi sawm le pi nga veve sang haw hi.Ref 6:23-28 Suah 25:18-20;
24-26 A pa nihin teve in, bangten haw hi. Ha pa nih veve nei in, a ha haw pa khat cu pi salih le lang sau in, a ha mawk langkhat pen a ha mawk langkhat lam tian pi sawm le pi nga sau hi.
27 Mun Thiangthobel ah a zawkdunin koih haw in, a ha haw cu a khan laizang pen tawngkhadun haw hi. A ha dang haw ten pangtian tawngkha veve haw hi.
28 Cherubim cu a pa nihin suikhu luanmi hi.
29 Biakinn sung khanpi le sungta khan tei pangtian cu Cherubim zuk le tuumkung zuk le pak zuk tuah ceimawi haw hi.
30 A suatdawhte vang suikhu luan khawng haw hi.
31 Mun Thiangthobel tumnak kongka cu mawknih nei in, olif thing tuah bawlmi hi a, kongka lulam cu neu dedeuhin, a lek cu zum hi. Kil nga nei kongka hi.
32 Kongka pa nihah Cherubim zuk, tuumkung zuk le pak zuk tuah mawitik haw hi. Kongka mawknih, Cherubim le tuumkungte cu suikhu luan haw hi.
33 Biakinn khanpi sung tumnak kongka pa nih cu kil li nei veve hi haw a, olif thing tuah bawlmi hi.
34 Mah kongka pa nih cu a mawk a pa nihin hepbuah theihmi hi a, cakthing tuah bawlmi hi.
35 Cherubim le tuumkung le paakzuk tuah ceimawi mi hi a, bangtenno in suikhu luanmi hi.
36 Biakinn mai a inndat pa khat a sak haw mi cu pang tuah um haw in, mah pangtian cu suang thuah thum ten sidar thing thuah khat telh haw hi.
37 Hi Biakinn suangphum a patnak haw cu Solomon in kumpi a dehnak kum li kum, ha nih ha, Ziv ha hi.
38 Solomon kumpi a dehnak kum sawm le kum khat kum, ha liat ha, Bul ha in, Biakinn cu a tuptah haw bangin kimno in sa ceng khawng haw hi. Hi Biakinn cu Solomon in kum salih sung sa hi.