5
Solomon In Biakinn Sa Tum
(2Khang 2:1-18)
1 Taiar khua kumpi Hiram cu David i ngualcam phazet hi. David ai-in, a capa Solomon kumpi dek hi tih a zak ten Hiram in Solomon lakah kamtai hah hi.
2 Solomon in Hiram lakah hitin thucah hi,
3 “Ka pa David in Topa a Pathian i Biakinn sa nuam naven a elkim ngamte tuah a dodun leleng haw hangin sa thei ma hi, tih cu na theihsa mi hi. A ngal tei hum a, nehnak Pathian in, a piak laih ngawl sung cu Topa i innsak cu hi thei ma hi.
4 Mahnaven atu-in, Topa ka Pathian in himnak pia in, ka ngam sungah lemdaihnak um hi. Ngal nei mang hi. A do tumtu hei um haw ma hi.
5 Topa in ka pa David lakah, ‘Na ai-awhin kumpi a dektu na capa in ka Biakinn sa tuk hi,’ tin thutiam hi. Mah Biakinn cu Topa ka Pathian minthannak tukin, sa tuk ngaisung cat zo ing.Ref 5:5 2Sam 7:12-13; 1Khang 17:11-12;
6 Mah hangin Lebanon a Sidar thing phuk tukin na mihingte kuat inna, ka mihingte tuah dek langkhat haw hen hi. Na leitek bangin na mihing tei lawhman cu pia tung hi. Na theih bangin ka mihingte cu na mihingte bangin thingphuk thiam haw ma hi,” ti hi.
7 Solomon i thucahmi cu Hiram in, a zak ten a lungdam zetin, “A lamdang zetmi miphun uktu kumpi hi tukin David lak a, hi ti bang a cipmi capa piatu Topa cu tuni in thangphat hi tahen,” ti hi.
8 Hiram in Solomon lakah hi bangin thucah hi, “Na thucahmi cu thei ing, na nget bangin sidar thing le caak thingte cu pia tung hi.
9 Ka mihing ten thingtum cu Lebanon pen tuipi ah tholh haw henna, timbaw bangin a keen khawm nung haw ten tuipi mawk na deihnak mun tian hawhpih haw tuk hi. Mahlai pen ka mihing ten a keennak khau cu dukin, na mihing ten thingtum cu la haw tuk hi. Nang in, na bawlsak tukmi cu ka mihing tei eih tuk tui le ante vaihawm sak bokin,” ti hi.
10 Hiram in Solomon cu a deihmi sidar thing le cakthingte pia in,
11 Solomon in kumsialin Hiram i mihing tei eih tuk sangvut seu thawng za le sawm nih le thawng nga le olif thau phabel pung thawng sawm nih le thawng salih le za nga pia hi.
12 Topa in, a thutepmi kimtikin Solomon cu cihnak pia hi. Hiram le Solomon laklawhah lemnak umin tang langkhat tukin lungkimnak laikhette bawl haw hi.
13 Kumpi Solomon in nadektu tukin Israel ngam buppi sung pen mihing thawng sawm thum la in,
14 Adoniram cu amuhte hotu in koih hi. Mah mihingte cu thawng sawm tenin khen thumin khen hi. Khenkhat cu a sasangin, Lebanon ah ha khat, innah ha nih tenin um haw hi.Ref 5:14 1Kum 12:18;
15 Mah hum pen mualhum ngam a, suang latu tukin mihing thawng sawm liat koihin, mah suangpuatu tukin mihing thawng sawm salih koih hi.
16 Mah nadektute khawngtu tukin mihing thawng thum le za thum koih bok hi.
17 Kumpi Solomon i thupiaknak bangin biakinn tawphah suang tukin seekmi suang ngengzet le pha zetin la haw hi.
18 Solomon i mihing, Hiram mihing le Byblos khua miten biakinn saknak tukin suangseekin thingte sui haw hi.